TAWARIKH 2 20 - Alkitab Singog In Mongondow Masa In Tanaa

Parang nonayow kon Edom

¹ Noiduduimai kon tua tontara in Moab bo Amon, noyotakin in yobayat monia inta tontara in Meunim, nonubu kon Yohuda.

² Dá namangoidon in intau nodia kon habar tanaa kon i Datu Yosapat, “Nobayong totok in tontara in Edom in namangoi nongkon ḷoḷan in Laut Mati sin monubu kon i Tuang. Mosia in nogagowdon kon Hazezon-Tamar.” (Hazezon-Tamar in tangoi ibanea in En-Gedi.)

³ Noondok in ki Yosapat bo nosambayang in sia nopoigum in totundú i Tuhan. Onda intua sia in nomarenta sinbá bayongan in rayat mopuasa.

⁴ Nongkon batúan in kotá kon Yohuda intau mayá in Yerusalem sin mopoigum in totuḷung i Tuhan.

⁵ Mosia takin in intau inta nogutun kon Yerusalem noyosipun kon bosimai inta mobagu kon Baḷoi Tuhan. Ki Datu Yosapat in sinimindog kon tayowon monia,

⁶ bo nosambayang noropot, “Oo Tuhan, Allah in mogoguyang nami! Iko in ki Allah inta kon soroga bo inta nomarenta kon bayongan in bangusa kon dunia. Iko in mokawasa bo moropot; diábí in tobatúmai in mokoḷawang kon ini-Mu.

⁷ Ikobí in ki Allah nami. Kon tungkuḷ in umat-Mu, bangusa in Israel, namangoi kon butá tanaa, Iko nopoguntun kon intau mita inta kon dodai intua nogutun kon naa. Bo Iko in nobogoi kon butá tanaa kon buí i Abraham, yobayat-Mu, sin mobaḻí butá kapunyaan monia modapot in mononoi.

⁸ Mosia in nogutundon kon naa bo noposindogdon in baḷoi tobatú tampat posumbaan kon ini-Mu. Kinotaauan monia

⁹ kon aka mosia in hukumon popisí in dosa mita monia, bo mosia in koantugan in parang, yampoi in takit, andeka malarat in gogoy, mosia in motaaubí mamangoi kon ini-Mu bo simindog kon tayowon in baḷoi pooibadaan tanaa. Kon bonu in roriga monia, mosia in motaaubí mosambayang kon ini-Mu, bo indongogan-Mubí poḷat motuḷung kon i monia.

¹⁰ Tanaaya bangusa in Amon, Moab bo Edom monubu kon inami. Kon tungkuḷ in mogoguyang nami namangoi nongkon Mesir, diábí inogoi-Mu in mosia in mogutun kon butá in bangusa mita tatua. Dá mogoguyang nami nogamá kon daḷan iḻimibu bo diábí nomoguyaat kon bangusa in Amon, Moab bo Edom tatua.

¹¹ Tanaa, nanaabí in aid in bangusa mita tatua kon inami. Moibogbí in mosia mopoguntun kon inami nongkon butá inta inogoi-Mu kon inami.

¹² Ikobí in ki Allah nami! Hukumdon in mosia, sin kami in diádon mokopongonu in monayow kon tontara inta mobayong tatua, inta monubu kon inami. Diábí kotaauan nami mongo onupa in pomiaan nami, tuamai in mamangoi in kami kon ini-Mu mokituḷung.”

¹³ Kon dodai intua bayongan in ḷoḷaki in Yohuda takin buḷoi bo adí monia sinimindog kon Baḷoi Tuhan.

¹⁴ Kon yua-yuak in intau mobayong tatua oyúon in intau in Lewi tobatú tangoinea in ki Yahaziel. Sia in ki adí i Zakharia nongkon inanakan i Azap inta kon bonu in buí i Benaya, i Yeiel, i Matanya. Kon dodai intua ki Yahaziel kinawasa in Roho i Tuhan,

¹⁵ bo noguman in sia, “Tuang inta momulia takin bayongan utat mita. Ki Tuhan in noguman kon moiko in dikabí kobuḻian in kamang andeka moondok in monayow kon tontara inta mobayong tatua. Sin deemanbí moiko in moparang táe ki Allahbí.

¹⁶ Ikoḷom kon tungkuḷ in mosia motakod mongin daḷan inta motakod kon Zis, tubudon in mosia. Moiko in moyogintayowbí monia kon popod in ḷopá kon tayowon in padang gurun kon diug in Yeruel.

¹⁷ Moiko in diá bidon paraḷu moropatoi kon bonu in parang tanaa. Bayádon kon tampat inta ain sinantú kon inimu bo oḷatdon kon tua. Moiko in mokoontongbí kon ki Tuhan in mobogoi in kauntungan kon i monimu. Ei intau in Yohuda bo Yerusalem, dikadon moḻia-ḻiaw in gina andeka moondok. Bayádon kon parang tatua, ki Tuhan in motuḷungbí kon i monimu!”

