TAWARIKH 2 7 - Alkitab Singog In Mongondow Masa In Tanaa

Pinonoguḷapatan kon Baḷoi Tuhan

¹ Naonda in ki Datu Salomo nopaḷut mako nosambayang, tuḷú namonagdon nongkon ḷangit bo nomokak kon kuruban mita inta pinosumba kon i Tuhan. Bo sindar kinoangoian i Tuhan nomuḻing kon Baḷoi Tuhan tatua,

² dá imang mita diá motaau tumuot kon tua.

³ Naonda in rayat in Israel nokoontong kon tuḷú namonag nongkon ḷangit bo sindar kinoangoian i Tuhan nomuḻing kon Baḷoi Tuhan, noitungkud in mosia kon taḷog bo nosumba poḷat nodayow kon i Allah, sin mopia in Sia bo tabi-Nea in mononoi.

⁴ Nopaḷut mako kon tua ki Datu Salomo bo bayongan in intau inta noyosipun kon tua noposumba in kuruban kon i Tuhan.

⁵ Binaḻí kuruban dodamean ki Salomo noposumba in sapi 22.000 bo domba 120.000. Natuata in ki datu takin bayongan in rayat nomia kon upacara noposarakan in baḷoi ibada tatua kon i Tuhan.

⁶ Imang mita sinimindog kon tampat inta ain sinantú kon i monia; noyogintayow in intau in Lewi inta nodayow kon i Tuhan nomaké in pakakat mita in musik inta pinomia i Datu Daud, sindaḷan nopodondong in dondong “Tabi-Nea in mononoi!” Pinodudui kon onu inta pinoguman i Daud. Imang mita in nogirup kon torompet bo bayongan in rayat in simindog.

⁷ Bo yuak in bosínea inta kon tayowon in baḷoi pooibadaan tatua inogoi i Salomo kon i Tuhan. Onda intua noposumba in sia kon tua in kuruban payongon, kuruban gandum bo ḷongó in biag sin baḻíon kuruban dodamean. Tua komintan in pinosumbanea kon tua sin mezbah bitú inta ain pinomianea in diá tugatan in bayongan sosumba tatua.

⁸ Ki Salomo bo bayongan in umat in Israel nomia kon rame Singgai Moḷoben in Ḷuḷung Daun pitu nosinggai in koonggotnea. Nobarong totok in intau inta noyosipun kon pinoramean tatua. Mosia in namangoi nongkon ḻipú kinoyoyayú in daḷan Hamat kon utuan noidapot in pinosigadan in Mesir kon toḷatan.

⁹ Pitu nosinggai in koonggotnea mosia in noyosipun sin moupacara kon pinonoguḷapatan kon mezbah i Tuhan, onda intua pitupa doman nosinggai sin poramean kon Singgai Moḷoben Ḷuḷung in Daun. Kon singgai imbuitnea inaidandon in rame pinonangkup,

¹⁰ bo nopoikoḷomai kon singgai, kon singgai in doyowa nopuḷú botoḷú buḷan noginpitu, ki Salomo nopotabá in intau mita tatua nobui. Nopia in gina monia kon bayongan inta mopia inta inaidan i Tuhan kon bangusa in Israel umat-Nea, kon i Daud bo kon i Salomo.

Ki Tuhan nokipogontong bui kon i Salomo

¹¹ Naonda in nokoḷapatdon in ki Salomo kon Baḷoi Tuhan bo komaḻig in datu podudui in tombayánea,

¹² ki Tuhan in nokipogontong bui kon inia kon dodai in doḷom. Ki Tuhan in noguman kon inia, “Sambayangmu in dinongog-Kudon bo sinarima-Ku in baḷoi tanaa nobaḻí tampat inta ain sinantú moposumba in kuruban kon i-Nakó.

¹³ Aka diá in Akuoi mopoangoi in uyan andeka potabá-ku mangoi in pangkoḷá sin momoguyaat kon bungai in pinomuḷa andeka mopoangoi in yampoi kon umat-Ku,

¹⁴ bo umat-Ku inta nomaké in tangoi-Ku tua sinumonsiup, bo mosambayang poḷat namangoi kon i-Nakó bo nonaḷámai kon aid monia inta moraat, dá nongkon soroga indongogan-Ku in sambayang monia. Ampungankubí in dosa mita monia bo baḻíon-Kudon in butá monia mobiag motompia bui.

¹⁵ Umuran-Kubí indoian in Baḷoi-Ku tanaa bo umuran moibog mokidongog kon bayongan in sambayang inta pinoyaput nongkon tampat tanaa.

¹⁶ Bayongan intua aidan-Ku sin tampat tanaa in piniḻí-Kudon bo sinondí-Kudon mobaḻí tampat poibadaan kon i-Nakó mononoi. Indoian-Kubí intua bo ḷukadan-Ku kinoouputbí in dunia naa.

¹⁷ Aka iko, ná ki Daud ki amámu, mobiag motoindudui kon ibog-Ku bo motoindudui kon hukum-Ku mita poḷat mogaid kon bayongan inta pinarenta-Ku kon inimu,

¹⁸ dá intompodan-Kubí in dandi-Ku kon i amámu ki Daud kon umuranbí oyúon in intau nongkon buínea in mobaḻí datu kon Israel.

¹⁹ Táe aka iko bo rayatmu in ḻimimpat kon hukum mita bo parenta-Ku mita bo poḷat mosumba kon ilah mita ibanea,

²⁰ dá poḷuaion-Kubí in moiko nongkon butá inta ain inogoi-Ku kon i monimu. Taḷaan-Ku doman in baḷoi tanaa inta ain sinantú-Ku nobaḻí tampat ibada kon i-Nakó. Kon ondakabí yo baḷoi tanaa in singkuḻeonbí bo kosingan.

²¹ Baḷoi pooibadaan tanaa totokbí in ihoromat táe kon dodai intua bayongan in intau inta tumaḻib kon tua moherangbí in mokoontong. Mogumandon in mosia, ‘Nongonu sin pomiaanbí i Tuhan intua kon butá bo kon baḷoi tanaa?’

²² Bo tubagan in intau ‘Popisí in mosia nonaḷámaidon kon i Tuhan Allah monia, inta ain nogatod kon mogoguyang monia iḻumuai nongkon Mesir. Mosia in nosumba bo nodandi motoindudui kon ilah mita ibanea. Manangka intua pinopoangoidon i Tuhan in bodito tanaa kon i monia.’ ”