TAWARIKH 2 35 - Alkitab Singog In Mongondow Masa In Tanaa

Ki Yosia nomia kon rame in Paska

¹ Onda intua ki Yosia nomia kon rame in Paska kon Yerusalem sin mohoromat kon i Tuhan. Domba inta pakéon kon poramean tatua in iratá kon singgai in impuḷú bo opat kon buḷan imitánea.

² Ki Yosia in nosilai kon bayongan imang in oaidan mita inta musti aidan monia kon Baḷoi Tuhan, bo pinoki aidnea kon i monia intua mita kopiraan.

³ Intau mita in Lewi inta ain sinantú mogaid kon oaidan i Tuhan, bo inta nobaḻí guru mita in Israel in nokouḻí kon parenta tanaa nongkon i Yosia, “Ukatdon in Poti Dodandian i Tuhan inta motusi tatua kon bonu in Baḷoi Tuhan inta pinosindog i Datu Salomo ki adí ḷoḷaki i Daud. Dikadon pampi-pampingon monimu bui. Undoidon in ki Tuhan Allahmu bo bangusa in Israel umat-Nea.

⁴ Posadiadon kon Baḷoi Tuhan podudui in paananmu, podudui in tonsilai oaidan inta ain sinantú kon inimu i Datu Daud bo i Datu Salomo ki adínea ḷoḷaki.

⁵ Tompiadon in paananmu tua kopiaan totok dá umuran oyúon in nongkon i monimu inta motaau mobantung kon pomuḷoi in paanan intau in Israel kon Baḷoi Tuhan.

⁶ Moiko in mustibí moratá kon domba sin pakéon kon poramean kon Paska. Tuamai posadiadon in iko sinbá patus in mosumba kon i Tuhan, bo sadiadon doman in kuruban mita inta musti posumba monimu kon i Tuhan, sinbá intau mita in Israel inta ibanea motaaudon mopobayá in onu inta pinarenta i Tuhan pinongin i Musa.”

⁷ Sinbá intau mita inta moiangoi kon poramean kon Paska tatua motaaudon moposumba in kuruban Paska, ki Datu Yosia in nobogoi in bobiagonnea tontaní in 30.000 in domba, ki adí in domba, bo bembé batánea, bo 3.000 in sapi koḷakian.

⁸ Pogawai mita i Yosia in nobogoi doman in sumbangan kon imang mita, bo intau in Lewi nongkon bayongan in rayat. Pogawai mita inta inogoian in oaidan kon Baḷoi Tuhan, inta ki Imang Moḷoben ki Hilkia, bo ki Zakharia, bo ki Yehiel, taya toḷu tua in tumpaḷabí nobogoi kon imang mita in 2.600 in ki adí in domba bo bembé inta batáneapa bo 300 in sapi koḷakian sin nobaḻí sosumba kon poramean tatua.

⁹ Itoi mita in intau in Lewi, inta: ki Konanya, ki Semaya bo ki Netaneel ki utatnea, ki Hasabya, Yeiel, bo ki Yozabad, in nobogoi kon intau in Lewi in 5.000 in ki adí in domba bo bembé inta batánea bo 500 in sapi koḷakian sin baḻíon sosumba kon poramean tatua.

¹⁰ Naonda in komintandon nosadiadon kon poramean kon Paska, imang mita bo paanan mita in intau in Lewi nogamá kon tampatnea-tampatnea ná inta pinarenta i datu.

¹¹ Bo noratádon in mosia kon biag sin pakéon kon poramean kon Paska; intau in Lewi nonginkuḻit bo imang mita in mopopisik in dugú in bobiagon tatua kon tudu in mezbah.

¹² Pomuḷoi in paanan in inanakan inta namangoi intua mokouḻí kon tumongo batu in bobiagon mita inta posumba mobaḻí kuruban payongon. Takin natua dá mosia in motaaudon moposumba in kuruban podudui in atorang inta ain pinais kon bonu in buk Hukum i Musa.

¹³ Bo intau mita in Lewi nogangag kon kuruban in Paska tatua kon tudu in tuḷú podudui in atorang, bo notuon kon kuruban mita inta ain sinantú kon bonu in kawaḻi, dandang bo kuyon, onda intua tapúnea in ḷagidon sinilai kon intau mita.

