TAWARIKH 2 26 - Alkitab Singog In Mongondow Masa In Tanaa

Ki Uzia datu in Yohuda

^1-3 Naonda in ki Amazia minatoi, bayongan in rayat Yohuda nomiḻí kon i Uzia ki adínea ḷoḷaki in nobaḻí datu. Kon dodai intua sia in umur mopuḷú bo onom notaong. Ki inánea in ki Yekholya, bobay in Yerusalem. Ki Uzia in nomarenta kon Yerusalem 52 notaong in koonggotnea. Siabí in nogagow bo noposindog bui in kotá in Elot.

⁴ Ná doman ki amánea, ki Uzia in nogaid doman kon inta mokosanang kon gina i Tuhan.

⁵ Ki Zakharia in mononongginanea. Kon bonu in ki Zakharia nobiagpa, ki Uzia in umuranbí nosatia in noibada kon i Tuhan dá binarakatan i Tuhan in sia.

⁶ Ki Uzia in noparang nonayow kon intau in Pilistin. Sia in norumbun kon dinding mita in kotá in Gad, Yabne, bo Asdod, bo noposindog in kotá mita inta dininding kon diug in Asdod bo kon butá ibanea kon Pilistin.

⁷ Ki Allah in notuḷung kon inia nonaḷow kon intau in Pilistin, bo intau in Arab inta nogutun kon Gur-Baal bo intau in Meunim.

⁸ Intau in Amon noguboḻi kon iba kon i Uzia. Kodugang-kodugangdon in kawasanea dá sia in ponango-nangoiandon nodapot in Mesir.

⁹ Sinbá moropot in kotá in Yerusalem, dá ki Uzia in noposindog in ḷangkeang kon Bonawang Sikunea, kon Bonawang in Ḷopá bo kon kinoboyukan in dinding.

¹⁰ Sia in noposindog doman in ḷangkeang mita inta dininding kon butá inta kon padang gurun, bo nongaḻi kon nobayong in parigí sin nobayong totok in bobiagonnea, pinomayá kon buḷud andeka kon ḷopá kon dotá in toyopan. Popisí in sia moibog moindoi kon ponononggobá, dá nopotabá in sia nokiaid kon nobayong in intau sinbá monoimbotú kon gobá mita in anggur kon buḷud, bo mononggobá kon butá mita inta mopia.

¹¹ Ki Uzia in kotontara mobayong inta umuran mosadia moparang. Mosia in kon bonu in pinonobatúan inta kobayong monia in pinais in momomais doyowa i datu inta ki Yeiel bo ki Maaseya kon bonu in tongganut i Hananya, tobatú in bobantung i datu.

^12-13 Bayongan in tontara mita tatua in 307.500 in tontara inta kon bonu in tongganut in 2.600 in porwira. Mosia komintan motaau totok moparang bo mobantung kon i datu monaḷow kon musung.

¹⁴ Ki Uzia in nonongkaaḷ kon tontaranea tatua takin nobogoi in kaḻeaw in pandong, sapoyo uwaja, ḷambung uatoi, ginubat bo piot, bo batu in popakot.

¹⁵ Kon Yerusalem intaunea mita inta motaau totok in sonjata ain nogaid kon pakakat inta motaau mopopiot in piotnea bo batu mita mongotoḻe nongkon bonu in ḷangkeang bo kon siku mita in kotá. Ki Uzia in ponango-nangoiandon kon bayongan tampat, bo sia in nobaḻídon totok in mokawasa sin ki Allah in totok notuḷung kon inia.

Ki Uzia ihukum sin mododia

¹⁶ Naonda in ki Datu Uzia noropot, nobaḻídon in sia mododia, bo tua in nokopopisí kon kinorimumudannea. Iḻimimpat in sia kon parenta i Tuhan Allahnea sin sinumuot kon Baḷoi Tuhan sin motubá kon dupa kon tudu in mezbah in dupa.

¹⁷ Táe ki Imang Azarya takin waḷu nopuḷú in imang ibanea inta mongoropot mita bo mobarani in dumudui kon inia

¹⁸ sin moḷawang kon aidnea tatua. Mosia in noguman, “Tuang Inta Momulia! Ki Tuang in diábí in hak motubá kon dupa kon i Tuhan. Tua in oaidanbí in imang mita buí i Harun, sin mosiabí inta ain sinantú kon mogaid kon tua. Ḷuaidon in ki Tuang nongkon tampat inta motusi tanaa! Ki Tuang ain noḷawang kon i Tuhan Allah bo diádon kinoibog-Nea.”

¹⁹ Kon dodai intua ki Uzia simindog mako kon diug in mezbah in dupa kon Baḷoi Tuhan kokada-kadai in pakakat pototubá kon dupa. Sinumorú in sia kon imang mita tatua, bo daḻídon nomuká in takit kuḻit inta mokoondok kon pogotnea.

²⁰ Ki Azarya bo imang mita ibanea inimindoi kon inia takin noitaḻikokog totok, bo nondodakdon kon inia sinbá monaḷámaidon in sia kon Baḷoi Tuhan. Iḻimikat in sia iḻumuai sin ki Tuhan in nohukumdon kon inia.

²¹ Nodapot in ki Datu Uzia minatoi takitnea tatua in diábí nopia-pia. Pinopoutundon in sia kon baḷoi tobatú bo diádon inogoi tumuot kon Baḷoi Tuhan. Iḷuatandon in sia nongkon oaidannea mita, bo ki Yotam ki adínea ḷoḷaki in nomarenta kon rayat nobaḻí oḻitnea.

²² Ouman ibanea kon pinomarentaan i Datu Uzia, pinaisdon i Nabi Yesaya ki adí i Amos.

²³ Kon dodai in minatoi, ki Uzia in iḷobong kon butá kon diug in poḷoḷobongan kon datu mita, táe deemanbí kon poḷoḷobongan tatua, sin sia in pinanyaki kuḻit inta mokoondok. Ki Yotam ki adínea ḷoḷaki in nobaḻí datu nomaḷui kon inia.