¹⁸ Dá sinumungkudon in ki Datu Yosapat. Bayongan in rayat dinumudui doman kon inia sinumungkud nosumba kon i Tuhan.

¹⁹ Bo intau mita in Lewi nongkon inanakan i Kehat bo i Korah sinimindog, bo nodayow kon i Tuhan, Allah in Israel.

²⁰ Nopoikoḷomai kon singgai, subupa totok, rayat iḻumuai bo minayá in butá kon padang gurun kon diug in Tekoa. Kon dodai in mosia mobuatdon, ki Yosapat nobogoi in koyow tanaa kon i monia, “Rayat in Yohuda bo Yerusalem! Popirisayabí kon i Tuhan Allahmu, dá mokotongodbí in moiko. Tarimadon in tonggina mita in nabimu mita, dá kodapotanbí monimu in sinayak monimu!”

²¹ Naonda in noyosingog mako in rayat, ki datu nopotabá in mododondong mita nogiḷambung in ḷambung monia inta biasamai pakéon kon upacara mita inta ain sinantú kon agama. Mododondong mita tatua in mustibí mopipid takin ḷunganga in gina kon tayowon in pipidan in tontara sindaḷan modondong, “Dayowdon in ki Tuhan! Tabi-Nea in umuran mononoi!”

²² Kon tungkuḷ in mododondong tatua momangkoidon modondong, ki Tuhan in mopotombaukdon kon yua-yuak in tontara in musung inta koyogot in monubu.

²³ Tontara in Amon bo Moab in monubu kon tontara in Edom bo morimumudon kon i monia komintan. Onda intua mosia momurow bo mositubuan totok.

²⁴ Naonda in tontara in Yohuda nodapot kon ḷangkeang poḷoḷukadan kon padang gurun bo monaridimai kon tampat in musung, nokoontong in mosia kon mayat mita in musung noiukat mako kon butá. Diábí tobatúmai in tontara in musung tatua in nobiag.

²⁵ Dá ki Yosapat takin intaunea mita minayá nogagow kon pakakat mita in musung. Nokouḻí in mosia kon bobiagon mobayong, bo touḷut mita, ḷambung, bo pakakat mita inta koboḻi ibanea. Nopaḷut mako nosipun kon pakakat mita tatua toḷu nosinggai in koonggotnea, nobayongpa doman in pakakat mita ibanea, dá pakisadon sinaḷáanmai.

²⁶ Kon singgai noginggopat nosipun komintan in mosia kon Ḷopá in Dodayow bo nodayow kon i Tuhan kon bayongan inta ain inaidan-Nea. Manangka intua ḷopá tatua sinangoiandon “Dodayow”.

²⁷ Bo ki Yosapat nonongganut kon bayongan in tontara nobui kon Yerusalem takin ḷunganga in gina sin ki Tuhan in nonaḷowdon kon bayongan in musung monia.

²⁸ Naonda in nodapot kon kotá, mosia in nopipid nopobayá in Baḷoi Tuhan sinakinan in kecapi bo torompet.

²⁹ Bayongan in bangusa ibanea noondokdon naonda in nokodongog kon naonda in ki Tuhan nonaḷow kon musung mita in Israel.

³⁰ Tuamai in ki Yosapat nomarenta takin pia, bo ki Tuhan in nobogoi kon inia in kaadaan dame kon bayongan in butá.

Imbuit in pinomarentaan i Yosapat

³¹ Ki Yosapat in nobaḻí datu in Yohuda kon dodai in umur toḷu nopuḷú bo ḻima notaong, bo nomarenta in sia kon Yerusalem doyowa nopuḷú bo ḻima notaong in koonggotnea. Ki inánea in ki Azuba ki adí i Zilhi.

³² Naonda bo ki Asa ki amánea, ki Yosapat nogaid kon onu inta mopia kon tayowon i Tuhan.

³³ Táe tampat pososumbaan kon berhala diábí irimumudnea. Rayat in diápabí doman takin ḻimbatú in gina in noibada kon i Allah in mogoguyang monia.

³⁴ Ouman ibanea kon i Yosapat, nongkon pinomangkoian nodapot in buit in pinomarentaannea in pinais kon bonu in Ouman i Yehu adí i Hanani, inta pinais kon bonu in buk Ouman in datu mita in Israel.

³⁵ Kon singgai tobatú ki Yosapat datu in Yohuda nomia kon yoyobayatan takin i Ahazia datu in Israel, inta nogaid kon nobayong in aid moraat.

³⁶ Kon totubuan in kapaḷ Ezion-Geber nomia in mosia kon kapaḷ mita sin pakéon ḷumeag mayá in Tarsis.

³⁷ Táe ki Nabi Eleazer ki adí i Dodawa nongkon kotá in Maresa nobogoi in tompoingat kon i Yosapat, kainia, “Popisí in ki Tuang nomiadon kon yoyobayatan takin i Ahazia, ki Tuhan in morimumudbí kon oaidan i Tuang.” Dá norimumudon in kapaḷ mita inta ain pinomianea dá beresidon diá notaau iḷumeag.