TAWARIKH 2 30 - Alkitab Singog In Mongondow Masa In Tanaa

Pinosadiaan kon poramean Paska

^1-5 Poramean kon Paska diápa kino aidan in rayat kon wakutunea kon buḷan imitánea, sin imang mita inta ain nopotusi in awak noyakagpa bo noyakagpa in intau in noyosipun kon Yerusalem. Tuamai in ki Datu Hizkia bo pogawainea mita takin intau mita in Yerusalem nopakatdon kon moramedon kon Paska kon buḷan induanea, bo nopia komintan in gina monia in nokodongog kon tomayá tatua. Bo ki datu in nokidia in surat kon bayongan in rayat in Israel bo Yohuda. Kon intau doman in Epraim bo Manasye. Bayongan in bangusa Israel nongkon butá in suku Dan kon dotá in utuan nodapot kon Bersyeba kon toḷatan, inoiní doman namangoi in Baḷoi Tuhan kon Yerusalem sin moraya kon Paska bo mohoromat kon i Tuhan Allah in Israel ná inta ain sinantú kon bonu in hukum mita i Musa. Diápa kon dodai in onda in Paska irame námai tatua.

⁶ Pinodudui kon parenta i datu bo pogawainea mita pinotabádon in totabá mita minayá kon sinangkub in Yohuda bo Israel sin modia kon surat mita tatua inta nanaa in bonunea, “Rayat in Israel! Moiko nion in noiḷuatdon nongkon kawasa intau in Asyur. Tanaa in angoidon bui in moiko bo pogundoi kon i Tuhan, Allah inta sinumba i Abraham, i Ishak, bo i Yakub, sinbá Sia in buidon motuḷung kon i monimu.

⁷ Dikabí ná mogoguyang monimu bo intau mita in Israel ibanea inta diá mosatia kon i Tuhan Allah monia. Inontongdon monimu tontaní in naonda in kobobogat pinohohukum-Nea kon i monia.

⁸ Dikabí motogat in gina ná mosia, táe duduiaibí in ki Tuhan. Angoidon in Yerusalem, kon Baḷoi Tuhan inta ain sinantú i Tuhan Allahmu kon i-Nia modapot in mononoi. Koḻigaidon moibada kon i-Nia sinbá moinggamádon in torú-Nea kon i monimu.

⁹ Aka moiko bo mobui mogundoi kon i Tuhan, dá intau mita inta nogakut kon ginaḷum motoḷuadímu nobaḻí intau mita inta dinakop, koangoiandon in tabi bo ogoidon monia mobui in mosia. Ki Tuhan Allahmu in ki Allahbí inta mopia bo oyúon kototabi; tarimaan-Neabí in moiko aka moiko mobui mangoi kon i-Nia.”

¹⁰ Naonda in totabá mita tatua minayá in kotá-kotáannea kon butá in suku Epraim bo Manasye nodapot kon utuan kinoouput in butá in suku Zebulon, mosia in kinosingan bo siningkuḻe.

¹¹ Táe, oyúon doman in intau mita nongkon suku i Asyer, i Manasye bo i Zebulon in noibog namangoi in Yerusalem.

¹² Kon Yohuda ki Allah in nogaid doman bo noponobatú kon gina in rayat sinbá totu-totuu motoindudui kon ibog i Allah pongin dumudui kon parenta i datu bo in pogawainea mita.

Pinoramean kon Paska

¹³ Kon buḷan induanea nobayong totok in rayat nosipun kon Yerusalem sin morame kon Singgai Moḷoben in Roti Diá Iragian.

¹⁴ Mezbah mita kon Yerusalem inta pinaké sin moposumba in kuruban bo motubá kon dupa kon i dewa mita, komintandon ginamá bo iḷumbú kon bonu in Ḷopá in Kidron.

¹⁵ Kon singgai impuḷú bo opat buḷan tatua mosia in noratá kon domba mita sin posumba nobaḻí kuruban in Paska. Imang mita bo intau mita in Lewi inta nonajispa, nooyádon totok. Mosia in nopotusidon in awak dá notaaudon moposumba in kuruban payongon kon Baḷoi Tuhan.

¹⁶ Mosia kon batúannea nogamá kon tampat kon Baḷoi Tuhan podudui in onu inta ain sinantú kon bonu in buk in hukum mita i Musa. Dugú in kuruban mita tatua inogoidon in intau in Lewi kon imang mita, bo binutak monia kon mezbah.

¹⁷ Nobayong in nongkon sigad in intau inta kon tua in diápa nopotusi in awak, dá mosia in diábí motaau moratá kon domba sin pakéon kon kuruban in Paska. Tuamai intaudon mita in Lewi in nogaid kon tua kon i monia bo noposumba kon i Tuhan.

¹⁸ Koḻikud intua, kon sigad in intau mita in Epraim, Manasye, Isakhar, bo Zebulon, nobayong in namangoi táe diá muna nopotusi in awak. Dá, mosia in norame kon Paska tatua takin diá dinumudui kon sarat. Tuamai in ki Datu Hizkia in nosambayang sin kopontingan monia, kainia,

¹⁹ “Tuhan, ki Allah in mogoguyang nami, igumon mako nongkon kopopia in gina-Mu ampungan-Mu in mosia inta koyogot in moibada kon ini-Mu takin ḻimbatú in gina, umpaka mosia in diápa nopotusi in awak.”

²⁰ Ki Tuhan in nokidongog kon sambayang i Hizkia. Inampungan-Nea in intau mita tatua, bo diá nohukum kon i monia.

²¹ Pitu nosinggai in koonggotnea, takin noḷunganga totok in gina intau mita tatua in noyosipun kon Yerusalem tatua nogaid kon pinoramean kon Roti Diá Iragian. Pomuḷoi in singgai intau mita in Lewi bo imang mita modayow kon i Tuhan takin ḻimbatú in gina.

²² Intau mita in Lewi tatua mongopandoi modia kon ibada kon i Tuhan, dá pinuji i Hizkia in mosia. Naonda in pitu nosinggai in koonggotnea mosia nongaan kon kaanon kon pinoramean tatua bo poḷat noposumba in kuruban sin mopoyaput in sukur kon i Tuhan, Allah in mogoguyang monia,

Pinoramean induanea

²³ mosia komintan in nonantúdon kon mongingguputdon kon porayaan tatua. Bo mosia in noramedon bui takin ḷunganga in gina.

²⁴ Ki Datu Hizkia in nobogoi in sapi koḷakian 1.000 bo domba 7.000. Pogawai mita i Hizkia nobogoi in sapi koḷakian 1.000 bo domba 10.000. Bayongan in biag mita tatua inogoi kon rayat sin ratáan bo kaanon. Nobayong totok in imang in nopotusi in awak.

²⁵ Rayat in Yohuda, imang mita, intau mita in Lewi, bo intau mita inta namangoi nongkon utuan, bo intau mita ango-angoi inta ain nogutun notantú kon Israel bo Yohuda, komintandon noḷunganga in gina.

²⁶ Kotá in Yerusalem norame totok sin pinangkoi kon tungkuḷ i Salomo ki adí ḷoḷaki i Daud, diápa kon dodai in onda in nobaḻí in ná tatua.

²⁷ Imang mita bo intau mita in Lewi nopoigum sinbá ki Tuhan momarakat kon rayat, bo nongkon tampat pinogutunan-Nea kon soroga ki Allah in nokidongog kon sambayang monia bo poḷat notarima kon oigum monia.