TAWARIKH 2 28 - Alkitab Singog In Mongondow Masa In Tanaa

Ki Ahas datu in Yohuda

¹ Ki Ahas in nobaḻí datu kon dodai in umur doyowa nopuḷú notaong, bo sia in nomarenta kon Yerusalem mopuḷú bo onom notaong in koonggotnea. Sia in diábí dinumudui kon aid mopia i Datu Daud, mogoguyangnea, táe nogaidbí kon onu inta diá nokosanang kon gina i Tuhan.

² Sia in nobiag naonda bo datu mita in Israel bo nokiaid kon intau in patong mita in Baal nongkon logam,

³ poḷat notubá kon dupa kon Ḷopá in Hinom. Nodapot in ki adínea ḷoḷaki tontaní in pinosumbanea nobaḻí kuruban kon berhala, podudui in kabiasaan diá mopia in intau mita inta ain pinoguntun i Tuhan nongkon butá mita in Kanaan kon tungkuḷ in intau mita in Israel sinumuot kon butá tatua.

⁴ Ki Ahas noposumba in kuruban bo notubá kon dupa kon tampat mita pososumbaan kon dewa kon buḷud mita kon siungon in kayu mongobambar.

Parang nonayow kon Siria bo Israel

^5-6 Popisí in ki Datu Ahas binaradosa, dá ki Tuhan Allahnea nopomayádon kon inia sinaḷow i datu in Siria inta nogakut doman kon nobayong totok in intau in Yohuda nobaḻí intau inta dinakop pinobayá in Damsyik. Pinomayá doman mako i Tuhan in sia sinaḷow i Datu Pekah ki adí i Remalya nongkon Israel, inta kon bonu in tosinggai noḻimod kon 120.000 in tontara in Yohuda inta mongobarani. Ki Tuhan, Allah in mogoguyang monia nopomayádon intua komintan nobaḻí, sin rayat in Yohuda diádon nopandungmai kon i Tuhan.

⁷ Ki adí ḷoḷaki i Ahas inta ki Maaseya iḻimod i Zikhri porwira tobatú in Israel. Ki Zikhri in noḻimod doman kon i Azrikam inta kitogi totaau kon oaidan in komaḻig i datu, bo ki Elkana intau inta pinopopirisaan i Datu in oaidannea.

⁸ Umpaka intau mita in Yohuda tumpaḷa intau in Israel, táe tontara in Israel nodakop kon 200.000 in bobay bo mongoadí mita, bo dinia kon Samaria noyotakin in nobayong totok in pakakat inta inagow.

Ki Nabi Oded

⁹ Nabi i Tuhan tobatú inta ki Oded in tangoinea nogutun kon kotá in Samaria. Kon tungkuḷ in tontara in Israel nobui bo nodia kon intau mita inta dinakop nongkon Yohuda, ki Oded minayá nokipodungkuḷ kon i monia kon dodai in mosia tumuotdon kon kotá. Sia in noguman, “Moiko in nonaḷowdon kon intau in Yohuda sin ki Tuhan in mogoguyangmu in sinumorúdon kon i monia. Táe ki Tuhan in nokodongogdon kon naonda in kororomú monimu in noḻimod kon tontara in Yohuda.

¹⁰ Bo tanaa intau mita in Yerusalem bo Yohuda in baḻíondon monimu atamu mita! Diábí degá kinotaauan monimu kon moiko tontaní in binaradosadon kon i Tuhan Allahmu?

¹¹ Indongogai! Intau mita inta dinakop tanaa in ki utatmubí mita. Dá, potabádon in mosia mobui. Aka diá, ki Tuhan in tumorú bo mohukum kon i monimu.”

¹² Intau opat inta sinon itoi nongkon Israel, inta ki Azarya ki adí i Yohanan, ki Berekhya ki adí Mesilemot, Ki Yehizkia ki adí i Salum, bo ki Amasa ki adí i Hadlai, in diá doman noibog kon aid in tontara inta nobui tatua.

¹³ Mosia in noguman, “Dika diaan in intau mita inta dinakop tatua kon naa! Kita in binaradosadon kon i Tuhan, bo dosa mita naton in totuudon moḷoben sin hukumon. Tanaa in moiko mogaid kon tobatú aid inta tongá mokodugang kon taḷá naton.”

