TAWARIKH 2 36 - Alkitab Singog In Mongondow Masa In Tanaa

Ki Yoahas datu in Yohuda

¹ Rayat in Yohuda nomiḻí bo noduí kon i Yoahas nobaḻí datu kon Yerusalem nonoḻiu kon i Yosia, ki amánea.

² Ki Yoahas umur 23 notaong kon dodai in sia nobaḻí datu in Yohuda, bo sia in nomarenta kon Yerusalem toḷu nobuḷan in koonggotnea.

^3-4 Ki Nekho datu in Mesir noḷawang bo nogakut kon i Yoahas pinobayá in Mesir, bo pinotabánea in ki Yohuda noguboḻi kon iba 3.400 nokilo in saḷaka bo 34 nokilo in buḷawan. Onda intua dinuínea in ki Elyakim ki utat i Yoahas nobaḻí datu bo binaḷuiannea in tangoi i Elyakim nobaḻí Yoyakim. Onda intua ki Yoahas in dinianea pinobayá in Mesir.

Ki Yoyakin datu in Yohuda

⁵ Ki Yoyakin umur 25 notaong kon dodai in sia nobaḻí datu kon in Yohuda, bo sia in nomarenta kon Yerusalem 11 notaong in koonggotnea. Sia in binaradosa kon i Tuhan Allahnea.

⁶ Naonda in ki Nebukadnezar datu in Babel nogagow kon Yohuda, dinomoknea in ki Yoyakim, bo dinia kotogo-togot pinobayá in Babel.

⁷ Tongosilai in pakakat mita koboḻi kon Baḷoi Tuhan in dinia i Nebukadnezar bo inukat kon bonu in komaḻignea kon Babel.

⁸ Ouman ibanea kon i Yoyakim, noitakin doman in oaidnea mita inta mokotor bo aidnea mita moraat, aindon pinais kon bonu in buk Ouman in Datu mita in Israel bo Yohuda. Ki Yoyakhin ki adínea ḷoḷaki in nobaḻí datu nomaḷui kon inia.

Ki Yoyakhin datu in Yohuda

⁹ Ki Yoyakhin in umur 18 notaong kon dodai in sia nobaḻí datu in Yohuda, bo nomarenta in sia kon Yerusalem toḷu nobuḷan bo mopuḷú nosinggai in koonggotnea. Sia in binaradosa doman kon i Tuhan.

¹⁰ Kon pinoyoḻimbanan in taong, ki Datu Nebukadnezar nogakut kon i Yoyakhin pinobayá in Babel nobaḻí intau inta dinakop, bo pakakat mita inta koboḻi kon Baḷoi Tuhan in dinianea doman. Onda intua ki Nebukadnezar noduí kon i Zedekia, pokuamáan ki Yoyakhin, nobaḻí datu in Yohuda bo Yerusalem.

Ki Zedekia datu in Yohuda

¹¹ Ki Zedekia in umur 21 notaong kon dodai in sia nobaḻí datu in Yohuda. Sia in nomarenta kon Yerusalem 11 notaong in koonggotnea.

¹² Sia in binaradosa doman kon i Tuhan Allahnea. Doí doman in sia tumonsiup bo doí dumudui kon i Nabi Yeremia inta nopotaau in koyow nongkon i Tuhan kon inia.

Yerusalem noḷabú

¹³ Ki Datu Nebukadnezar in nomakisadon kon i Zedekia mongibot pinodoyon kon i Allah kon sia in mosatiabí kon i Nebukadnezar. Táe kon singgai noiduduimai ki Zedekia nomarontak kon i Nebukadnezar. Ki Zedekia in nopotontogat in gina kon i Tuhan, Allah in Israel. Doí in sia monaḷámai kon dosanea mita bo doídon mobui mangoi kon i Tuhan.

¹⁴ Koḻikud intua, Baḷoi Tuhan inta ain sinantú i Tuhan tontaní kon i-Nia, pinonajisdon in itoi mita in Yohuda, in imang mita bo in rayat, sin mosia in dinumudui nosumba kon berhala bo dinumudui kon kobobiag inta binaradosa nongkon bangusa mita inta kon diugmai monia.

¹⁵ Ki Tuhan, Allah in mogoguyang monia, aindon nopobui-buimai in mopotabá in totabá-Nea sin mobogoi in tompoingat kon umat-Nea, sin motabi in Sia kon i monia bo kon baḷoi-Nea.

¹⁶ Táe mosia in nopoyambá in totabá mita i Allah tatua, bo kinosingan monia in nabi-Nea mita poḷat doman diá mopandungmai kon tosingogon-Nea mita. Imbuitnea ki Tuhan in sinumorúdon totok kon i monia dá diádon in daḷan ibanea kon i monia kon kotaḻiban in hukuman nongkon i-Nia.

¹⁷ Ki Tuhan in nopogonú kon gina in datu in Babel sinbá monubu kon i monia. Ki datu tatua in noḻimod kon intau in Yohuda inta nongobagupa, noitakin doman in mosia inta kon bonu in Baḷoi Tuhan. Diábí in Sia nonotabi kon tobatúmai in intau, noguod andeka noguyang, ḷoḷaki andeka bobay, notakit andeka nosehat. Mosia komintan inogoi i Allah kon i datu in Babel.

¹⁸ Pakakat mita in Baḷoi Tuhan, bo pakakatnea mita inta koboḻi, takin doman kapunyaan in datu bo in pogawainea mita, komintan inagow i datu in Babel bo dinia kon Babel.

¹⁹ Sia in nogumpag kon dinding in kotá in Yerusalem, bo nonurub kon kotá tatua, takin doman Baḷoi Tuhan bo bayongan in komaḻig takin pakakat mita inta koboḻi inta kon bonupa in komaḻig mita tatua.

²⁰ Rayat inta nobiagpa in dinianea kon Babel. Kon tua in mosia nobaḻí ki atanea bo ki ata in buínea nodapot in kon tungkuḷ in dodatuan Persia nongawasa.

²¹ Dá nobaḻídon onu inta ain pinoguman i Tuhan pinongin i Yeremia kon butá tatua in mobaḻídon diá in mangaḻenea kon bonu in 70 notaong in koonggotnea nobaḻí toḻiu in taong mita in Sabat inta diá pinandungmai.

Ki Kores nomarenta kon intau in Yahudi nobui

²² Kon taong imitánea kon pinomarentaan i Kores, datu in Persia, Ki Tuhan in nogaidon kon onu inta pinoguman-Nea pinongin i Nabi Yeremia. Ki Tuhan in nopogonú kon gina i Kores sinbá mopoḷuai in parenta tobatú inta bacaan kon bayongan in dodatuan nea. Nanaa in singognea:

²³ “Naadon in parenta i Kores, datu in Persia! Ki Tuhan Allah inta nongawasa kon soroga nopobaḻídon kon inakó datu kon sinangkub in dunia, bo nopotabádon kon inakó sin moposindog in baḷoi kon i-Nia kon Yerusalem kon butá in Yohuda. Dá, moiko komintan inta nobaḻí umat i Allah in mustibí mobui kon tua! Igumon mako ki Tuhan Allahmu moḷukad kon i monimu.”