TAWARIKH 2 12 - Alkitab Singog In Mongondow Masa In Tanaa

Mesir nonubu kon Yohuda

¹ Naonda in ḷoḻitúan in Rehabeam saḷaku datu nobaḻídon noropot, sia bo bayongan in rayat in Israel nonaḷámaidon kon hukum i Tuhan,

² bo diádon mosatia kon in-Nia. Tuamai in ki Tuhan nohukum kon i monia. Kon taong noginḻima kon pinomarentaan i Rehabeam, ki Sisak datu in Mesir nonubu kon Yerusalem

³ takin 1.200 in kereta in parang, 60.000 in tontara inta sinumakoi kon kabaḷo, bo tontara mobayong inta diádon koiapan in kobayongnea, noitakin doman in tontara in Libia, Suki bo Sudan.

⁴ Sia in nogagow kon kotá mita inta oyúon in dinding kon Yohuda bo minayá nodapot in Yerusalem.

⁵ Kon dodai intua ki Datu Rehabeam bo itoi mita in Yohuda ain noyosipun kon Yerusalem sin moḷagui kon i Sisak. Ki Nabi Semaya namangoi kon i monia bo noguman, “Nanaa in kai Tuhan, ‘Moiko in nonaḷámaidon kon i-Nakó, dá tanaa in taḷaan-Ku domandon in moiko modapot in moiko in kawasaandon i Sisak.’ ”

⁶ Datu bo itoi mita in nongaku kon mosia in binaradosadon. Mosia in noguman, “Onu inta pinomia i Tuhan tua in moadilbí.”

⁷ Naonda in inontong i Tuhan kon mosia in sinumonsiupdon, noguman bui in Sia kon i Semaya, kai-Nia, “Popisí in mosia ain nongaku kon dosa monia, dá diá bidon yopúon-Ku in mosia. Taḻiban-Kudon in mosia; Yerusalem in diábí morimumud. Umpaka natua, ki Sisak

⁸ in mongawasabí kon i monia, sinbá kotaauan monia in yoposi aka mogundoi kon i-Nakó bo mogundoi kon pongawasa mita in dunia.”

⁹ Dá namangoidon in ki Datu Sisak nonubu kon kotá in Yerusalem bo nogagow kon pakakat mita inta koboḻi inta kon bonu in Baḷoi Tuhan bo kon komaḻig in datu, noitakin doman in kaḻeaw mita buḷawan inta pinomia i Datu Salomo.

¹⁰ Nobaḻí toḻiunea kon tua ki Rehabeam nomia kon kaḻeaw mita bitú, bo pinoki ḷukadnea kon moḷoḷukad mita in bonawang in komaḻig.

¹¹ Pomuḷoi in datu mayá in Baḷoi Tuhan, moḷoḷukad mita tatua modia kon kaḻeaw mita tatua, mopaḷut mako bui bayáan tagúon kon yuang poḷoḷukadan.

¹² Popisí in datu sinumonsiupdon kon tayowon i Tuhan, bo popisí doman in oyúonpa in aid inta mopia kon Yohuda dá noonowdon in torú i Tuhan kon i Rehabeam bo diábí iyopúnea kinodait.

Toimpoḷok in ouman pinomarentaan i Rehabeam

¹³ Ki Rehabeam nomarenta kon Yerusalem bo kawasa nea in kodugang-kodugangdon moḷoben. Umur in sia 41 notaong kon dodai in nobaḻí datu, bo nomarenta in sia 17 notaong in koonggotnea kon Yerusalem, kotá inta ain piniḻí i Tuhan kon sigad in bayongan in butá in Israel sin mobaḻí tampat posumbaan kon i-Nia. Ki iná i Rehabeam in ki Naama nongkon butá in Amon.

¹⁴ Ki Rehabeam in nomiadon kon inta moraat sin diá noḷongasi nogaid kon onu inta kinoibog i Tuhan.

¹⁵ Ouman soaḷ ki Rehabeam nongkon pinomangkoian nodapot in kinopaḷutannea bo pinomuíannea in pinais kon bonu in buk Ouman i Nabi Semaya bo kon bonu in buk Ouman i Nabi Ido. Kon sigad i Rehabeam bo i Yerobeam umuranbí mobaḻí in parang.

¹⁶ Ki Rehabeam in minatoi bo iḷobong kon poḷoḷobongan in datu mita kon Kotá i Daud. Ki Abia ki adínea ḷoḷaki in nobaḻí datu nomaḷui kon inia.