TAWARIKH 2 29 - Alkitab Singog In Mongondow Masa In Tanaa

Ki Hizkia datu in Yohuda

¹ Ki Hizkia nobaḻí datu in Yohuda kon dodai in umur 25 notaong, bo nomarenta in sia kon Yerusalem 29 notaong in koonggotnea. Ki inánea in ki Abia ki adí i Zakharia.

² Ki Hizkia in nogaid kon onu inta kinoibog i Tuhan ná ki Datu Daud mogoguyangnea.

Ki Hizkia in nopotusi in Baḷoi Tuhan

³ Kon buḷan imitánea kon taong imitánea kon pinomarentaannea, ki Hizkia nomukat kon ḷoḻingkop mita in Baḷoi Tuhan bo nopotabá kon intau nonompia.

⁴ Imang mita bo intau in Lewi pinotabánea nosipun kon bosínea kon dotá in pomukaan kon Baḷoi Tuhan,

⁵ bo noyosingog in sia takin i monia kon tua. Sia in noguman, “Moiko intau mita in Lewi, musti mopotondí in awak monimu kon i Tuhan, bo mopotusi in Baḷoi Tuhan, Allah in mogoguyangmu. Bayongan inta mokonajis kon baḷoi tatua mustibí poyayúon.

⁶ Mogoguyang naton in diá mosatia kon i Tuhan Allah naton bo mosia in nogaidon kon onu inta diá mokosanang kon gina-Nea. Mosia in diádon nopandungmai kon i-Nia bo diádon doman nopandungmai kon tampat pinogutunan-Nea.

⁷ Mosia in noḻingkopbí kon ḷoḻingkop mita in Baḷoi Tuhan bo nomiong kon togánea mita. Mosia in diábí notubá kon dupa kon Baḷoi Tuhan, bo diá doman noposumba in kuruban payongon kon i Allah inta sinumba in intau in Israel.

⁸ Bo ki Tuhan kon bonu in torú-Nea nohukum kon intau in Yohuda bo Yerusalem. Bo moiko komintan in nokotaaubí kon aid i Tuhan tatua ain nokotaḻikokog bo mokokoningkim.

⁹ Ki amá mita naton minatoi kon pinoparangan, bo adí buḷoi naton in dinia nobaḻí intau mita inta dinakop.

¹⁰ Tanaa in moibog in akuoi momia kon dodandian takin i Tuhan, Allah in Israel, sinbá diádon in Sia tumorú kon inaton.

¹¹ Adíku mita, dikadon mogoḷat mongo toonu, sin moikobí inta ain piniḻí i Tuhan moibada bo mogundoi kon i-Nia bo poḷat motubá kon dupa bo modia kon rayat moibada.”

^12-14 Naa in intau mita in Lewi inta kon tua dodai intua: Nongkon inanakan i Kehat: ki Mahat ki adí i Amasai, bo ki Yoël ki adí i Azarya Nongkon inanakan i Merari: ki Kish ki adí i Abdi, bo ki Azarya ki adí i Yehaleleel Nongkon inanakan i Gerson: ki Yoah ki adí i Zima, bo ki Eden ki adí i Yoah Nongkon inanakan i Elisapan: ki Zimri bo ki Yeiel Nongkon inanakan i Asap: ki Zakharia bo ki Matanya Nongkon inanakan i Heman: ki Yehiel bo ki Simei Nongkon inanakan i Yedutun: ki Semaya bo ki Uziel.

^15-16 Onda intua mosia nosipun kon intau mita in Lewi ibanea, bo mosia komintan nopotusi in awak. Nopaḷut mako kon tua, podudui in parenta i datu, imang mita sinumuot kon Baḷoi Tuhan bo nomangkoidon nopotusi podudui in hukum mita i Tuhan. Bayongan inta nonajis dinia pinoḷuai kon bosí in Baḷoi Tuhan. Nongkon tua dinia in intau in Lewi pinobayá in Ḷopá in Kidron kon ḷuai in kotá.

¹⁷ Oaidan tatua in pinangkoi kon singgai imitánea kon buḷan imitánea doman. Kon singgai iwaḷunea nopaḷutdon in mosia nopotusi kon bayongan in bosí in Baḷoi Tuhan nodapot kon baḷoi kon dotá in munanea. Onda intua kon bonu in waḷu nosinggaipa mosia in nopotusi kon bayongan in baḷoi tatua nodapot in nopaḷut kon singgai impuḷú bo onomnea kon buḷan tatua.

Baḷoi Tuhan pinosarakan bui kon i Allah

¹⁸ Bo intau mita in Lewi tatua nopotaaudon kon i Datu Hizkia, “Nopaḷutdon in kami nopotusi in bayongan Baḷoi Tuhan, noitakin doman in mezbah in kuruban payongon, meja inta pototuduan kon roti inta oḷudon, bo bayongan in pakakatnea.

