TAWARIKH 2 17 - Alkitab Singog In Mongondow Masa In Tanaa

Ki Yosapat nobaḻí datu

¹ Ki Yosapat nobaḻí datu in Yohuda nonoḻiu kon i Asa ki amánea, bo noginropot sin monayow kon Israel.

² Sinampatneadon in tontara kon bayongan in kotá inta dininding kon Yohuda, bo kon butá mita inta kon ḷuai in kotá kon Yohuda, bo kon kotá mita inta inagow i amánea kon butá in Epraim.

³ Ki Tuhan in nomarakat kon i Yosapat sin sia in dinumudui kon aid i amánea; diá in sia nosumba kon Baal,

⁴ táe tongábí moibada kon i Allah. Sia in motoindudui kon bayongan in parenta i Allah, bo kobobiagnea in diábí ná datu mita in Israel.

⁵ Ki Tuhan in nobogoi kon i Yosapat in ḷoḻitúan inta moropot nobaḻí datu in Yohuda. Bayongan in rayat nobogoi in tombuinag mita kon inia bo nobaḻí in sia nooyúon poḷat doman ihoromat totok.

⁶ Takin ibog moḷoben dinumudui in sia kon parenta i Tuhan bo norimumud kon bayongan in tampat pososumbaan kon berhala takin doman patong mita i Dewi Asyera kon Yohuda.

⁷ Kon taong nogintoḷu kon pinomarentaannea nopotabá in sia in intaunea mita moḷoben sin motundú kon hukum mita i Tuhan kon kotá mita in Yohuda. Naa in tangoi monia: ki Benhail, ki Obaja, ki Zakharia, ki Netaneel bo ki Mikha.

⁸ Mosia in inimbayongan intau in Lewi taya siow bo imang doyowa. Naa in tangoi in intau mita in Lewi tua: ki Semaya, ki Netanya, ki Zebaja, ki Asael, ki Semiramot, ki Yonatan, ki Adonia, ki Tobia, bo ki Tob-Adonia. Imang doyowa tatua in ki Elisama bo ki Yoram.

⁹ Takin kodia-dia in buk In Hukum mita i Tuhan mosia in minayá kon bayongan in kotá kon Yohuda bo notundú kon rayat kon tua.

Kawasa i Yosapat

¹⁰ Ki Tuhan nopobaḻí kon bayongan in dodatuan kon diugmai in Yohuda moondok in moparang monayow kon i Datu Yosapat.

¹¹ Sia in notarima kon nobayong in saḷaka nongkon intau in Pilistin bo tombuinag mita ibanea, bo nongkon intau in Arab sia in notarima kon 7.700 in domba bo 7.700 in bembé.

¹² Natuata in nobaḻí, koonggot-koonggot koḷoben-koḷobendon in kawasa i Yosapat. Kon sinangkub in Yohuda noposindog in sia in dinding bo kotá mita inta pototagúan kon tongkaaḷ.

¹³ Nosipun in sia kon nobayong totok in tongkaaḷ kon kotá mita tatua. Kon Yerusalem in sinampatannea doman in porwira mita inta mongotorindog,

¹⁴ kon batúan monia kotaki-takin in paanannea-paanannea tontaní podudui in inanakannea. Ki Adna in tongguḷu totokan in pinonobatúan nongkon inanakan mita in Yohuda. Sia in nonongganut kon 300.000 in tontara.

¹⁵ Intau nogindua in ki Yohanan; sia in nobaḻí tongguḷu kon 280.000 in tontara.

¹⁶ Intau nogintoḷu in ki Amasia ki adí i Zikhri; sia in nobaḻí tongguḷu kon 200.000 in tontara (Ki Amasia naa in intau tobatú inta ibogneabí tontaní in nogundoi kon i Tuhan.)

¹⁷ Tongguḷu totokan in pinonobatúan nongkon inanakan mita kon bonu in suku Benyamin in ki Elyada, tontara tobatú inta motorindog. Sia in nobaḻí tongguḷu in 200.000 in tontara inta notouḷut in piot bo kaḻeaw.

¹⁸ Intau nogindua kon bonu in pinonobatúan tanaa in ki Yosabab, sia in nobaḻí tongguḷu in 180.000 in tontara inta notouḷut in sonjata monia.

¹⁹ Mosia tuata inta nopobayá in oaidan monia kon Yerusalem. Koḻikud intua, ki datu in nokiḷukad doman kon pinonobatúan mita ibanea kon dinding mita kon butá in Yohuda.