TAWARIKH 2 24 - Alkitab Singog In Mongondow Masa In Tanaa

Ki Yoas datu in Yohuda

¹ Ki Yoas umur pitu notaong kon dodai in sia nobaḻí datu in Yohuda, bo sia in nomarenta kon Yerusalem opat nopuḷú notaong in koonggotnea. Ki inánea in ki Zibya nongkon kotá in Bersyeba.

² Kon tungkuḷ in ki Imang Yoyada nobiagpa, ki Yoas in nogaid kon onu inta mokosanang kon gina i Tuhan.

³ Ki Yoyada in nomiḻí kon bobay doyowa sin baḻíon ki buḷoi i Yoas, bo nongkon inayadua tua ki Yoas in nokouḻí kon adí mita ḷoḷaki bo bobay.

⁴ Naonda in nomarenta noḻin onggotdon, ki Yoas in nonantúdon kon monompiadon kon Baḷoi Tuhan.

⁵ Imang mita bo intau in Lewi pinarentaannea mayá mokipodungkuḷ kon intau mita inta nogutun kon kotá mita in Yohuda bo nosipun kon doit nongkon bayongan in rayat sin ponompia kon Baḷoi Tuhan muḷoi in taong. Pinotabánea in mosia sinbá ḷagi monompia kon tua, táe intau mita in Lewi ḷumaḷoibí.

⁶ Tuamai nogoiní in sia kon i Imang Yoyada, itoi monia, bo noguman, “Ki Musa mogogundoi i Tuhan in nopotabádon kon rayat moguboḻi kon pajak sin ponompia kon Ḷoḷaigan i Tuhan, dá tanaa in nongonu sin intau mita in Lewi tatua in diábí dodakan i Amá mosipun kon pajak nongkon rayat kon Yohuda bo Yerusalem?” (

⁷ Dumodudui mita i Atalya, bobay moraat tatua, nomoguyaatdon kon Baḷoi Tuhan, bo nobayong in pakakat mita inta ain sinantú kon i Allah in pinaké monia sin mosumba kon i Baal.)

⁸ Dá ki datu in nomarenta sinbá intau mita in Lewi momia kon kas in doit bo ukaton kon tayowon in bonawang in Baḷoi Tuhan.

⁹ Kon sinangkub in Yerusalem bo Yohuda pinobaḷúdon kon bayongan in intau musti modia kon pajak kon i Tuhan, ná inta sinantú i Musa.

¹⁰ Onu inta pinobaḷú tua in mokosanang kon gina in rayat bo itoi mita monia. Moyota-yotakin in mosia mopobonu in doit in pajak monia kon bonu in kas tatua.

¹¹ Pomuḷoi in singgai kas tatua diaan in intau mita in Lewi kon pogawai i datu sin pirikisaan. Aka kas tatua bo mopuḻingdon momomais in negara bo toḻindua in Imang Moḷoben mopoḷuai in doit bo kas tatua in pobuiondon kon tampat inta pototaguanmai. Natua in inaidan monia muḷoi in singgai, bo nobayong totok in doit in nosipun magí.

¹² Onda intua ki datu bo ki Yoyada nobogoi in doit tatua kon intau mita inta nobaḻí tongguḷu kon ponompiaan kon Baḷoi Tuhan tatua. Bo intau mita tatua nonondan kon intau mita inta mogogaid kon pondasi, mogogimok kon kayu bo inta momia kon logam sin mogaid kon oaidan tatua.

¹³ Dá nomangkoidon in mogogimok mita tatua nonompia kon Baḷoi Tuhan tatua. Mosia komintan in nogaid natua dá imbuitnea baḷoi tatua noroton bo nopiradon ná muna.

¹⁴ Naonda in oaidan tatua nopaḷut, buḷawan bo saḷaka inta ḻiunea kon tua in inogoi kon i datu bo kon i Yoyada. Bo buḷawan bo saḷaka tatua pinaké pinogaid kon pakakat mita in Baḷoi Tuhan, kon sigadnea: pakakat mita inta pakéon kon upacara ibada, pakéon kon kuruban payongon, pindan mita inta potuduan kon dupa, bo palo mita. Kon bonu in nobiagpa in ki Imang Yoyada, kuruban payongon tantúbí pinosumba kon Baḷoi Tuhan.

