TAWARIKH 2 4 - Alkitab Singog In Mongondow Masa In Tanaa

Touḷut in Baḷoi Tuhan

¹ Ki Datu Salomo nokiaid in mezbah tobatú nongkon bitú inta kobanat bo kooḷadnea in tumososiow nometer, bo koḷantudnea in 450 nosenti.

² Sia in nomia doman kon kuyon bitú inta noḻimbung, ukurannea in nanaa: dotá in bonunea 220 nosenti, garis toyuaknea in 440 nosenti, bo ḻibunea tua in 1.320 nosenti.

³ Kon ḻibunea dotá in ḷuainea iḷambáan in doyowa nopipid in gambar in sapi, inta pinoyocor in kuyon tatua.

⁴ Kuyon tatua in inukat kon tudu in ḻikud in sapi bitú inta mopuḷú bodoyowá – toḷu in sinumayow kon utuan, toḷu in kon toḷatan, toḷu in kon toyopan, bo toḷu in kon pomukaan.

⁵ Kobunod in kuyon tatua in 75 nomili. Bingkínea in naonda bo bingkí in palo inta noboyuk ná ḷuai naonda bo bungang bakung inta nonobur. Kuyon tatua in bonunea degá 60.000 noliter.

⁶ Ki Datu Salomo in nomia doman kon 10 in baskom moḷoben, ḻima in ukaton kon dotá in toḷatan kon Baḷoi Tuhan, bo ḻima doman kon dotá in utuannea. Baskom mita tatua mangaḻenea in pomatáan kon tapú mita in biag inta iyingatdon sin tubáan baḻíon kuruban. Tubig kon bonu in kuyon tatua in sinadia kon imang mita sin mondarit kon awak.

^7-8 Pinomianea doman in 10 in totuduan togá nongkon buḷawan podudui in model inta ain sinomayá, bo 10 in meja. Bayongan in sioḷ in totuduan togá bo meja tatua inukat kon bonu in yuang totokanea kon Baḷoi Tuhan – kon batúannea in ḻima kon dotá in koḷoigi, bo ḻima doman in kon dotá in koḷanannea. Pinomianea doman in 100 in palo buḷawan.

⁹ Ki Datu Salomo in nomia doman kon dangkuḷon kon dotá in bonunea tampat in imang mita bo dangkuḷonnea kon dotá in ḷuai. Ḷoḻingkop mita kon ngara mita kon sigad in dangkuḷon doyowa tatua inaipan in bitú.

¹⁰ Kuyon in inukat kon diug in sikunea kon tenggara kon Baḷoi Tuhan.

^11-16 Ki Huram, tongguḷu in mogogimok mita tatua nomia kon kawaḻi mita, sikop mita bo palo mita. Dá nopaḷutdon in sia nomia kon bayongan touḷut in Baḷoi Tuhan podudui in dandinea kon i Datu Salomo. Tanaa in touḷut mita inta ain pinomianea tatua. Oigi moḷoben doyowa Tongguḷu in oigi doyowa inta ná palo inta inukat kon tudu in oigi doyowa tatua Tuḷapid in rante kon batúan in tongguḷu in oigi Opat nogatut in delima bitú inta ginuntuḷ kon doyowa nopipidan noiḻibu kon tuḷapidan kon batúan in tongguḷu in oigi Mopuḷú in kereta Mopuḷú in baskom moḷoben Kuyon bitú Mopuḷú bodoyowá in sapi bitú inta nobaba kon kuyon tatua Kawaḻi mita, sikop mita bo porok mita Bayongan in touḷut mita tatua inta pinomia i Huram sin pakéon kon Baḷoi Tuhan, pinomia nongkon bitú bo iradat nodapot in nopouḻi-uḻinag. Ki Huram in nomia kon bayongan intua pinodudui in parenta i Datu Salomo.

¹⁷ Ki Datu in nokiaid in pakakat mita tatua kon pococoran kon logam kon sigad in Sukot bo Zereda kon Ḷopá in Yordan.

¹⁸ Pakakat mita tatua totuu mobarong, dá diábí tobatúmai in nonotaau mongo tongonu nokilo in bitú in pinaké.

^19-22 Ki Datu Salomo in nokiaid doman in pakakat mita ibanea nongkon buḷawan taakan sin pakéon kon Baḷoi Tuhan. Tanaa in pakakat mita inta pinomianea tua: Mezbah Meja pototuduan kon roti oḷudon Bayongan in sioḷ totuduan in togá bo togánea nongkon buḷawan inta nogurang sin poyongkiton kon tayowon in Yuang Totok in Motusi, podudui in tomayá Ḷambá mita inta pinomia ná bungang Togá mita Totupit mita Pakakat ponondarit kon togá Palo mita Pindan mita pototuduan kon dupa Pindan mita pototuduan kon baga Bayongan in ngara tumuot kon Baḷoi Tuhan bo ngara in Yuang Totok in Motusi inaipan in buḷawan.