TAWARIKH 2 15 - Alkitab Singog In Mongondow Masa In Tanaa

Ki Asa nonoimbagu

¹ Roho i Allah nongawasa kon i Nabi Azarya ki adí i Oded,

² dá minayá in sia nokipodungkuḷ kon i Datu Asa, bo noguman, “Uḻe Datu Asa, bo bayongan in intau inta nogutun kon Yohuda bo kon Benyamin! Indongogai! Ki Tuhan modagin kon i monimu aka moiko modagin kon i-Nia. Aka moiko mopoigum in topotundú i Tuhan, yo ogoian-Neabí doman. Táe aka moiko doí mopandungmai kon i-Nia, yo diábí doman in Sia mopandungmai kon i monimu.

³ Noonggot totok in Israel diá nosumba kon i Allah inta mobanar, diá kohukum mita inta musti duduian, bo diá doman ko imang mita inta motundú kon i monia.

⁴ Táe naonda in mosia kinoantugan in roriga, yo nopoigumbí in mosia in totuḷung kon i Tuhan, Allah in Israel. Nopoigum in mosia in topotundú-Nea bo inogoi-Nea doman.

⁵ Kon tungkuḷ intua intau diábí motaau in mayá takin pia-pia mako sin kon bayongan in butá oyúon in ropatoi moḷoben.

⁶ Bangusa tobatú moritak kon bangusa ibanea, bo kotá tobatú moritak kon kotá ibanea, sin pinopoangoidon i Allah in ropatoi moḷoben kon i monia.

⁷ Táe moiko in mustibí mokoporoton kon gina bo mokopobarani. Onu in totayakmu in kodapotanmubí.”

⁸ Naonda in kinodongogan i Asa in tosingogon i Azarya ki adí i Oded tua, nomukádon in baraninea. Noḷumbúdon in sia kon bayongan in berhala kon butá in Yohuda bo Benyamin, bo kon kotá mita inta ain sinaḷownea kon Buḷud in Epraim, bo sinompianeadon in Mezbah i Tuhan inta kon palas in Baḷoi Tuhan.

⁹ Nobayong in intau in Epraim, Manasye, bo Simeon in dinumugangdon kon i Asa bo nogutun kon butá dodatuan nea, sin inontongdon monia kon ki Tuhan in notuḷung kon inia. Ki Asa in nopotabá kon bayongan in intau tatua takin rayat in Yohuda bo Benyamin

¹⁰ noyosipun kon Yerusalem. Dá noyosipundon in mosia kon buḷan nogintoḷu kon taong impuḷú boḻimanea kon pinomarentaan i Asa.

¹¹ Kon singgai tatua mosia in noposumba kon i Tuhan in pitu nogatut in sapi bo pitu noribu in domba, inta inagow monia kon parang.

¹² Mosia in nodandi kon i Tuhan kon takin ḻimbatú in gina bo dimukud monia in mobiag podudui in ibog i Tuhan, Allah in mogoguyang monia.

¹³ Ki inekabí, noguyang andeka noguod, ḷoḷaki andeka bobay, inta diá nobiag podudui in ibog i Tuhan yo notantú bidon kon hukumon matoi.

¹⁴ Takin singog noropot mosia nongibot kon i Tuhan kon mosia in tantúbí kumadai kon dandi tatua. Onda intua mosia in norogiow bo nogirup kon torompet.

¹⁵ Bayongan in rayat Yohuda noḷunganga in gina sin mosia in nomiadon kon ibot tatua takin ḻimbatú in gina. Mosanang in gina monia in noibada kon i Tuhan, bo ki Tuhan in noibog doman notarima kon i monia. Inogoi-Nea kon i monia in kaadaan inta moonow kon butá monia.

¹⁶ Noiduduimai kon tua ki Datu Asa nopogogai kon i baainea ki Maakha nongkon ḷoḻitúannea saḷaku ki iná in datu sin nomiadon in sia kon patong berhala inta mokotor kon i Asyera, Dewi in koḷumbaan. Ki Asa in nogumpag bo norimumud kon patong tatua bo sinubánea kon Ḷopá in Kidron.

¹⁷ Umpaka diá komintan tampat pososumbaan kon berhala kon butá tatua irimumud i Asa, táe sia in umuranbí mosatia kon i Tuhan kinoouput in kinobiagannea.

¹⁸ Bayongan in buḷawan bo saḷaka takin pakakat mita ibanea inta nouḻí monia kon parang kapunyaan i amánea bo kapunyaannea in inukatnea kon Baḷoi Tuhan sin mobaḻí kapunyaan i Tuhan.

¹⁹ Nodapot kon taong intoḷu nopuḷú bo ḻima kon pinomarentaan i Asa diábí nomuka-muka in parang bui kon butá tatua.