¹⁴ Dá tontara mita tatua in noposarakan kon intau mita inta dinakop tatua bo pakakat mita inta inagow tatua kon rayat bo itoi mita monia.

¹⁵ Bo intau opat inta sinon itoi tatua sinimindog sin moindoi kon intau mita inta sinokodakop tatua. Mosia in nosilai kon ḷambung mita inta sinokoagow mita tatua kon intau mita inta sinokodakop inta moparaḷu. Mosia in nosilai doman kon sapatu, kaanon bo inumon. Intau mita inta sinokodakop inta pinaḻi-paḻían inundaman in ḷana zaitun. Inta diá mokomampu mayá, pinotakoi kon keledai, bo bayongan in intau mita inta sinokodakop tatua dinia kon Yerikho, kotá in pangkoi mita in kurma, sinbá motaaudon mobui kon ḻipú monia tontaní kon Yohuda. Nopaḷut mako kon tua intau in Israel nobui kon Samaria.

Ki Ahas nopoigum in totuḷung kon Asyur

^16-17 Intau mita in Edom nomangkoidon bui nonubu kon Yohuda bo nodakop kon nobayong in intau. Tuamai ki Datu Ahas nopoigum kon i Tiglat-Pileser, datu in Asyur, sinbá mokidia mangoi in totuḷung.

¹⁸ Kon tungkuḷ intua intau mita in Pilistin koyogot in monubu kon kotá mita kon butá mita inta kon sipangkoion in buḷud kon dotá in toyopan, bo kon butá mita inta kon dotá in toḷatan in Yohuda. Mosia in nogagow kon kotá in Bet-Semes, Ayalon, bo Gederot, takin kotá in Sokho, in Timna, bo Gomzo noitakin doman in ḻipú mita kon diugmai in kotá toḷu tatua, bo nogutundon notantú kon tua.

¹⁹ Popisí in ki Ahas datu in Yohuda nonaḷámai kon i Tuhan bo diá nomarenta kon rayatnea ná inta musti aidannea, dá ki Tuhan in nopoangoidon in roriga kon Yohuda.

²⁰ Ki datu in Asyur tatua in namangoi deemanbí motuḷung kon i Ahas, táe mopororigabí kon inia.

²¹ Dá pakisadon in ki Ahas nogamá kon buḷawan nongkon Baḷoi Tuhan, nongkon komaḻig, bo nongkon baḷoi mita in itoi mita in rayat, bo nobogoi kon i datu in Asyur. Tongá tua doman in diábí doman baraguna kon inia.

Dosa mita i Ahas

²² Kon bonu in kaadaan inta totok in mororiga tatua, nodugangdon in dosa i Ahas kon i Tuhan.

²³ Sia in nopoboditodon in awaknea bo rayatnea sin noposumbadon in kuruban kon dewa mita in intau in Siria inta ain nonaḷow kon inia. Pinikirnea, “Dewa mita in Siria ain notuḷung kon datu mita in Siria, dá aka akuoi in moposumba in kuruban kon i monia, dá tuḷunganneabí doman degá in akuoi.”

²⁴ Onda intua sia in nogamá kon bayongan in pakakat in Baḷoi Tuhan bo irimumud. Bo iḻingkopanneadon in Baḷoi Tuhan, bo pinosindogneadon in mezbah mita kon sinangkub in Yerusalem.

²⁵ Kon batúan in ḻipú bo kotá kon Yohuda noposindog in sia in tampat mita pososumbaan kon berhala sin potubaan kon dupa kon i dewa mita in bangusa ibanea. Aidnea tatua nokopomukádon kon torú i Tuhan, Allah in mogoguyangnea.

²⁶ Ouman ibanea kon pinomarentaannea bo bayongan in aidnea nongkon pinomangkoian nodapot in imbuitnea pinais kon bonu in buk Ouman in datu mita in Yohuda bo Israel.

²⁷ Ki Ahas in minatoi; bo iḷobong kon Yerusalem, táe deemanbí kon poḷoḷobongan in datu mita. Ki Hizkia ki adínea ḷoḷaki in nobaḻí datu nomaḷui kon inia.