TAWARIKH 1 5 - Alkitab Singog In Mongondow Masa In Tanaa

Buí i Ruben

^1-2 Ki Ruben naa in adí guya-guyang i Yakub. Táe popisí in ki Ruben naa in ain nopoonagmai kon kahoromatan in pahang tobatú i amánea, dá haknea saḷaku adí guya-guyang in ginamádon nongkon inia bo inogoi kon i Yusup. Umpaka natua táe inta totok in moropot kon sigad in buí Yakub in deemanbí suku i Yusup táe sukubí i Yohuda. Nodapot inta muna-munamai totok nobaḻí datu kon bayongan umat in Israel in nongkon sukubí i Yohuda tua.

³ Ki Ruben ki adí guya-guyang i Yakub, in kogadí kon adí ḷoḷaki taya opat: ki Henokh, ki Palu, ki Hezron bo ki Karmi.

^4-6 Naa in pipidan in buí i Yoël: ki Semaya, ki Gog, ki Simei, ki Mikha, ki Reaya, ki Baal bo ki Beera. Ki Beera in itoi in suku i Ruben naonda in sia dinomok i Tiglat-Pileser datu in Asyur, bo dinia kon pinoḷumbúan.

⁷ Kon bonu in pinonombuían pinais doman in tongguḷu mita in inanakan inta noiduduimai naa kon bonu in suku i Ruben: ki Yeiel, ki Zakharia,

⁸ bo ki Bela ki adí i Azas, ompu i Sema nongkon inanakan i Yoël. Suku i Ruben in nogutun kon Aroër bo butá inta pinangkoi kon Aroër nopobayá ná utuan nodapot kon Nebo bo Baal-Meon.

⁹ Bobiagon monia in mobarong totok kon butá in Gilead. Tuamai, mosia in nogutundon kon butá kon dotá in pomukaan nodapot kon padang gurun inta nosimbayag kino ouput in Ongkag in Eprat.

¹⁰ Kon tungkuḷ i Datu Saul, suku i Ruben in nonubu bo nonaḷow kon intau in Hagri kon dotá in pomukaan kon Gilead, bo iḻitúan monia in butá tatua.

Buí i Gad

¹¹ Kon dotá in utuan kon butá in suku Ruben nogutun in suku Gad kon butá in Basan nodapot in kinoouput in Salkha kon dotá in pomukaan.

¹² Nongkon suku in Gad tatua ki Yoël in mogoguyang in inanakan inta ihoromat totok, bo ki Sapam in mogoguyang in inanakan nogindua. Ki Yaenai bo ki Sapat in mogoguyang in inanakan ibanea kon Basan.

¹³ Intau mita ibanea kon bonu in suku i Gad noitakin doman kon bonu in inanakan pitu noiduduimai naa: ki Mikhael, ki Mesulam, ki Syeba, ki Yorai, ki Yakan, ki Ziya bo ki Eber.

¹⁴ Mosia in buí i Abihail adí i Huri. Pipidan in pinomuían monia nongkon ḻimonag bo namonik in ná noiduduimai naa: ki Abihail, ki Huri, ki Yaroah, ki Gilead, ki Mikhael, ki Yesisai, ki Yahdo, ki Bus.

¹⁵ Tongguḷu in inanakan mita tatua in ki Ahi ki adí i Abdiel, ki ompu i Guni.

¹⁶ Mosia in nogutun kon butá in Basan bo Gilead, bo kotá mita inta kon butá tatua bo kon bayongan in rawang bonok kon Saron.

¹⁷ Pipidan in bui tanaa in pinomia kon tungkuḷ in ki Yotam in datu in Yohuda, bo ki Yerobeam in datu in Israel.

Tontara in suku mita kon dotá in pomukaan kon Ongkag in Yordan

¹⁸ Kon bonu in suku Ruben, Gad bo suku in Manasye inta kon dotá in pomukaan kon Yordan sinampat in 44.760 in tontara inta ain ilatih bo kopongalamandon mopomaké in kaḻeaw, kedang bo piot.

¹⁹ Mosia in noparang nonayow kon suku in Yetur, Napis bo Nodab, tuata in suku mita kon bonu in bangusa Hagri.

²⁰ Tontara mita tatua in mopirisaya kon i Allah bo nopoigum in totuḷung kon i-Nia, dá dinuduian i Allah in oigum monia tatua bo pinountung-Nea in mosia nongkon intau mita in Higri tatua bo yobayat mita monia.

^21-22 Popisí in parang tatua nobaḻí pinodoyon kon ibog i Allah, dá nobayong in musung in iḻimod monia. Mosia in nodomok doman kon 100.000 in intau, bo nogagow kon unta 50.000, domba 250.000 bo keledai 2.000. Nopaḷut mako kon tua mosia in nogutundon notantú kon butá tatua nodapot kon bangusa in Israel dinomok bo dinia kon pinoḷumbúan.

Intau mita in suku Manasye inta kon dotá in pomukaan kon Yordan

²³ Tongosilai in suku Manasye in nogutun kon butá in Basan nodapot kon utuan kino ouput in Baal-Hermon, Senir bo Buḷud in Hermon. Koonggot-koonggot kobayong-kobayong in mosia.

²⁴ Naa in tongguḷu mita in inanakan monia: ki Heper, ki Yisei, ki Eliael, ki Azriel, ki Yeremia, ki Hodawya bo ki Yahdiel. Mosia in tontara mita inta mongotorindog.

Suku mita kon dotá in pomukaan kon Ongkag in Yordan dinia kon pinoḷumbúan

²⁵ Intau in Israel diá mosatia kon i Allah inta sinumba in mogoguyang monia. Mosia in nonaḷámai kon i-Nia bo nosumba kon dewa mita in bangusa mita inta pinoguntun i Allah nongkon butá in Kanaan.

²⁶ Tuamai in pinopogonúdon i Allah kon i Pul datu in Asyur, dá minayádon in sia nonubu kon butá tatua. Ki Pul in tangoi-tangoion doman ki Tiglat-Pileser. Bo suku Ruben, Gad bo suku Manasye inta kon dotá in pomukaan kon Yordan in dinianea nobaḻí intau mita inta sinokodakop kon parang bo iḷumbú kon Halah, Habor, Hara bo kon tampat tobatú inta kon diug in Ongkag in Gozan. Kon tua in pinogutunan monia bo notantú nodapot in singgai naa.