TAWARIKH 2 16 - Alkitab Singog In Mongondow Masa In Tanaa

Parang nonayow Israel

¹ Kon taong intoḷu nopuḷú bo onom kon pinomarentaan i Datu Asa kon Yohuda, ki Baesa datu in Israel nonubu kon Yohuda bo noginropot kon kotá in Rama sin moḷamboi kon daḷan ḷumuai tumuot kon Yohuda.

² Dá ki Datu Asa in nogamá kon buḷawan bo saḷaka nongkon Baḷoi Tuhan bo kon komaḻig in datu, bo pinoki dianea kon Damsyik kon i Benhadad datu in Siria takin koyow nanaa,

³ “Koḻigai in kita mogaid kon yoyobayatan ná inta inaidan in guyanga mita naton. Tanaa akuoi in nokidia in buḷawan bo saḷaka nobaḻí tombuinag, bo monongganut kon i Tuang momontowdon kon yoyobayatan takin i Baesa datu in Israel, sinbá buineadon gamáan in tontaranea mita nongkon butá kawasa ku.”

⁴ Ki Benhadad noibog kon onu in pinoigum tatua bo poḷat nopotabá kon porwiranea mita noyotakin in tontara monia minayá nonubu kon kotá mita in Israel. Mosia in nonaḷow kon Iyon, Dan, Abel-Bet-Maakha bo bayongan in kotá mita inta nobayong in tongkaaḷ kon Naptali.

⁵ Kon dodai in kinodongogan i Datu Baesa intua, nogogaidon in sia noginropot kon Rama bo nonaḷámaidon kon kotá tatua.

⁶ Bo ki Datu Asa in nonongganutdon kon intau mita nongkon sinangkub in Yohuda sin mogakut kon batu bo kayu inta pinaké i Baesa kon Rama sin moginropot kon kotá tatua. Pakakat mita tatua in pinaké i Asa moginropot kon kotá in Geba bo Mizpa.

Ki Nabi Hanani

⁷ Kon tungkuḷ intua ki Nabi Hanani namangoi kon i Datu Asa bo noguman, “Popisí in iko inumandoḷdon kon i datu in Siria, bo deemanbí kon i Tuhan Allahmu, dá noinggamádon in kasampatanmu monaḷow kon tontara i datu in Israel.

⁸ Degá diábí kinotaauanmu kon Sudan bo Libia in kotontara mobayong takin nobayong doman in kereta in parang bo tontara inta sinumakoi kon kabaḷo? Umpaka natua táe pinountungbí i Tuhan in iko kon i monia, popisí in iko inumandoḷ kon i-Nia.

⁹ Ki Tuhan in noindoi kon sinangkub in dunia sin mobogoi in ropot-Nea kon intau mita inta mosatia kon i-Nia. Noitaḷádon in inaidanmu, tuamai nongkon tanaa iko in umurandon moyogintayow in parang.”

¹⁰ Tosingogon i Nabi Hanani tatua nokotorú totok kon i Asa nodapot in pinobonunea kon ponjara in nabi tatua. Kon dodai intua ki Asa in nopororigadon kon tongonumai in rayatnea.

Imbuit in pinomarentaan i Asa

¹¹ Bayongan inta nobaḻí kon pinomarentaan i Asa nongkon pinomangkoian nodapot in imbuitnea ain pinais kon bonu in buk Ouman in datu mita in Yohuda bo Israel.

¹² Kon taong intoḷu nopuḷú bo siow kon pinomarentaannea, ki Asa kinoantugan in takit inta mororiga totok kon sioḷnea doyowa nosimpaḷ. Umpaka natua táe sia in diábí notayak kon totuḷung kon i Tuhan, táe kon i dokterbí.

¹³ Doyowa notaong noiduduimai kon tua minatoi in sia.

¹⁴ Mayatnea in pinakéan in toyokayu nongkon pododungú mita bo inta mongo bo mongobondu, bo iḷobong kon poḷoḷobongan kon datu kon Kotá i Daud. Bo saḷaku horomat kon inia rayat nonontuḷúdon noḷoben totok.