Aid mita mopia i Yoyada diádon pinandungmai

¹⁵ Ki Yoyada in noumur in kinobiagannea bo minatoi kon dodai in umur mogatut bo toḷu nopuḷú notaong.

¹⁶ Iḷobong in sia kon poḷoḷobongan kon datu mita kon Kotá i Daud sin mohoromat kon onu mita inta ain inaidannea kon i Allah, kon Baḷoi Tuhan bo kon umat in Israel.

¹⁷ Naonda in ki Yoyada minatoi, ki Yoas in dinondouḷugan bo inanutan in itoi mita in Yohuda nodapot in sia diádon nopandungmai kon totundú i Yoyada.

¹⁸ Dá rayat in diádon noibada kon Baḷoi Tuhan, Allah in mogoguyang monia, táe nosumbadon kon berhala bo patong mita i Dewa Asyera. Dosa monia tatua nokopopisídon kon ki Tuhan sinumorú kon Yohuda bo kon Yerusalem.

¹⁹ Ki Tuhan nopotabá in nabi mita sin monoboḷow kon i monia sinbá buidon mogundoi kon i Tuhan, táe rayat in doíbí mokidongog.

²⁰ Bo Roho i Allah in nongawasa kon i Zakharia ki adí i Imang Yoyada. Ki Zakharia in sinimindog kon tayowon in rayat bo nomaḷú, “Ki Tuhan Allah in noguman, ‘Nongonu sin moiko in diábí motoindudui kon parenta-Ku mita bo mopoboditobí in awakmu tontaní. Moiko in diábí mopandungmai kon i-Nakó, dá Akuoi in diábí domandon mopandungmai kon i monimu!’ ”

^21-22 Táe rayat in noyopopogdon momayow kon i Zakharia, bo ki Datu Yoas in dinumudui kon pinoyopopogan tatua. Diá bidon kinotoropannea in onu inta inaidan bo kotoindudui i Yoyada, ki amá i Zakharia. Pinodoyon kon parenta i datu, ki Zakharia in inandur in batu nodapot in minatoi kon bosí in Baḷoi Tuhan. Kon dodai in matoidon, ki Zakharia in nomaḷú, “Igumon mako indoian i Tuhan in aidmu tanaa bo motuḻí.”

Imbuit in pinomarentaan i Yoas

²³ Taong doman tatua, kon pinoyoḻimbanan in sempo, tontara in Siria nonubu kon Yohuda bo Yerusalem. Mosia in noḻimod kon bayongan in itoi bo nogakut kon nobayong in pakakat inta inagow pinobayá in Damsyik.

²⁴ Tontara in Siria in tongábí topiḻik, táe pinomayádon mako i Tuhan in mosia nonaḷow kon tontara in Yohuda inta mobaro-barong tua, sin intau in Yohuda diá mopandungmai kon i Tuhan Allah in mogoguyang monia. Natua in pinohohukum i Tuhan kon i Datu Yoas.

²⁵ Ki Yoas in pinaḻían nodaḷom. Naonda in minayá mako in tontara in musung, pogawainea taya dua in noyopopog. Mosia in noḻimod kon inia kon tosiugannea nobaḻí tontuḻí in pinoḻimodan kon i adí i Imang Yoyada. Ki Datu Yoas in iḷobong kon Kotá i Daud, táe deemanbí kon poḷoḷobongan in datu mita. (

²⁶ Intau mita inta noyopopog moḷawang kon inia in ki Zabad ki adí i Simeat bobay in Amon, bo ki Yozabad ki adí i Simrit bobay in Moab.)

²⁷ Ouman in soaḷ ki adí mita i Yoas bo soaḷ toḻindap mita inta diá mopia soaḷ sia, bo naonda in sia nonompia kon Baḷoi Tuhan, tua komintan in pinaisdon kon bonu in buk Pinoginsilangan kon Buk in Datu mita. Ki Amazia, ki adí ḷoḷaki i Yoas, nobaḻí datu nonoḻiu kon i amánea.