TAWARIKH 1 7 - Alkitab Singog In Mongondow Masa In Tanaa

Buí i Isakhar

¹ Ki Isakhar in kogadí kon adí ḷoḷaki opat: ki Tola, ki Pua, ki Yasub bo ki Simron.

² Ki Tola in kogadí kon adí ḷoḷaki onom: ki Uzi, ki Repaya, ki Yariel, ki Yahmai, ki Yibsam bo ki Samuel. Mosia in tongguḷu in motoḷuadí kon bonu in inanakan i Tola bo pinonango-nangoian tontara inta mongotorindog. Kon tungkuḷ in ki Daud datu, kobayong in buí monia in 22.600.

³ Ki Uzi in kogadí kon ḷoḷaki tobatú tangoinea in ki Yizrahya. Ki Yozrahya takin ki adínea ḷoḷaki taya opat, inta ki Mikhael, ki Obaja, ki Yoël bo ki Yisia in tongguḷu mita.

⁴ Ki buḷoi mita bo ki adí mita monia in totuu modamaḷ dá buí monia in nokosadiadon kon 36.000 in ḷoḷaki inta sinumuot tontara.

⁵ Podudui in daptar inta motaau pirisayaan, nongkon bayongan in motoḷuadí kon bonu in suku i Isakhar oyúon in 87.000 in ḷoḷaki in motaaudon mobaḻí tontara.

Buí i Benyamin bo buí i Dan

⁶ Ki Benyamin in kogadí kon adí ḷoḷaki toḷu: ki Bela, ki Bekher, ki Yadiael.

⁷ Ki Bela in kogadí kon ḷoḷaki ḻima: ki Ezbon, ki Uzi, ki Uziel, ki Yerimot bo ki Iri. Mosia in tongguḷu in motoḷuadí kon bonu in inanakan monia bo ponango-nangoian kon tontara inta totok in mongotorindog. Kon bonu in daptar buí monia kinopaisan in 22.034 in intau ḷoḷaki inta motaaudon mobaḻí tontara.

⁸ Ki Bekher in kogadí kon ḷoḷaki siow: ki Zemira, ki Yoas, ki Eleazer, ki Elyoënai, ki Omri, ki Yeremot, ki Abia, ki Anatot bo ki Alemet.

⁹ Mosia tua in tongguḷu in motoḷuadí kon bonu in inanakan monia. Podudui in daptar inta motaau pirisayaan, nongkon bayongan in motoḷuadí kon bonu in buí monia in 20.200 in ḷoḷaki inta motaaudon tumuot tontara.

¹⁰ Ki Yediael in kogadí kon ḷoḷaki tobatú tangoinea in ki Bilhan. Ki Bilhan in kogadí kon adí ḷoḷaki taya pitu: Ki Yeus, ki Benyamin, ki Ehud ki Kenaana, ki Zetan, ki Tarsis bo ki Ahisahar.

¹¹ Mosia in tongguḷu in motoḷuadí kon bonu in inanakan monia bo ponango-nangoian tontara inta mongotorindog. Kon bonu in buí monia kinopaisan in 17.200 in ḷoḷaki inta motaaudon tumuot tontara.

¹² Ki Supim bo ki Hupim in buí i Ir. Ki Husim in adí i Dan.

Buí i Naptali

¹³ Ki Naptali in kogadí kon ḷoḷaki opat: ki Yahziel, ki Guni, ki Yezer bo ki Salum. Mosia in ki ompu i Bilha.

Buí i Manasye

¹⁴ Ki Manasye takin ki pahangnea, bobay in Aram tobatú, in kogadí kon ḷoḷaki doyowa: ki Asriel bo ki Makhir. Adí i Makhir in ki Gilead.

¹⁵ Ki Makhir in notayak kon buḷoi kon i Hupim bo kon i Supim. Tangoi i buḷoi i Makhir in ki Maakha. Adí i Makhir induanea in ki Zelapehad. Ki Zelapehad in diá kogadí kon ḷoḷaki, tongá adí bobay.

¹⁶ Ki Maakha ki buḷoi i Makhir in nopononggadí in adí ḷoḷaki doyowa inta sinangoian ki Peres bo ki Seres; ki Peres in kogadí kon adí ḷoḷaki doyowa ki Ulam bo ki Rekem.

¹⁷ Ki Ulam in kogadí kon ḷoḷaki tobatú tangoinea in ki Bedan. Tuata in buí i Gilead adí i Makhir, ompu i Manasye.

