TAWARIKH 2 9 - Alkitab Singog In Mongondow Masa In Tanaa

Datu bobay nongkon Syeba

¹ Datu Bobay in butá in Syeba in nokodongogdon kon ki Salomo in ponango-nangoiandon totok. Dá namangoi in sia in Yerusalem sin monungkuḷ kon i Salomo pinongin tangkí mita inta mongobogat tubagan. Namangoi in sia kotaki-takin in intaunea mita mobayong bo unta inta dinatogan in noyagi-yagimai in pododungú mita, batu permata, bo mobayong doman totok in buḷawan. Kon tungkuḷ in noyodungkuḷ i Salomo, ki datu bobay tatua noḻibódon kon noyagi-yagimai inta kinoraiannea.

² Bayongan inta iḻibónea tua nodaitbí kinotubagan i Salomo, diábí tobatúmai in moyoyiganea tubagan.

³ Ki Datu bobay tatua in nokoontongdon tontaní kon námai tua in kopopandoi i Salomo. Sia in noindoi kon komaḻig inta pinosindog i Salomo,

⁴ pogogogaid in pogawai mita in komaḻignea, bo ḷambung soragam takin baḷoi mita monia. Inindoiannea in kaanon mita inta inoḷud, bo ḷambung in bobantung mita inta nobantung kon rame; inindoiannea doman in kuruban inta pinosumba i Salomo kon Baḷoi Tuhan. Bayongan intua nokotongaw kon i datu bobay nongkon butá in Syeba tatua.

⁵ Dá nogumandon in sia kon Datu Salomo, “Bayongan inta dinongogku kon butáku soaḷ ki Tuang bo kabijaksanaan i Tuang, in totuubí!

⁶ Koḻipod in diábí in akuoi mopirisaya, táe naonda in akuoi namangoi bo nokoontong tontaní, bain tua bo noyakin in akuoi. Totuu kon bayongan inta dinongogku tua diápabí notombotak kon inta ain inontongku tanaa. Noniata magí kabijaksanaan bo kaoyúonan i Tuang in noiḻiubí kon inta pinotaau kon inakó.

⁷ Totuu moḷunganga in pogawai mita inta mobantung kon i Tuang bo inta umuran mogaid kon i Tuang moidapot in mokodongogdon nongkon i Tuang tontaní kon bayongan totundú inta mobijaksana!

⁸ Dinayo-dayowdon in ki Tuhan, Allah i Tuang! Inta ain noduí kon i Tuang nobaḻí datu sin momarenta pinodoyon kon tangoi-Nea, pinoontong-Nea kon totuu mosanang in gina-Nea kon i Tuang. Popisí in motabi in Sia kon umat in Israel bo ibogon-Nea sinbá mosia in umuran oyúon, dá dinuí-Nea in ki Tuang nobaḻí datu monia, sinbá ki Tuang in motaau mopobayá in hukum bo koadilan.”

⁹ Onda intua ki datu bobay in butá in Syeba tatua in nobogoidon kon i Salomo in tombuinag mita inta dinianea, tuata in noiḻiu kon 4.000 nokilo in buḷawan bo nobayong doman in batu permata takin pododungú mita. Diá bidon kon dodai in onda in ki Salomo in notarima kon pododungú mita inta totuu mopia ná inta inogoi i datu bobay in butá in Syeba tatua kon inia. (

¹⁰ Intau mita i Datu Hiram bo intau mita i Datu Salomo inta nodia kon buḷawan nongkon Opir sin ogoi kon i Salomo, in nodia doman kon batu permata bo kayu in sondana.

¹¹ Kayu tatua in pinaké i Salomo pinogaid kon tukad kon Baḷoi Tuhan bo in komaḻignea, bo pinomia doman kecapi bo gambus kon intau mita mododondong. Diápabí kon dodai in onda in natua in kon butá in Yohuda.)

¹² Koḻikud in tombuinag mita tontuḻí inta biasamai ogoi i Salomo, ki Salomo in nobogoi doman kon i datu bobay nongkon Syeba tatua in bayongan inta inigumnea. Onda intua nobuidon in ki datu bobay tatua kon butánea noyotakin in bayongan tumotakinnea.

Kaoyúonan i Datu Salomo

¹³ Pomuḷoi in taong ki Datu Salomo in motarima kon gogió bo 23.000 nokilo in buḷawan,

¹⁴ diápabí pinoyoiyap in iba mita nongkon intau mita nooyúon bo inta mopopotaḷui mita. Datu mita in Arab takin gubernur mita in Israel in mobogoi doman in buḷawan bo saḷaka kon inia.

