TESALONIKA 1 1 - Alkitab Singog In Mongondow Masa In Tanaa

¹ Utatku mita jamaat kon Tesalonika, inta ain nobaḻí umat i Allah ki Amá naton bo i Tuhan Yesus Kristus: Akuoi ki Paulus, ki Silwanus bo ki Timotius in umuran mopoigum kon i Allah sinbá tantú-Nea ogoian in barakat bo kobiagan motompia in moiko.

Kobobiag bo kopopirisaya intau mita in Tesalonika

^2-3 Umuran in kami mosukur kon i Allah sin pirisaya monimu. Pomuḷoi in kami mosambayang, tantú kotoropan nami in moiko. Umuran doman kotoropan nami in oaid monimu inta pinodoyon kon pirisaya kon i Tuhan naton ki Yesus Kristus inta motabi bo moibog doman motuḷung kon tumpaḷa intau. Kinotoropan doman nami in kororoton gina monimu in moharap mako kon i Tuhan naton ki Yesus Kristus.

⁴ Utat mita, kinotaauan bidon nami kon motabibí in ki Allah kon i monimu bo piniḻí-Neadon in moiko mobaḻí umat inta kinotabi-Nea.

⁵ Sin kami in nopoyaput in Habar Mopia kon i monimu deemanbí pinodoyon kon pandoi nami, táe pinodoyonbí kon kawasa in Roho i Allah inta umuran kotaki-takin nami. Bo totokbí iyakin nami kon totuubí in Habar Mopia tatua. Kinotaauan bidon monimu in kobobiag nami wakutu in kotaki-takinpa monimu. Kami in umuran noramuji in nogaid sin kopontingan monimu.

⁶ Moiko in dinumuduidon kon onu inta inontong monimu inaidan nami bo inta inaidan i Tuhan. Umpaka moiko nobiag nororiga sin pinogutú totok in intau ibanea, táe Habar Mopia inta pinoyaput nami kon i monimu in sinarimabí monimu takin sanang in gina. Sanang in gina tatua in Rohobí i Allah in nobogoi.

⁷ Tuamai moiko in nobaḻí duduianmai in bayongan intau inta mopirisaya kon Makedonia bo kon Akhaya.

⁸ Sin nongkon imonimu, habar soaḷ ki Tuhan noisiardon dapot in Makedonia bo Akhaya. Deeman doman tongá kon tua; sin nodapotbí doman in habar kon naonda in kopopirisaya monimu kon i Allah noisiar domandon magí mako kon ḻipu-ḻipúannea, sahingga diá bidon in musti pogumanku kon i monimu.

⁹ Bayongan intau in mongonguman kon naonda pinototomu monimu kon inami wakutu in namangoi kon i monimu. Inouman doman monia kon moiko in nonaḷámaidon kon onu inta pinomia monimu berhala inta sumbáan domanmai. Moiko nopirisayadon kon i Allah inta mobanar bo tongádon Sia in sinumba monimu.

¹⁰ Inouman doman monia in kososatia monimu in mogoḷat mako kon koangoian bui i Adí i Allah inta ki Yesus Kristus nongkon soroga. Sia inta ain biniag bui i Allah nongkon sigad in intau mita minatoi. Sia tuata inta moposaḷamat kon i naton nongkon hukuman i Allah kon singgai moiduduimai.