TESALONIKA 1 5 - Alkitab Singog In Mongondow Masa In Tanaa

Pobasadia kon koangoian i Tuhan

¹ Utatku mita, soaḷ wakutu koangoian bui i Tuhan in diá bidon paraḷu paison nami kon i monimu.

² Sin kinotaauan bidon monimu kon singgai koangoian bui i Tuhan naonda bo singgai koangoian in mononakow kon wakutu in doḷom.

³ Aka intau bo moguman nanaa: “Komintanpabí noaman, diábí in onu bo onu,” dá kon dodai doman tuata kotubuan in onu inta mokoputú kon i monia bo diá tobatúmai in mokoḷagui in mosia. Tua mita in daḻíbí moiangoi naonda bo nakit in mononggadí inta moiuma bobay tobatú inta mononggadí.

⁴ Táe aka moiko yo deemanbí intau inta nobiag kon sindip, sahingga in singgai tatua diábí mokotaḻikokog kon i monimu naonda bo koangoi in mononakow.

⁵ Utatku mita moiko nion in komintanbí intau inta nobiag kon nobayag, moiko in noibonu kon bayag inta motarang. Kita in deemanbí intau inta nobiag kon sindip, ande intau inta noituot kon doḷom inta mosindip.

⁶ Tuamai kita in donaai tongá umuran mosiug mako ná intau mita ibanea, táe umuran koratakon in raian bo tantú kiḷuka-ḷukadmai.

⁷ Doḷom mosiug in mosia bo monginum doman dapot in moḷoḷangu.

⁸ Táe kita naa in intaubí inta nobiag kon singgai inta nobayag; manangka intua musti doman mobayag in raian naton, bo tantú mopirisaya kon i Tuhan bo mositabian doman bo umuran moharap kon bonu in pirisaya kon posaḷamatonbí i Allah in kita. Tuabí in ḷoḷutam inta pakéon naton moḷawang kon inta mosindip.

⁹ Piniḻí i Allah in kita, deemanbí bá oyúon in hukumon, táe bá posaḷamaton i Tuhan naton ki Yesus Kristus.

¹⁰ Sia in minatoi sin lantaranbí kita, sinbá kon wakutu in Sia mamangoidon bui – inta minatoi ande inta nobiagpa – yo moyotakin-Nea mobiag.

¹¹ Tuamai umuranbí positongginaan bo mosirigonan kon gina ná inta biasamai aidan monimu.

Tonggina mita bo salam

¹² Utat mita, poigum nami totok kon i monimu, horomatonbí in mosia inta nogaid kon yua-yuak monimu; intau inta ain piniḻí i Tuhan nobaḻí itoi bo monononggina kon i monimu.

¹³ Umuranbí horomat bo kotabi in mosia tua, sin oaidan inta inaidan monia tatua in deemanbí tongá ibo-ibog. Kobiagbí motompia bo umuran mototabian in moiko.

¹⁴ Utatku mita naa doman dugang in tonggina nami kon i monimu; toboḷow pia-pia mako in mosia inta doí mogaid bo tantú irigonai in gina in intau mita inta mongoondok, bo dika koḻiongan in motuḷung kon intau mita bogá bo mokoposabar in tumayow kon intau inta noyagi-yagimai in oaid.

¹⁵ Ḷukadai sinbá diá in mosituḻían intau kon soaḷ mita inta moraat. Umuran poramuji in mogaid kon inta mopia kon intau mita.

¹⁶ Tantú kosanang in gina,

¹⁷ bo dika koḻiongan in mosambayang.

¹⁸ Naondakabí in kaadaan monimu, yo tantúbí posukur, sin tuata in kinoibog i Allah aidan monimu saḷaku intau mita inta ain nobiag notobatú i Yesus Kristus.

¹⁹ Donaai monahang kon onu in kinoibog in Roho i Allah.

²⁰ Bo donaaibí anggapon monimu kon diá in mangaḻe in habar mita inta inogoi in Roho i Allah kon i monimu.

²¹ Bayongan in yagi-yagi musti ujionpa muna, onda in mopia, tua in aidan.

²² Bo mokopoyayú kon bayongan inta moraat.

²³ Poigumon mako sinbá umuran i Allah ogoian in kobiagan motompia bo baḻíon-Nea in moiko umat inta tongá mopirisaya bo mobiag takin i Allah. Poigumon doman mako bá ḷukadandon i Allah in roho, gina bo awak monimu, sahingga in diábí in mogaat kon wakutu in koangoiandon bui i Yesus Kristus ki Tuhan naton.

²⁴ Tua komintan aidanbí i Allah inta ain nogoiní kon i monimu sin diábí dodai onda Sia in monguboḷ.

²⁵ Uḻe utatku mita, tantú sambayangai in kami!

²⁶ Aher mako poyaputpa in salam nami kon bayongan utat pinodoyon kon totabian saḷaku intau inta mopirisaya kon i Kristus.

²⁷ Podoyon kon kawasa i Tuhan, poigumonku totok kon i monimu, sinbá surat tanaa in bacaan monimu kon tayowon in bayongan utat inta mopirisaya kon i Kristus.

²⁸ Poigumon doman mako ki Tuhan naton ki Yesus Kristus umuran mobogoi in barakat. Horomat nami, Ki Paulus