¹⁵ Ki Salomo in nogaid kon kaḻeaw noḷoben 200 inta nongkon buḷawan sinontaḷ. Buḷawan inta pinaké kon batúan in kaḻeaw tatua in 7 nokilo.

¹⁶ Nogaid doman in sia kon kaḻeaw buḷawan ona-onag intua 300. Buḷawan inta pinaké kon batúan in kaḻeaw tatua in 3 nokilo, komintanbí nongkon buḷawan sinontaḷ. Kaḻeaw mita tatua in sinagúnea kon baḷoi inta sinangoian Baḷoi in Kayuon Libanon.

¹⁷ Ki datu in nomia doman kon kadera in dodatuan tobatú inta moḷoben inta pinomia nongkon gading bo iḷambáan in buḷawan taakan.

¹⁸ Kadera tatua in pinakéan in ḻimanea bo kon posiḷosinea oyúon in patong in singa. Kadera tatua in sinontukadan doman onom noḷandakan, bo roritakan inta inaipan in buḷawan. Roritakan tatua in sinobatú in kaderanea.

¹⁹ Kon popodnea koḷoigi bo koḷanan kon batúan in tukad in kadera tatua oyúon in patong in singa – kobayongnea komintan in mopoḷú bodoyowá. Diábí kon dodai in onda in oyúon in kadera ná tatua in kon dodatuan ondaka.

²⁰ Bayongan in pakakat pongonginuman i Salomo in pinomiabí nongkon buḷawan, bo bayongan in pakakat in Baḷoi in Kayuon Libanon tua in pinomiabí doman nongkon buḷawan taakan. Kon tungkuḷ i Salomo, saḷaka in inanggapbí diá koboḻi.

²¹ Nobayong doman in kapaḷ moḷoben i Salomo inta ḷumeag kon daga-dagatannea moyotakin in kapaḷ mita i Datu Hiram. Toḷu notaong in komintan kapaḷ mita tatua in mobui modia mangoi kon buḷawan, saḷaka, gading, boḷai bo ḷagapan merak.

²² Ki Datu Salomo in mooyu-oyúon bo mobija-bijaksana nongkon datu nongkon ondakabí in kon dunia naa.

²³ Bayongan in datu moḷongasi mokipodungkuḷ kon i Salomo sin mokidongog kon totundú mobijaksana inta inogoi i Allah kon inia.

²⁴ Kon batúannea in mosia mamangoi kodia-dia in tombuinag kon i Salomo. Mosia in mobogoi in pakakat mita saḷaka, buḷawan, ḷambung, ḷoḷutam, pododungú mita, kabaḷo bo bagal. Natua in nobaḻí kon taongannea.

²⁵ Ki Datu Salomo in oyúon doman in 4.000 in ḷantung in kabaḷo bo keretanea. Kabaḷo in parangnea in 12.000. Tongosilai in kon Yerusalem, bo ibanea mako in kon kotá mita inta pototagúan kon kereta mita in parangnea.

²⁶ Sia in nongawasa kon bayongan in datu kon butá inta nongkon Ongkag in Eprat nodapot kon butá in Pilistin bo pinosigadan in Mesir.

²⁷ Kon bonu in pinomarentaan i Salomo, saḷaka in inanggap bidon pakakat biasa kon Yerusalem, notongkaidon ná batu, bo kayu ḷokuyú in Libanon nobayongdon totok nádon kayu ara biasa.

²⁸ Ki Salomo in nopoigum doman in kabaḷo nongkon Mesir bo nongkon butá mita ibanea.

Impoḷok in ouman pinomarentaan i Salomo

²⁹ Ouman ibanea kon i Salomo nongkon pinomangkoian nodapot in imbuitnea in pinaisdon kon bonu in buk Ouman kinobiagan i Nabi Natan bo kon bonu in buk Pinopotaauan muna i Nabi Ahia intau in Silo, bo kon bonu in buk Wahyu i Nabi Ido, inta nomais doman kon ouman pinomarentaan i Yerobeam datu in Israel.

³⁰ Opat nopuḷú notaong in ki Salomo in nomarenta kon Yerusalem kon sinangkub in Israel.

³¹ Onda intua minatoi in sia bo iḷobong kon kotá i Daud. Bo ki Rehabeam ki adínea ḷoḷaki in nobaḻí datu nomaḷui kon inia.