TAWARIKH 2 31 - Alkitab Singog In Mongondow Masa In Tanaa

Ki Hizkia nonompia kon kaadaan in agama

¹ Naonda in nopaḷut in pinorayaan, bayongan in rayat minayá kon batúan in kotá kon Yohuda, bo norimumud kon tugu mita in berhala, nogumpag kon patong mita inta pinosindog kon i Dewi Asyera, bo norumbun kon mezbah mita takin tampat mita pososumbaan kon berhala. Mosia in nogaid doman kon natua kon tampat mita ibanea kon Yohuda, bo kon butá in Benyamin, Epraim bo Manasye. Nopaḷut mako kon tua mosia in nobuidon kon tampat monia tontaní.

² Ki Datu Hizkia in nonantúdon bui kon paanan mita in imang mita bo intau in Lewi podudui in tonsilai in oaidan monia. Oaidan mita tatua in soaḷ mita inta noiduduimai naa: moposumba in kuruban payongon bo kuruban dodamean, mopobayá in upacara ibada kon Baḷoi Tuhan, bo modayow poḷat mopoyaput in sukur kon i Tuhan kon bayongan tampat kon bonu in Baḷoi Tuhan.

³ Nongkon bobiagonnea tontaní ki datu in nobogoi in biag mita inta pakéon kon kuruban payongon pomuḷoi in doḷo-doḷom bo ḷoḷabungnea, bo kuruban inta posumba kon singgai in Sabat, kon poramean Buḷan Mobagu, bo kon poramean mita ibanea ná inta sinantú kon bonu in hukum mita i Tuhan.

⁴ Koḻikud intua ki datu nopotabá kon intau mita in Yerusalem nodia kon sosumba inta sinantú kon imang mita bo intau in Lewi sinbá mosia in motaaudon moposarakan in ḻimbatú in kobiagan monia kon oaidan kon Baḷoi Tuhan ná inta ain pinais kon bonu in hukum mita i Tuhan.

⁵ Naonda in parenta tatua pinotaau, intau in Israel nodia mangoi kon Baḷoi Tuhan in oogoi mita nongkon bungai in boyó monia inta dungkuḷ, tuata in topong torigu, anggur, ḷana in zaitun, biluk, bo bungai in boyó ibanea. Mosia in nodia doman kon mopuḷú noporosen nongkon kapunyaan monia.

⁶ Bayongan in intau inta nogutun kon kotá mita in Yohuda in nodia kon mopuḷú noporosen nongkon bobiagon sapi bo domba mita monia, bo nobayong doman totok in oogoi mita ibanea, bo noposumba in bayongan tua kon i Tuhan Allah monia.

⁷ Oogoi mita tatua diniadon mangoi nongkon buḷan intoḷunea, nodapot in buḷan impitunea.

⁸ Nokoontongmai kon oogoi inta námai tua in kobayong, ki Datu Hizkia bo pogawainea mita nodayow kon i Tuhan bo nomuji kon rayat in Israel, umat-Nea.

⁹ Kon dodai in ki datu noyosingog in imang bo intau in Lewi soaḷ oogoi mita tatua,

¹⁰ Imang Moḷoben ki Azarya buí i Zadok in noguman, “Pinangkoipamai kon rayat nogatod kon sosumba mita monia kon Baḷoi Tuhan, kami in diá bidon kinodaitan in kaanon, nodapotbí in noiḻiudon, dá nobayongpa in tongkaaḷ in kaanon nami. Tua komintan in sinarimadon nami sin ki Tuhan in nomarakatdon kon umat-Nea.”

¹¹ Pinodudui kon parenta i datu, mosia in nogaid kon ontag mita kon diugmai in Baḷoi Tuhan,

¹² bo motagú kon bayongan in oogoi bo mopuḷú noporosen tatua kon bonu in ontag mita tatua. Intau in Lewi tobatú inta ki Konanya in tangoinea, sinantúdon nobaḻí moḷoḷukad bo ki Simei ki ai-ainea in binaḻí mobobantungnea.

¹³ Kon bonu in tongganut monia mopuḷú intau in Lewi ibanea in pinoki aidan, tuata: ki Yehiel, ki Azazya, ki Nahat, ki Asael, ki Yerimot, ki Yozabad, ki Eliel, ki Yismakhya, ki Mahat, bo ki Benanya. Tua komintan in sinantúdon podudui in totundú i Datu Hizkia bo i Imang Moḷoben ki Azarya.

¹⁴ Ki Kore ki adí i Yimna, intau in Lewi tobatú inta nobaḻí itoi in moḷoḷukad kon Bonawang Pomukaan kon Baḷoi Tuhan, inogoian in oaidan motarima kon oogoi mita inta pinosumba kon i Tuhan, bodongka mosilai.

¹⁵ Kon kotá mita ibanea inta pinogutunan in imang mita, ki Kore binantungan in intau mita in Lewi ibanea tuata: ki Eden, ki Minyamin, ki Yesua, ki Semaya, ki Amarya, bo ki Sekhanya. Kokaanon mita tatua in sinilai kinotongkai kon tumpaḷa suku in Lewi pinomayá inta noguyang andeka inta noguodpa podudui in oaidan monia.

¹⁶ Bayongan in ḷoḷaki inta umurdon toḷu nopuḷú notaong bo namonik, inta nokouḻí kon silai mopobayá in oaidan pomuḷoi in singgai kon Baḷoi Tuhan, in inogoian doman in silainea kon batúannea podudui in oaidannea bo podudui in paanannea.

¹⁷ Imang mita in pinais mita in tangoi monia podudui in inanakannea, bo intau in Lewi inta umurdon doyowa nopuḷú notaong bo namonik in pinaisdon podudui in oaidan monia bo paanannea.

¹⁸ Mosia komintan in pinais noyotakin in adí bo buḷoi, bo anggota mita ibanea kon bonu in motoḷuadínea, sin mosia in mustibí umuran mosadia pomuḷoi mako sin mopobayá in oaidan mita monia inta ain sinantú kon i Tuhan.

¹⁹ Kon sigad in imang mita inta nogutun kon kotá mita inta ain sinantú kon buí i Harun, andeka kon rawang mita kon diugmai in kotá mita tatua, sinundú in intau mita sin mosilai kon kokaanon kon bayongan in ḷoḷaki kon bonu in motoḷuadí in imang, bo kon batúan in intau inta pinais kon bonu in suku Lewi.

²⁰ Kon sinangkub in Yohuda, ki Datu Hizkia nopobayá in koadilan, nogaid kon onu inta motuḻid, bo mokosanang kon gina i Tuhan Allahnea.

²¹ Sia in nokodapot kon oaidannea, sin bayongan inta inaidannea kon kopontingan in Baḷoi Tuhan andeka dumudui kon hukum mita i Tuhan, pinobayá takin ḻimbatú in gina bo takin doman tabi kon i Tuhan Allahnea.