¹⁸ Ki bobay i Gilead inta tangoinea in ki Molekhet in kogadí kon ḷoḷaki toḷu: ki Ishod, ki Abiezer bo ki Mahla.

¹⁹ Ki Semida in kogadí kon adí ḷoḷaki opat: ki Ahyan, ki Sekhem, ki Likhi bo ki Aniam.

Buí i Epraim

^20-21 Ki Epraim in kogadí kon toḷu: ki Sutela, ki Ezer bo ki Elad. Pipidan in buí i Epraim pinongin i Sutela in ki Bered, ki Tahat, ki Elada, ki Tahat, ki Zabad, ki Sutela. Ki Ezer bo ki Elad in iḻimod kon dodai in moniat monakow kon biag in intau taakan inta nogutun kon butá in Gad.

²² Ki amá monia in nonogumatoi kon muḷoi in singgai dá ki utatnea mita in namangoi bo noḻipoi kon inia.

²³ Onda intua ki Epraim nosiug bui takin i buḷoinea, bo bobay tatua in nonogusian bui bo nopononggadí in adí ḷoḷaki tobatú. Sinangoian i Epraim in ki adínea tatua ki Beria, popisí in bodito inta kinoyitakan monia tua.

²⁴ Ki Epraim in kogadí kon adí bobay inta ki Seera in tangoinea. Sia tua inta noposindog in kotá mita in Bet-Horon Ḻimonag bo Bet-Horon Ḻimonik, bo kotá in Uza bo Seera.

²⁵ Oyúonpa doman in adí ḷoḷaki tobatú i Epraim, tangoinea in ki Repah. Naa in pipidan in buí i Repah: ki Resep, ki Telah, ki Tahan,

²⁶ ki Ladan, ki Amihud, ki Elisama,

²⁷ ki Nun, ki Yosua.

²⁸ Butá inta inogoi kon i monia nobaḻí pogogutunan monia in nongkon Betel nodapot kon kino ouput in Naaran kon dotá in pomukaan, bo Gezer kon dotá in toyopan takin ḻipú mita kon diug in kotá mita tatua. Kon butá tatua in noituot doman in kotá in Sikhem bo Aya, bo ḻipú mita inta kon ḻibuneamai.

²⁹ Buí i Manasye in nongawasa kon kotá in Bet-Sean, Taanakh, Megido, Dor bo ḻipú mita kon ḻibuneamai. Tuata in bayongan butá pogogutunan in buí i Yusup adí i Yakub.

Buí i Asyer

³⁰ Moiduduimai naa in buí i Asyer. Sia in kogadí kon adí ḷoḷaki opat: ki Yimna, ki Yiswa, ki Yiswi, ki Beria bo adí bobay tobatú, tangoinea in ki Serah.

³¹ Ki Beria in kogadí kon ḷoḷaki doyowa, ki Heber bo ki Malkiel inta noposindog in kotá Birzait.

³² Ki Heber in kogadí kon ḷoḷaki toḷu: ki Yaplet, ki Somer, ki Hotam, bo adí bobay tobatú, ki Sua in tangoinea.

³³ Ki Yaplet in kogadí doman kon ḷoḷaki toḷu: ki Pasakh, ki Bimhab, ki Asywat.

³⁴ Ki Somer ki utat i Yaplet in kogadí kon ḷoḷaki opat: ki Ahi, ki Rohga, ki Yehuba bo ki Aram.

³⁵ Ki Hotam, ki utat i Yaplet inta tobatúpa in kogadí kon ḷoḷaki opat: ki Zopah, ki Yimna, ki Seles bo ki Amal.

³⁶ Buí i Zopah in ki Suah, ki Harneper, ki Syual, ki Beri, ki Yimra,

³⁷ ki Bezer, ki Hod, ki Sama, ki Silsa, ki Yitran bo ki Beera.

³⁸ Buí i Yeter in ki Yepune, ki Pispa bo ki Ara.

³⁹ Buí i Ula in ki Arah, ki Haniel bo ki Rizya.

⁴⁰ Tuata in buí i Asyer. Mosia komintan in tongguḷu in motoḷuadí bo ponango-nangoian saḷaku pahlawan mita inta mongotorindog bo itoi mita inta moḷoben. Kon bonu in daptar buí i Asyer in kinopaisan in 26.000 in ḷoḷaki inta motaaudon tumuot tontara.