¹⁹ Kami in nogamá domandon bui kon pakakat mita inta pinoyayú i Datu Ahas kon tungkuḷ in sia diá nopandungmai kon i Tuhan kon dodai in sia nomarenta. Komintan pakakat tatua aindon sinantú nami kon i Tuhan, bo tanaa in kon tayowondon in mezbah.”

²⁰ Diá bidon nogoḷatpa noonggot in ki Datu Hizkia nosipun kon intau mita inta sinon itoi kon ḻipú, bo minayá noyotakin monia minayá in Baḷoi Tuhan.

²¹ Binaḻí kuruban potobut kon dosa in motoḷuadí in datu bo rayat in Yohuda, bo pakéon in mopotusi kon Baḷoi Tuhan, nodia in mosia kon sapi koḷakian pitu, domba koḷakian pitu, ki adí in domba pitu, bo bembé koḷakian pitu. Ki datu in nopotabá kon imang mita buí i Harun noposumba in biag mita tatua kon tudu in mezbah nobaḻí kuruban payongon.

²² Sapi mita tatua in iratá bo imang mita in nopobutak in dugúnea kon mezbah. Onda intua inaidan doman monia intua kon domba inta pitu bo ki adí in domba tatua.

²³ Imbuitnea nogamá in mosia kon bembé mita tatua bo dinia kon i datu bo kon rayat inta koyogot in moibada kon tua, bo mosia komintan in nopoukat in ḻima monia kon tudu in bembé mita tatua.

²⁴ Nopaḷut mako kon tua bembé mita tatua iratá in imang mita bo dugúnea in pinopobutak kon mezbah nobaḻí kuruban pongampung kon dosa in bayongan rayat. Tua in inaidan monia sin ki datu in nomarentadon sinbá moposumbadon in kuruban payongon bo kuruban pongampung kon dosa kon bayongan in rayat in Israel.

²⁵ Podudui in topotundú mita inta inogoi i Tuhan kon i Daud pinongin i Nabi Gad, inta nogaid kon i datu bo pinongin i Nabi Natan, ki datu in nonampatdon kon intau mita in Lewi kon Baḷoi Tuhan sin mopogogitog in kecapi bo gambus,

²⁶ ná inta pinaké i Daud. Imang mita in sinampatnea doman kon tua takin torompet.

²⁷ Ki Hizkia in nobogoi in tomponuot sinbá upacara pobogoian in kuruban pangkoiondon. Koyogot in kuruban pinosumba, intau mita momangkoidon mopododondong kon i Tuhan, bo intau mita inta mopogogitog in musik moposingogdon in torompet bo pakakat mita in musik ibanea.

^28-29 Ki Datu Hizkia bo bayongan intau inta kon tua sinumungkud nosumba kon i Tuhan bo intau mita inta mododondong tantúbí modondong bo intau mita inta mogogogitog in musik tantú doman mopogogitog in musiknea nodapot in bayongan in kuruban tatua nopokak komintan.

³⁰ Ki datu bo intau mita inta sinon itoi kon ḻipú nopotabá kon intau mita in Lewi nokipodondong in dodayow kon i Tuhan in dodayow inta pinomia i Daud bo i Nabi Asap. Komintan intau nodondong takin ḷunganga in gina poḷat sinumungkud bo nosumba kon i Allah.

³¹ Nopaḷut mako kon tua ki Hizkia in noguman, “Popisí in moiko tanaa aindon sinondí kon i Tuhan, dá nobaḻí sosumba sukurmu, moiko in mustibí modia kon kuruban kon Baḷoi Tuhan.” Bo bayongan in intau inta kon tua in nodia kon sosumba mita tatua, nodapot in oyúon doman inta takinbí ibog monia tontaní nodia kon biag mita sin posumba mobaḻí kuruban payongon.

³² Mosia in nodia kon sapi koḷakian pitu nopuḷú, domba mogatut, bo ki adí in domba doyowa nogatut bo noposumba binaḻí kuruban payongon kon i Tuhan.

³³ Nodia doman in mosia kon sapi koḷakian 600 bo domba 3.000 sin posumba bo kaanon moyotakin in bayongan intau inta kon tua.

³⁴ Imang mita inta ain nopotusi in awak monia in noyakag dá diá nokodait nonaip kon bayongan in biag tatua. Tuamai mosia in binantungan in intau mita in Lewi, sin intau in Lewi in mosati-satia kon atorang in potusian. Mosia in tantúbí nobantung nodapot in tugatdon in imang inta ain nopotusi in awak.

³⁵ Koḻikud in kuruban payongon, imang mita in noposumba doman in ḷongó nongkon kuruban sukur inta kinaan in rayat. Mosia in noposumba doman in anggur inta binutak noyotakin in kuruban payongon tatua. Natuata in ibada kon Baḷoi Tuhan inaidandon bui.

³⁶ Dá nosanangdon in gina i Datu Hizkia bo rayatnea sin kon bonu in wakutu notoyong ki Allah ain nogaid kon tua komintan.