TAWARIKH 2 23 - Alkitab Singog In Mongondow Masa In Tanaa

Pinomarontakan noḷawang kon i Atalya

¹ Kon taong impitunea ki Imang Yoyada in nonantúdon kon oyúon in aidannea. Noyosingogdon in sia takin in porwira taya ḻima, ki Azarya ki adí i Yeroham, ki Ismael ki adí Yohanan, ki Azarya ki adí i Obed, ki Maaseya ki adí i Adaya, bo ki Elisapat ki adí i Zikhri.

² Minayá in mosia in kotá in Yohuda, bo nosipun kon intau mita in Lewi bo bayongan in tongguḷu in inanakan, bo nodia kon i monia minayá in Yerusalem.

³ Mosia in noyosipun kon Baḷoi Tuhan, bo nogaid kon dodandian takin i Yoas, ki adí ḷoḷaki i datu tua. Ki Yoyada in noguman kon i monia, “Naadon in ki adí i Datu Ahazia inta ain minatoi! Tanaaya mustibí in sia moponik kon ḷoḻitúan in datu, sin ki Tuhan in nodandidon kon buí i Datu Daud in umuranbí momarenta.

⁴ Naa in musti aidan naton: Aka imang mita bo intau mita in Lewi mopaḷutdon mopobayá in oaidan monia kon singgai in Sabat, mosia in diápabí motaau mobui. Silaion toḷu bo tongosilai nongkon i monia in musti tumakin moḷukad kon bonawang mita in Baḷoi Tuhan,

⁵ tongosilai doman in kon komaḻig i datu, bo kiagatnea in kon Bonawang inta kon omonagan. Bayongan in rayat in mustibí mosipun kon bosí in Baḷoi Tuhan.

⁶ Diábí tobatúmai in motaau tumuot kon Baḷoi Tuhan koḻikudbí in imang mita bo intau mita in Lewi inta koyogot in mopobayá in oaidan. Mosia in motaau tumuot sin mosia in sinondídon kon mogaid kon oaidan i Tuhan. Intau mita ibanea in mustibí motoindudui kon atorang i Tuhan bo mogutun kon ḷuai.

⁷ Intau mita in Lewi mustibí simindog kon ḻibumai in datu kokada-kadai in pitow bo moḷukad kon inia kon ondaka in bayáannea. Ki ine in moḷongasi tumuot kon Baḷoi Tuhan, musti ḻimodon.”

⁸ Parenta i Yoyada tatua inaidan in intau mita in Lewi bo rayat in Yohuda. Intau mita inta noiḷuatdon kon oaidan kon singgai in Sabat diápa inogoi nobui. Dá bayongan in porwira motaau mopotabá in intau pinomayá inta noiḷuat kon oaidan andeka inta mosia inta bagupa sinumuot sin mopobayá in oaidan monia.

⁹ Ki Yoyada in nosilai kon porwira mita tatua in pandong bo kaḻeaw kapunyaan i Datu Daud inta sinagú kon Baḷoi Tuhan.

¹⁰ Ki Yoyada in nokiḷukad doman kon intau mita inta kokada-kadai in pitow kon dotá in muna in Baḷoi Tuhan sin moḷukad kon i datu.

¹¹ Nopaḷut mako kon tua ki Yoyada in nodia kon i Yoas iḻumuai, bo nopopaké in sapoyo in datu kon uḷunea, bo nobogoi kon inia in buk Hukum i Allah. Natuata in pinoduían kon i Yoas nobaḻí datu. Onda intua ki Imang Yoyada takin adínea mita nopobutak in ḷana upacara pinoduían kon i Yoas, bo bayongan in intau komintan nomaḷú “Mobiag datu!”

¹² Ki Atalya in nokodongogdon kon rayat norogiow noduímai kon i datu. Iḻimikat in sia minayá in Baḷoi Tuhan inta pinosipunan in intau mobayong.

¹³ Inontongnea in datu inta mobagu tatua sinimindog kon ngara tumuot kon Baḷoi Tuhan, kon tampat inta pinoduían kon inia, iḻibu in porwira mita bo intau inta mogogirup kon torompet. Bayongan in rayat norogiow nopia-pia in gina poḷat doman nogirup kon torompet, bo intau mita inta mogogogitog in musik kon Baḷoi Tuhan dinumudui doman noginrame kon pinoramean tatua takin nopomaké in pakakat mita in musik monia. Takin sakí in gina ki Atalya nomerak kon ḷambungnea bo nomaḷú, “Bangkang! Bangkang!”

¹⁴ Ki Yoyada in diábí nobogoi kon i Atalya tua in ḻimodon kon diugmai in Baḷoi Tuhan, dá noguman in sia kon porwira mita, “Diadon in sia kon ḷuai pongin pipidan in moḷoḷukad, bo ḻimod in ki inekabí in moḷongasi moposaḷamat kon inia.”

¹⁵ Mosia nodomok kon inia, bo dinia kon komaḻig. Kon tua iḻimod in sia kon Bonawang Kabaḷo.

Ki Yoyada nonoimbagu

¹⁶ Ki Imang Yoyada in nonongganut kon i Datu Yoas bo rayat moyotakinnea mogaid kon dodandian kon mosia in mobaḻíbí umat i Tuhan.

¹⁷ Nopaḷut mako kon tua mosia komintan in nonubu bo nogumpag kon kuil i Baal. Mezbah takin patongnea mita in irimumud, bo ki Matan, Imang in Baal iḻimod kon tayowon in mezbah mita tatua.

¹⁸ Bo ki Yoyada in nopotabá kon imang mita bo intau in Lewi moindoi kon oaidan kon Baḷoi Tuhan podudui in tonsilai in oaidan inta ain sinantú i Datu Daud. Mosia in mustibí moposumba in kuruban payongon kon i Tuhan – podudui in hukum mita i Musa – pongin porayaan takin dondong mita ná inta ain sinantú i Daud.

¹⁹ Kon bonawang mita in Baḷoi Tuhan, ki Yoyada in nokiḷukadon kon moḷoḷukad sin moḷukad sinbá intau inta diá patus mosumba kon i Tuhan in diá tumuot.

²⁰ Porwira mita, bo intau mita inta sinon itoi kon ḻipú, intau mita moḷoben in pomarenta, bo bayongan rayat in dinumudui kon i Yoyada nodia kon i Datu Yoas nongkon Baḷoi Tuhan nopobayá in komaḻig. Mosia in sinumuot nongkon bonawang totokanea bo ki datu in iḻimitú kon ḷoḻitúan in datu.

²¹ Bayongan in rayat nopia in gina, bo kotá in noamandon bo ki Atalya in iḻimodon.