TAWARIKH 2 25 - Alkitab Singog In Mongondow Masa In Tanaa

Ki Amazia datu in Yohuda

¹ Ki Amazia nobaḻí datu kon dodai in umur doyowa nopuḷú bo ḻima notaong, bo sia in nomarenta kon Yerusalem doyowa nopuḷú bo siow notaong in koonggotnea. Ki inánea in ki Yoadan nongkon Yerusalem.

² Ki Amazia in nogaid kon onu inta nokosanang kon gina i Tuhan, táe diá takin ḻimbatú in gina.

³ Naonda in nobaḻídon noropot in ḷoḻitúannea, ihukumnea minatoi in pogawai mita inta noḻimod kon i amánea.

⁴ Táe ki adí mita in pogawai mita tatua in diábí iḻimodnea sin sia in dinumuduibí kon parenta i Tuhan kon bonu in Buk i Musa inta noguman, “Dika mohukum matoi kon guyanga popisí in aid moraat inta inaidan in adí mita monia, bo dika mohukum matoi kon adí mita popisí in aid moraat inta inaidan in guyanga monia. Batúan intau in tongábí motaau hukumon matoi popisí in aidnea tontaní inta moraat.”

Parang nonayow kon Edom

⁵ Ki Datu Amazia in nosipun kon bayongan in intau suku in Yohuda bo Benyamin bodongka nopotabá kon i monia sinimindog podudui in inanakan monia tontaní, kon bonu in tongganut in itoi in tontara toribu bo itoi in tontara mogatut. Onda intua nomiḻí in sia kon intau mita inta umur doyowa nopuḷú notaong bo namonik inta motaaudon moparang bo mopandoi mopomaké in pandong bo kaḻeaw. Kobayong monia in 300.000 in intau.

⁶ Koḻikud intua sia in nonondan kon 100.000 in tontara nongkon Israel takin tondan degá 3.400 nokilo in saḷaka.

⁷ Táe nabi tobatú in namangoi kon i datu bo noguman, “Dika pakéon in tontara mita in Israel tatua, sin ki Tuhan in diábí motuḷung kon intau mita in Israel inta nongkon Dodatuan in Utuan.

⁸ Táe aka ki Tuang momaké doman kon i monia, ki Allah in mopomayábí mako kon i Tuang taḷowon in musung umpakabí tontara i Tuang moropot bo mobarani. Sin tongábí ki Allah in kokawasa mobogoi in kauntungan andeka kotungkudan.”

⁹ “Dá naonda degá in bayongan saḷaka inta ain inogoiku kon i monia?” iḻibó i Amazia. Ki Nabi tatua in notubag, “Ki Tuhan in mokopobuibí kon i Tuang moiḻiu nongkon tua!”

¹⁰ Tuamai in ki Amazia nopoḷuatdon kon tontara mita inta sinondanan tatua bo nopotabá kon i monia nobui kon butá monia. Mosia in nobuidon doman, táe sinumorú totok.

¹¹ Ki Amazia in nokopobarani bo nodia kon tontaranea minayá in Ḷopá in Asin. Kon tua in mosia noparang poḷat noḻimod kon 10.000 in tontara in Edom.

¹² Mopuḷú noribu in intau ibanea in dinakop. Mosia in dinia kon tudu totok in buḷud batu kon kotá in Sela bodongka pinogambat monag dá minatoi.

¹³ Kon dodai intua tontara mita in Israel inta ain pinotabá pinoki pobuian i Amazia, bo diá inogoi noparang, nonubudon kon kotá mita in Yohuda inta kon sigad in Samaria bo Bet-Horon. Mosia in noḻimod kon 3.000 in intau poḷat nogagow kon nobayong in pakakat.

¹⁴ Naonda in nonaḷow kon tontara in Edom, ki Amazia in nodia nobui kon patong mita in berhala in intau in Edom bo inukatnea kon Yohuda. Bo notubá in sia kon dupa kon patong tatua bo nosumba.

