TESALONIKA 1 4 - Alkitab Singog In Mongondow Masa In Tanaa

Kobobiag inta mokosanang kon gina i Allah

¹ Pangabisannea uḻe utat mita, naa in poigumon nami takin tonggina kon i monimu inta pinodoyon kon kawasa i Tuhan Yesus, sinundúdon bo ain inontong monimu kon inami naonda in kobobiag podudui kon inta mokosanang kon gina i Allah. Moiko in nobiag bidon natua, táe tanaa pinodoyon kon kawasa i Yesus, kami in mopoigum totok kon i monimu bo mokiramuji sinbá totu-totuudon in moiko mogaid kon tua komintan!

² Sin kinotaauan bidon monimu in totundú mita inta pinotaau nami kon i monimu pinodudui in kawasa i Tuhan Yesus.

³ Nanaa in kinoibog i Allah: Ibogon-Nea moiko in mobiag tongábí kon bonu in kawasa-Nea; mobiag modarit kon bayongan in yagi-yagi bo yumayú kon oaid mita mokotor bo inta diá mopia.

⁴ Pomuḷoi in ḷoḷaki kon sigad monimu in musti monotaau kon naonda in mobiag mokosanang kon gina i Tuhan bo gina in bayongan intau takin i buḷoinea.

⁵ Donaaibí dumudui kon ibog awak in batangan ná oaid in intau mita inta diá nonotaau kon i Allah.

⁶ Tuamai in musti mokopoingat, sinbá diá tobatúmai intau mogaid kon inta diá mopia kon i utatnea, andeka monguboḷ kon i utat sin tuḻíanbí i Tuhan in bayongan tua, ná inta ain pinotaau bo pinonorop nami kon i monimu koḻipod.

⁷ Inoiní i Allah in kita, deemanbí mogaid kon inta moraat, táe mogaidbí kon onu inta mokosanang kon gina-Nea.

⁸ Tuamai ki ine in doí motarima kon singogku, yo deemanbí intau in bayowannea, táe ki Allahbí inta ain nobogoi in Roho-Nea mokudus kon i monimu in bayowannea.

⁹ Diábí bain paisonpa bui nami kon i monimu in tabi monimu kon utat mita inta tumpaḷa mopirisaya kon i Kristus. Sinundú bidon i Allah in moiko kon musti mototabian.

¹⁰ Bo tua komintan aindon pinoontong monimu kon bayongan utat inta kon Makedonia. Táe, tantúbí tongginaan nami in moiko sinbá modugang motompia in kobobiag monimu.

¹¹ Poramuji bá tantú moonow in gina bo dika umuran kumapog kon urusan in intau ibanea. Maníka bo potayak kon kobiagan monimu tontaní, ná inta ain pinoguman nami koḻipod kon i monimu.

¹² Sahingga in moiko mobiagdon motoḷutui kon tayowon intau mita ibanea, bo diá tongá moharap mako kon intau ibanea.

Koangoian i Tuhan

¹³ Utatku mita, ibogon nami bá totu-totuudon kotaauan monimu in soaḷ intau mita inta ain minatoi; sinbá diá moajar in gina monimu ná mosia inta diá in harapan.

¹⁴ Kita in mopirisaya kon ki Yesus ain minatoi, táe nobiagbí bui. Tuamai kita in mopirisaya doman, kon biagonbí bui i Allah in bayongan intau inta mopirisaya kon i Yesus Kristus inta ain minatoi bo mosia in mobiag moyotakin-Nea.

¹⁵ Kon soaḷ tatua, nanaa in pinoguman i Tuhan inta musti poyaput nami kon i monimu: Kon wakutu in ki Tuhan Yesus mamangoidon bui kita inta nobiagpa in diábí umuna kon i monia inta minatoidon muna.

¹⁶ Bambí itoi in malaekat mobaḷu bo torompet i Allah in irupondon saḷaku toḻibag, bain tua bo mamangoi in ki Tuhan Yesus nongkon soroga. Bo intau mita inta mopirisaya kon i-Nia inta ain minatoi in biagondon muna.

¹⁷ Mopaḷut mako kon tua kita inta nobiagpa naa, bingkatondon moyotakin monia mamonik in ḷangit moyodungkuḷ i Tuhan. Bain kon tuata bo mogutundon in kita takin i Tuhan.

¹⁸ Tuamai in pakédon in singog tanaa kon mosirigonan kon gina in tumpaḷa utat.