TAWARIKH 2 2 - Alkitab Singog In Mongondow Masa In Tanaa

Noposadia kon moposindog in Baḷoi Tuhan

¹ Ki Datu Salomo ain nonantú kon moposindog in Baḷoi Tuhan, bo komaḻignea.

² Kon oaidan tatua sia in nopotabádon kon 70.000 in intau in mogakut kon pakakat mita in bangunan, 80.000 in intau in mongurig kon batu kon buḷud bo 3.600 in mandor sin moḷukad kon oaidan tatua.

³ Ki Salomo in nokidia in habar tanaa kon i Hiram datu in Tirus, “Poigumonku sinbá ki Tuang momia kon dodandian in totaḷuian takinku naonda bo kon i Daud ki amáku. Ki Tuang ain nopotaḷui kon inia in ḷokuyú in Libanon sin poposindogan in komaḻignea.

⁴ Tanaa moibog in akuoi moposindog in baḷoi poibadaan tobatú inta ain sinantú kon pohoromatan kon i Tuhan Allahku. Kon baḷoi tatua akuoi bo rayatku in moibada kon i-Nia takin motubá kon dupa inta mongo bo mongobondu, bo moposumba in roti oḷudon kon inia mokopotantú. Kon baḷoi doman tatua moposumbadon in kami in kuruban payongon muḷoi in doḷo-doḷom bo doḷom, muḷoi in singgai in Sabat, singgai moḷoben Buḷan Mobagu bo singgai mita inta ain sinantú sin mohoromat kon i Tuhan Allah nami. Sin, Sia in nomarentadon sinbá tua in umuran pomiaan in intau Israel modapot in kopaḷutannea.

⁵ Ibogonku sinbá Baḷoi Tuhan inta bain posindogonku tatua mobaḻí baḷoi inta momulia, sin ki Allah nami in momuli-mulia nongkon ilah mita inta taondaka.

⁶ Táe sabanarnea in diábí tobatúmai in intau in mokotongod in moposindog in baḷoi kon i Allah, sin bayongan in toḷungayá naa in diá tugat in ḷobennea pobaḷoian sin pogutunan-Nea. Dá Baḷoi Tuhan inta koposindoganku naa in diá bo diá in tongábí tampat pototubáan kon dupa kon i Allah!

⁷ Tuamai, poigumonku in ki Tuang mopotabá mamangoi kon inami in intau tobatú inta mopandoi mongurig bo motaau momia kon ḷambá nongkon buḷawan, saḷaka, bitú, uatoi bo mopandoi doman momia kon didit nobidu, nokasumba bo nopura. Sia in mogaidon moyotakin in mogogimok mita kon Yohuda bo kon Yerusalem inta ain piniḻí i amáku ki Daud.

⁸ Kinotaauankubí kon intau mita inta mononaḷun kon kayu kon butá i Tuang in mopandoi momupuḷ kon kayu, tuamai in poigumonku ki Tuang in moibogpa mokidia mangoi kon inakó in noyagi-yagimai in kayu ḷokuyú bo kayu sondana nongkon Libanon. Bain akuoi mopotabá kon intauku mita sin motuḷung kon intau mita i Tuang,

⁹ sinbá moposadia in mosia kon kayu inta mobarong totok. Sin Baḷoi Tuhan inta bain posindogonku tua in mustibí moḷoben bo mogaga totok.

¹⁰ Bo mobaḻí tongkaaḷ kon intau mita i Tuang tua in pokidiakudon mangoi kon i Tuang in gandum inta doyowa norupa, kon batúannea in tumongo 2.000 noton, anggur in 400.000 noliter bo ḷana in zaitun in 400.000 noliter.”

¹¹ Nobaḻí tubag in surat i Datu Salomo tatua, ki Datu Hiram in nokidia doman in surat inta nanaa in singognea, “Popisí in ki Tuhan notabi kon umat-Nea, dá sia in noduídon kon i Tuang nobaḻí datu monia.

¹² Dinayo-dayowdon in ki Tuhan Allah in Israel, Inta Nomia kon ḷangit bo butá! Sia in nobogoidon kon i Daud in adí ḷoḷaki inta totuu mobijaksana bo mopandoi, bo kototaau moḷoben, inta tanaa in koyogot in moḷongasi moposindog in baḷoi tobatú kon i Tuhan bo komaḻig tobatú kon inia tontaní.

¹³ Tanaaya akuoi in nokidia kon i Tuang in intau tobatú inta totok in monotaau in oaidan bo mopia in pogogaidnea, tangoinea in ki Huram.

¹⁴ Ki inánea in nongkon suku Dan, ki amánea intau in Tirus. Sia in mopandoi momia kon pakakat mita nongkon buḷawan, saḷaka, bitú, uatoi, batu bo kayu. Sia in motaau doman momia kon didit nobidu, nokasumba, nopura, bo didit doman lenan. Bayongan oaidan mongurig motaaubí pomiaannea podudui in batangan in onuka in poigumon. Mopiadon sia in pokiaidandon moyotakin in mogogimok mita i Tuang, bo takin intau mita inta ain nogaid kon kopontingan i Datu Daud amá i Tuang.

¹⁵ Kami in mogoḷat mako kon gandum doyowa norupa, anggur bo ḷana zaitun inta pinodandi i Tuang pokidia mangoi tua.

¹⁶ Kami in momupuḷbí kon kayu ḷokuyú nongkon buḷud in Libanon ná kobayong inta paraḷuon i Tuang, bo togoton tonggakiton, bo iḻigon pongin dagat modapot in Yope. Nongkon tua motaaudon akuton i Tuang diaan mayá in Yerusalem.”

Nomangkoidon noposindog in Baḷoi Tuhan

¹⁷ Ki Datu Salomo in nogiap kon bayongan intau ango-angoi inta nogutun kon Israel, ná inta nokoimontandon inaidan i Datu Daud ki amánea. Noniata magí yo 153.600 in intau ango-angoi.

¹⁸ Pitu nopuḷú noribu nongkon i monia in pinoki akutannea in imok pobaḷoi, 80.000 intau in mongurig kon batu kon buḷud, bo 3.600 in moindoi bo kitogi totaau kon oaidan tatua.