¹⁴ Nopaḷut mako kon tua baintua bo intau mita in Lewi nonondídon kon silai monia tontaní bo kon imang mita inta buí i Harun. Sin, modapot in doḷom imang mita tatua in umuranbí mogaid moposumba in bobiagon mita nobaḻí kuruban payongon, bo motubá kon ḷongó in kuruban mita tatua.

¹⁵ Intau mita inta mongopandoi totok mopogogitog in musik nongkon inanakan i Asap inta kon bonu in suku i Lewi in kon tampatdon pogogaidan monia inta ain sinantú i Datu Daud kon i monia. Naa in tangoi mita monia: ki Asap, ki Heman, bo ki Yedutun, nabi tobatú inta nogaid kon kopontingan in datu. Moḷoḷukad mita kon bonawang mita in diá bidon paraḷu monaḷámai kon poḷoḷukadan monia sin mosia in motaaubí morame kon Paska kon tampat pogogaidan monia poḷat binantungan in intau mita in Lewi ibanea.

¹⁶ Kon singgai tua mosia in nogaid kon bayongan yagi-yagi inta pinarenta i Datu Yosia sin kopontingan in poramean kon Paska noitakin doman in sosumba mita kon mezbah.

¹⁷ Pitu nosinggai in koonggotnea bayongan in rayat in Israel inta kon tua in norame kon Paska bo rame in Roti Diá Iragian.

¹⁸ Paska ná tatua in diá bidon kon dodai in onda pinorameanpa bui nongkon tungkuḷ i Nabi Samuel. Diábí tobatúmai nongkon datu mita inta noiuna in nokoimontandon norame kon Paska ná inta inaidan

¹⁹ kon taong impuḷú bo waḷu kon pinomarentaan i Yosia tatua, i datu tatua tontaní takin in imang mita, intau in Lewi, intau in Yohuda bo Israel, bo intau mita inta nogutun kon Yerusalem.

Imbuit in pinomarentaan i Yosia

²⁰ Naonda in ki Datu Yosia nogaid kon bayongan intua sin kopontingan in Baḷoi Tuhan; ki Nekho datu in Mesir nonongganut kon tontaranea sin moparang kon Karkemis kon diug in Ongkag in Eprat. Ki Yosia in noḷongasidon nogimaḷow kon inia,

²¹ táe ki Nekho in nokidia in habar tanaa kon i Yosia, “Parang tanaa in deemanbí soaḷ iko, datu in Yohuda! Akuoi in namangoi deemanbí moḷawang kon inimu, táe moḷawangbí kon musungku mita, bo ki Allah in nopotabá kon inakó ḻimikat in mopobayá in oaidan. Ki Allah in naa kon dotáku, tuamai in dikadon moḷamboi kon i-Nia, sinbá diá in iko rimumudon-Nea.”

²² Táe ki Yosia in noḷongasibí moḷawang, bo doí dumudui kon onu inta pinoguman i Allah pinongin i Datu Nekho. Ki Yosia in nogiḷambung in ḷambung ibanea bo sinumuot kon parang kon ḷopá in Megido.

²³ Kon bonu in pinoparangan tatua ki Datu Yosia in kinotugatan in piot. Bo nomarenta in sia kon bobantungnea mita sinbá modiadon kon inia ḷumuai nongkon pinoparangan tatua sin sia in pinaḻíandon nodaḷom.

²⁴ Binuat monia in sia nongkon keretanea bo pinamping kon kereta ibanea inta kon tua, onda intua dinia pinobayá in Yerusalem. Kon tua minatoi in sia bo iḷobong kon poḷoḷobongan kon datu mita. Bayongan in rayat Yohuda bo Yerusalem nonogumatoi kon kinopatoiannea.

²⁵ Ki Nabi Yeremia in nomia kon dondong amui tobatú kon i Datu Yosia. Nodapot in tanaa dondong tatua in pinaké kon Israel in intau mita mododondong, pinomayá ḷoḷaki andeka bobay, kon pinonogumatoian kon i Yosia. Dondong tatua in pinotuotdon kon bonu in pinosipunan kon dondong mita in amui.

²⁶ Ouman ibanea kon i Yosia, soaḷ kototabinea kon i Tuhan, bo kotoinduduinea kon hukum mita i Tuhan,

²⁷ impoḷoknea mako, bayongan in ouman in kinobiagannea nongkon pinomangkoian nodapot in imbuitnea in pinaisdon kon bonu in buk Ouman in Datu mita in Israel bo Yohuda.