¹⁵ Aidnea tatua nokopomuká kon torú i Tuhan. Nopotabá in Sia kon nabi tobatú minayá kon i Amazia. Nabi tatua in noguman, “Nongonu sin ki Tuang in nosumbabí kon dewa in bangusa ibanea inta diábí mokoposaḷamat kon bangusanea tontaní nongkon kawasa i Tuang?”

¹⁶ “Kibio-biómai,” guman i Amazia, “Aka diá, ḻimodon nami in iko! Diábí dodai in onda in kami noduí kon inimu nobaḻí monononggina i datu!” Dá kibio-biómaidon in nabi tatua, táe munadon in sia noguman, “Tanaa in kinotaauankudon kon ki Allah in nonantúdon kon moyopú kon i Tuang sin aid i Tuang tua, bo popisí in ki Tuang diá mopandungmai kon tongginaku.”

Yohuda noparang nonayow Israel

¹⁷ Ki Amazia datu in Yohuda takin mononongginanea nopopogdon monayow kon Israel. Nopotabá in sia in totabá kon i Yoas datu in Israel, ki adí i Yoahas, ki ompu i Yehu, sin monontot kon inia moparang.

¹⁸ Táe ki Datu Yoas in nokidia in tubag nanaa, “Kon singgai tobatú bo bonganga kon buḷud in Libanon nokidia in tuntutan tanaa kon pangkoi in ḷokuyú, ‘Ei pangkoi in ḷokuyú, ogoidon in ki adímu bobay kon i adíku sin baḻíon ki buḷoinea.’ Táe noiduduimai kon tua noitaḻibdon kon tua in mahaḷuk in kayuon tobatú bo noritak kon bo bonganga tatua.

¹⁹ Iko, Amazia, mongambungangaḷ kon iko in nonaḷowdon kon intau in Edom, táe maníka iko in mogutundon kon baḷoi. Onubí in mangaḻenea in motayak kon anib inta mokobodito kon inimu tontaní bo rayatmu?”

²⁰ Táe ki Amazia, datu in Yohuda in diábí nopandungmai kon singog i Yoas datu in Israel. Bo ki Allah in noibog bidon sinbá ki Amazia in taḷowondon sin sia in nosumbadon kon patong berhala in intau in Edom.

²¹ Tuamai in ki Yoas nobuatdon takin intaunea mita minayá in Bet-Semes bo noparang nonayow kon i Amazia kon tua.

²² Tontara in Yohuda sinaḷow bo bayongan in tontaranea noḷagui nobui kon baḷoinea-baḷoinea.

²³ Ki Yoas in nodomok kon i Amazia bo dinia kon Yerusalem, bo nogumpag kon dinding in kotá tatua inta degá doyowamai nogatut nometer, pinangkoi nongkon Bonawang in Epraim nodapot in Bonawang Sikunea.

²⁴ Komintan buḷawan bo saḷaka takin bayongan in pakakat inta nouḻínea kon Baḷoi Tuhan bo inta kon bonu in totaau i Obed-Edom, bo bayongan doman kapunyaan in komaḻig, takin tongonumai in intau mita inta sinokodakop in inakut i Yoas pinobayá in Samaria.

²⁵ Naonda in ki Yoas datu in Israel minatoi, ki Amazia in nobiagpa mopuḷú bo ḻima notaong.

^26-28 Pinangkoi kon ki Amazia nonaḷámai kon i Tuhan, intau in noyopopogdon noḷawang kon inia kon Yerusalem. Tuamai, noḷagui in sia kon kotá in Lakhis, táe musungnea mita nogaḷow kon inia kon tua bo noḻimod kon inia. Mayatnea in pinopodatog kon kabaḷo dinia minayá in Yerusalem, bo iḷobong kon poḷoḷobongan kon datu mita kon Kotá i Daud. Ouman ibanea kon i Datu Amazia nongkon pinomangkoianmai nodapot in imbuit in pinomarentaannea in pinais kon bonu in buk Ouman in Datu mita in Yohuda bo Israel.