TAWARIKH 2 5 - Alkitab Singog In Mongondow Masa In Tanaa

¹ Naonda in ki Datu Salomo nopaḷut noposindog in Baḷoi Tuhan tatua, sinagúnea kon bonu in ontag mita in baḷoi tatua in bayongan saḷaka, buḷawan, bo pakakat mita ibanea inta ain pinosumba i Daud ki amánea kon i Tuhan.

Poti Dodandian i Tuhan dinia kon Baḷoi

² Nopaḷut mako kon tua ki Datu Salomo nopotabá in bayongan itoi in suku bo inanakan nongkon bangusa in Israel noyosipun kon Yerusalem sin momamping kon Poti Dodandian i Tuhan nongkon Sion, kotá i Daud kon Baḷoi Tuhan.

³ Dá namangoidon in mosia komintan kon Singgai Moḷoben in Ḷuḷung in Daun.

⁴ Naonda in bayongan in itoi tatua noyosipun, intau mita in Lewi nobuat kon Poti Dodandian tatua,

⁵ bo dinia pinobayá in Baḷoi Tuhan. Ḷoḷaigan i Tuhan takin bayongan in touḷutnea in pinamping doman in imang mita bo intau in Lewi kon Baḷoi Tuhan.

⁶ Ki Datu Salomo bo bayongan in rayat in Israel noyosipun kon tayowon in Poti Dodandian tatua bo noposumba kon i Tuhan in domba bo sapi inta diádon koiapan in kobayongnea.

⁷ Nopaḷut mako kon tua imang mita noponuotdon in Poti Dodandian tatua kon Baḷoi Tuhan bo inukat kon ḻimonagan in patong kerub kon bonu in Yuang Inta Totok in Motusi.

⁸ Koḻikip in patong mita tatua nobuká noikoḷob kon poti tatua bo kayu mita tombuḻigannea.

⁹ Kayu tombuḻigan tatua in noḷanggó totok, dá popodnea mita in koontongan nongkon Yuang Totok Motusi, táe diá koontongan nongkon ḷuai. (Dapot in singgai naa kayu mita tatua in kon tuapabí doman.)

¹⁰ Kon bonu in Poti Dodandian tatua diábí in ibanea mako koḻikudbí in batu doyowa tatua. Batu mita tatua in binonudon i Musa kon Buḷud in Sinai, kon tungkuḷ in ki Tuhan nomia kon Dodandian takin bangusa in Israel kon dodai in mosia kon bonu in bobayáan nongkon Mesir minayá in Kanaan.

Kamuliaan i Tuhan

^11-14 Bayongan in imang inta kon tua, nongkon bayongan in kolompó, ain nosadia sin momia kon upacara tatua. Bayongan in mododondong bo intau inta mopogogitog in musik kon bonu in suku i Lewi, inta ki Asap, ki Heman, ki Yedutun bo bayongan in inanakan monia, nomaké in ḷambung nongkon kaeng in lenan. Intau mita in Lewi mita tatua sinimindog kon dotá in pomukaan kon mezbah kokadai-kadai in simbal bo kecapi. Noyotakin monia 120 in imang inta nogirup kon torompet. Dondong in mododondong noyobamban in singog in musik torompet, simbal bo pakakat in musik ibanea mako. Naa in singog pinodondong monia kon i Tuhan: “Dayowdon in ki Tuhan, sin mopia in Sia. Tabi-Nea in mononoi.” Kon tungkuḷ in imang mita iḻumuai nongkon Baḷoi Tuhan, daḻídon in baḷoi tatua nopuḻing in sindar kino angoian i Tuhan, dá diádon in mosia nongingguput kon upacara ibada.