TAWARIKH 2 34 - Alkitab Singog In Mongondow Masa In Tanaa

Ki Yosia datu in Yohuda

¹ Ki Yosia umur waḷu notaong kon dodai in sia nobaḻí datu kon Yohuda, bo sia in nomarenta kon Yerusalem toḷu nopuḷú bo mita notaong in koonggotnea.

² Sia in nogaid kon onu inta mokosanang kon gina i Tuhan; sia in dinumudui kon oaid mopia i Datu Daud mogoguyangnea, bo dinumudui kon bayongan in hukum i Allah takin ḻimbatú in gina.

Ki Yosia nonginggamá kon pinosumbaan mita kon berhala

³ Naonda in waḷudon notaong in nobaḻí datu, kon umur inta totokpa in noguod, ki Yosia in nomangkoidon noibada kon i Allah inta sinumba i Datu Daud mogoguyangnea. Opat notaong noiduduimai nomangkoidon in sia norimumud kon tampat mita pososumbaan kon berhala, patong mita i dewi Asyera, bo berhala mita ibanea.

⁴ Patong mita bo berhala mita tatua in irimumud in intau mita i Yosia bo rimumudnea in pinonabudnea kon tudu in pinoḷobongan kon intau mita inta noposumba in kuruban kon berhala mita tatua. Mezbah mita i Baal bo mezbah mita in dupa inta kon tua in inumpag monia.

⁵ Onda intua ki Yosia notubá kon tudu in mezbah tatua in tuḷan mita in imang mita inta nogundoi kon berhala mita tatua. Aidnea tatua nopomiadon kon Yohuda bo Yerusalem motaaudon bui moibada kon i Tuhan.

⁶ Tua in inaidannea doman kon kotá mita bo kon butá mita inta ain norimumud kon butá in Manasye, Epraim, bo Simeon, nodapot in Naptali kon utuan.

⁷ Mezbah mita bo patong mita i Asyera kon sinangkub in dodatuan utuan inumpag i Yosia, bo patong mita bo bayongan in mezbah dupa irimumudnea. Bo nobuidon in ki Yosia kon Yerusalem.

Buk in hukum mita i Tuhan nouḻídon bui

⁸ Kon taong impuḷú bo waḷu kon pinomarentaan i Yosia, naonda in sia noḷumbú kon pinosumbaan kon berhala nongkon Baḷoi Tuhan bo kon bayongan in butá, sia in nopotabá in intau toḷu sin monompia kon Baḷoi Tuhan Allah. Intau toḷu tua in ki Sapan ki adí i Azalya, ki Maaseya gubernur in Yerusalem, bo ki Yoah ki adí i Yoahas, pogawai moḷantud tobatú.

⁹ Intau mita in Lewi inta noḷukad kon ngara in Baḷoi Tuhan, nobogoi kon i Imang Moḷoben ki Hilkia, in doit inta ain sinipun monia. Doit tatua in nongkon intau in Epraim bo Manasye, bo nongkon rayat ibanea kon Dodatuan in Utuan, bo nongkon rayat in Yohuda, Benyamin bo Yerusalem.

¹⁰ Doit tatua in noiduduimai inogoi i Imang Moḷoben ki Hilkia kon intau toḷu inta pinoki ḷukadan kon ponompiaan kon Baḷoi Tuhan tatua. Noiduduimai kon tua inogoi monia in doit tatua

¹¹ kon mogogimok mita kon kayu bo mogogaid kon bangunan inta musti motaḷui kon batu bo kayu sin ponompia kon bangunan mita inta ain pinomayá mako nogoguyaat in datu mita in Yohuda.

¹² Intau mita inta nonompia tatua totu-totuubí kon motuḻid in gina. Mosia in sinongganutan in intau in Lewi taya opat: ki Yahat bo ki Obaja nongkon inanakan i Merari, bo ki Zakharia bo ki Mesulam inta nongkon inanakan i Kehat. Intau mita in Lewi, inta komintan mopia mogogitog in musik,

¹³ inogoian in oaidan moḷukad kon pogakutan kon pakakat mita, mobaḻí itoi kon intau mita mogogaid kon noyagi-yagimai in oaidan, monompia kon administrasi, bo moḷukad kon ngara.

¹⁴ Kon dodai in doit sumbangan tatua pinoḷuai nongkon pototagúan, ki Hilkia in nokouḻí kon buk Hukum Tuhan, tuata in hukum mita inta inogoi i Allah kon i Musa.

¹⁵ Nogumandon in ki Hilkia kon i Sapan, “Akuoi in nokouḻí kon buk Hukum i Tuhan kon Baḷoi Tuhan,” bo inogoinea in buk tatua kon i Sapan.

¹⁶ Sinarima i Sapan in buk tatua, bo minayá kon i datu bo noguman, “Bayongan inta pinoki aid i Tuang inaidandon nami.

¹⁷ Ginamádon nami in doit inta sinagú kon Baḷoi Tuhan, bo inogoi kon mogogaid mita bo moḷoḷukadnea mita.”

