TAWARIKH 2 19 - Alkitab Singog In Mongondow Masa In Tanaa

Ki Yosapat sinoboḷow in nabi tobatú

¹ Naonda in ki Yosapat datu in Yohuda nobui takin pia-pia kon komaḻignea kon Yerusalem,

² nabi tobatú inta ki Yehu in tangoinea ki adí i Hanani namangoi kon tayowon i datu. Nabi tatua noguman kon inia, “Degá patus in ki Tuang datu motuḷung kon intau moraat bo momihak kon intau inta mondoí kon i Tuhan? Oaid i Tuang tatua in nokopopisídon ki Tuhan sinumorú kon i Tuang.

³ Umpaka natua táe oyúonpabí in mopia kon i Tuang. Ki Tuang in noḷumbúdon kon bayongan in patong i Dewi Asyera inta sinumba in rayat bo ki Tuang in noḷongasidon nobiag podudui in ibog i Allah.”

Ki Yosapat nonoimbagu

⁴ Ki Yosapat in nogutun kon Yerusalem. Táe sia in mokakitbí in mayá moindoi kon rayatnea kon bayongan in butá sin monongganut kon i monia mobui mangoi kon i Tuhan, Allah in mogoguyang monia.

⁵ Kon batúan in kotá inta oyúon in poḷoḷukadan kon Yohuda noduí in sia kon hakim mita,

⁶ bo nobogoi in parenta tanaa kon i monia, “Pokobijaksana, sin moiko in mohakim deemanbí pinodoyon kon tangoi in intau, táe pinodoyonbí kon tangoi Tuhan. Inindoian-Neabí in moiko kon dodai in monantú kon pelekara.

⁷ Moiko in mustibí motoguondok kon i Tuhan, bo mokopopia in mopobayá, sin ki Tuhan Allah naton in doíbí kon intau mita inta diá moadil, inta mobogat kon toḷosi andeka inta motarima kon bogoi pomompon kon bibig.”

⁸ Kon Yerusalem doman, ki Yosapat noduí kon hakim mita nongkon intau mita in Lewi, imang doman mita, bo intau mita inta sinon itoi kon rayat. Mosia in mustibí mopoyotutui in pelekara mita inta ḻimimpat kon Hukum i Tuhan bo pelekara mita ibanea.

⁹ Ki Yosapat in nobogoi kon hakim mita tatua in parenta tanaa, “Pobayá in oaidanmu takin pirisaya kon i Tuhan. Duduiai in parenta-Nea kon bayongan onu in aidan monimu.

¹⁰ Aka yobayatmu mita nongkon kotá ibanea nodia mangoi kon inimu in pelekara pinoḻimodan, iḻimimpat kon hukum andeka iḻimimpat kon undang-undang, yo moiko in mustibí mobogoi in topotundú kon i monia. Sinbá diá in mosia moitaḷá kon i Tuhan, bo ki Tuhan in diá tumorú kon inimu andeka kon i monia. Aidai in parenta tanaa, dá moiko in diábí moitaḷá.

¹¹ Ki Imang Moḷoben ki Amarya inogoianku in kawasa moḷantud kon bayongan in pelekara soaḷ hukum mita in agama. Ki Zebaja ki adí i Ismael, inta ki gubernur in Yohuda, inogoianku in kawasa moḷantud kon bayongan in pelekara ibanea. Intau mita in Lewi in kitogi totaau moḷukad sinbá kaputusan mita in pongadilan in aidan. Duduiai in topotundú mita tanaa bo aidai intua totu-totuu. Igumon mako ki Tuhan kotaki-takin in intau inta moadil!”