TAWARIKH 2 10 - Alkitab Singog In Mongondow Masa In Tanaa

Suku mita kon dotá in utuan nomarontak

¹ Ki Rehabeam minayá in Sikhem sin bayongan in rayat in Israel kon dotá in utuan ain noyosipun kon tua sin moduí kon inia mobaḻí datu.

² Kon tungkuḷ intua ki Yerobeam ki adí i Nebat in kon Mesirpa sin noḷagui kon i Datu Salomo. Kon dodai in kinodongogannea in ki Rehabeam, nobui in sia kon Israel.

³ Rayat kon dotá in utuan nogoiní kon i Yerobeam, bo noyotakinnea in mosia minayá kon tayowon i Rehabeam. Guman monia,

⁴ “Ki Salomo ki amá i Tuang nobogoidon in oaidan inta mobogat kon inami. Aka ki Tuang moginggaan kon oaidan bo monggaat kon roriga nami, yo kami in dumuduibí kon parenta i Tuang.”

⁵ Ki Rehabeam in notubag, “Raionkupa muna. Bain toḷu nosinggai moiduduimai bo angoi bui.” Dá nobuidon in intau mita tatua.

⁶ Bo nopoigum in ki Rehabeam in tonggina kon guyanga mita inta nokoimontandon in nobaḻí monononggina i Salomo ki amá i Rehabeam, “Naonda degá in pototubagku kon intau mita tatua?” iḻibó i Rehabeam. “Aka kon i monimu yo naonda?”

⁷ Mosia in notubag, “Aka moibog in ki Tuang mogaid kon inta mopia kon rayat, bo moposanang in gina monia, dá tubagaidon in inta mopia in mosia, dá mosia in motoinduduibí kon i Tuang dapot in mononoi.”

⁸ Táe tonggina in guyanga mita tatua in diábí pinandungmai i Rehabeam. Noidapotbí in sia minayá kon intau mita inta nongobagupa inta topobiagannea bo inta tanaa nobantung kon inia.

⁹ Sia in noḻibó kon i monia, “Aka kon i monimu yo naonda in pototubag kon rayat inta nopoigum sinbá akuoi moginggaan kon oaidan monia?”

¹⁰ Mosia in notubag, “Naa in potubag i Tuang kon i monia, ‘Nanaaka in koyangkóku, táe akuoibí in moropo-ropot in ki amáku.

¹¹ Ki amáku nobogoi in oaidan inta mobogat kon inimu, táe akuoi in modugangbí kon kobogatnea kon tua. Sia in moposambok kon i monimu in sambok, táe akuoi in moposambokbí kon i monimu in sambok inta dodugian uatoi!’ ”

¹² Toḷu nosinggai noiduduimai kon tua ki Yerobeam bo bayongan in intau tatua bui namangoi kon i Datu Rehabeam, ná inta ain pinogumannea.

¹³ Noyoposi in tonggina in guyanga mita, rayat inta namangoi kon inia tua in sinontomúnea in tosingogon nobuḷaḷu.

¹⁴ Pinodudui ná tonggina in intau mita inta nongobagupa, noguman in sia, “Ki amáku in nobogoi in oaidan mobogat kon inimu, táe dugangankupabi kobogaton in oaidan monimu tua. Sia in noposambok kon i monimu in sambok, táe sambokonkubí in moiko in sambok inta sinondugian in uatoi!”

¹⁵ Onu in pinoigum in rayat tua in diábí pinandungneamai. Táe tua in inta kinoibogbí i Tuhan Allah. Onu inta pinoguman i Tuhan pinongin i Nabi Ahia nongkon Silo soaḷ ki Yerobeam ki adí i Nebat in mustibí mobaḻí.

¹⁶ Naonda in rayat Israel nokoontong kon ki datu in doíbí mokidongog kon i monia, nomaḷú in mosia, “Diá bidon pandungon naton in ki Daud bo buínea! Mosia in diábí kon dodai in onda in nogaid kon onu bo onu kon i naton. Rayat in Israel, igai mobui in kita! Pomayádon mako in ki Rehabeam tua in moindoi kon awaknea tontaní!” Dá nobuidon in rayat in Israel,

¹⁷ bo ki Rehabeam in nobaḻí datu tongábí kon butá in Yohuda.

¹⁸ Umpaka natua ki Datu Rehabeam tantúpabí doman nopotabá kon i Adoniram, tobatú tongguḷu in ata, sin mopoonow kon rayat. Táe inandur monia in sia in batu noidapot in minatoi. Ki Rehabeam tontaní in nokoḷagui bo iḻimikat in sinumakoi kon keretanea, bo poḷat noḷagui minayá in Yerusalem.

¹⁹ Pinangkoi kon tua rayat kon dotá in utuan dodatuan in Israel tantú momarontak kon datu mita buí i Daud.