¹⁸ Onda intua buipa doman nosingog in sia, “Ki Hilkia in nobogoi in buk tanaa kon inakó.” Bo ki Sapan nobaca kon buk tatua pinodongog kon i datu.

¹⁹ Nokodongogmai kon tombonu in buk tatua, ki datu in nomera-merak kon ḷambungnea sin norobonoḷ totok in dodobnea.

²⁰ Bo ki datu in nobogoi in parenta tanaa kon i Hilkia, kon i Ahikam ki adí i Sapan, kon i Abdon ki adí i Mikha, kon i Sapan momomais in negara, bo kon i Asaya moḷoḷukad i datu,

²¹ “Bayádon poḻibó kon i Tuhan sin kopontinganku bo kopontingan in intau mita inta kon Israelpa bo kon Yohuda soaḷ tombonu in buk tanaa. Ki Tuhan in sinumorú kon inaton popisí in mogoguyang naton diá nopobayá in parenta mita inta pinais kon bonunea.”

²² Dá minayádon in ki Hilkia, ki Ahikam, ki Abdon, ki Sapan bo ki Asaya nopoigum in topotundú kon bobay tobatú inta ki Hulda in tangoinea. Sia in nabi tobatú inta nogutun kon ḻipú mobagu kon Yerusalem. Ki buḷoinea in ki Salum ki adí i Tikwa, ki ompu i Harhas. Sia in kitogi totaau kon ḷambung ibada kon Baḷoi Tuhan. Naonda in dinongog i Hulda onu inta pinotaau monia,

²³ pinotabánea in mosia nobui kon i datu bo nopotaau in koyow tanaa, “Ki Tuhan, Allah inta sinumba in intau in Israel in noguman,

²⁴ ‘Akuoi in mohukum kon Yerusalem bo bayongan in intau inta nogutun kon tua pinongin kutukan mita inta pinais kon bonu in buk tatua inta binaca kon i datu.

²⁵ Mosia in nonaḷámaidon kon i-Nakó bo noposumbadon in kuruban kon ilah mita ibanea. Bayongan inta inaidan monia in nokopomukádon kon torú-Ku. Sinumorú in Akuoi kon Yerusalem, bo torú-Ku in diábí motaau onowan.

²⁶ Táe kon i Datu Yosia, naa in koyow-Ku, ki Tuhan Allah in Israel: Naonda in iko nokodongog onu inta pinais kon bonu in buk tatua,

²⁷ iko in nomanasaḷ bo sinumonsiup kon tayowon-Ku. Akuoi in nogumandon kon Yerusalem bo intau mita inta nogutun kon tua, táe naonda in iko nokodongog kon onu inta pinotaau-Ku tatua nongombaḷ in iko bo nomerak kon ḷambungmu nobaḻí tomponuot kon morobonoḷ in dodobmu. Dinongog-Kudon in sambayangmu,

²⁸ Tuamai hukuman kon Yerusalem diábí poḷabúon-Ku kon wakutu in iko mobiagpa. Iko in ogoi-Kubí matoi takin pia-pia mako.’ ” Dá nobuidon in totabá mita tatua kon i datu bo nopotaau in koyow tatua.

Ki Yosia in nogaid kon dodandian kon motoindudui kon i Tuhan

²⁹ Ki Datu Yosia in nogoiní kon bayongan in itoi in Yohuda bo Yerusalem,

^30-31 bo minayá takin monia kon Baḷoi Tuhan. Noyotakin monia dinumudui doman in imang mita, intau in Lewi bo bayongan in rayat, pinomayá inta nobogá andeka inta nooyúon. Kon muna monia komintan, kon diug in pal inta ain sinantú kon i datu, ki datu in sinimindog bo nobaca kinoḷangon in bayongan buk in dodandian inta ain nouḻí kon bonu in Baḷoi Tuhan. Onda intua ki datu in nogaid kon dodandian takin i Tuhan kon motoindudui kon i-Nia bo mopobayá takin ḻimbatú in gina bo takin doman dimukud kon mogaid kon bayongan in hukum-Nea mita, bo dumudui kon sarat in dodandian kon sigad i Tuhan bo umat-Nea inta pinais kon bonu in buk tatua.

³² Bayongan in intau in Benyamin bo bayongan in intau ibanea inta kon Yerusalem pinoki dandiannea kon dumuduibí kon dodandian tatua. Dá intau mita in Yerusalem dinumudui kon atorang mita kon dodandian tatua, tuata in dodandian kon sigad monia bo i Allah in mogoguyang monia.

³³ Berhala mita inta mokorongó inta kon tampat mita inta noituot kon butá in intau Israel, komintanbí irimumud i Datu Yosia. Bo pinakisanea in rayatnea moibada kon i Tuhan, Allah in mogoguyang monia. Dá kon bonu in ki Yosia nobiag, rayat in umuran mosatia kon i Tuhan.