TAWARIKH 1 28 - Alkitab Singog In Mongondow Masa In Tanaa

Topotundú mita i Daud pogogaid kon Baḷoi Tuhan

¹ Ki Datu Daud in nomarenta sinbá bayongan in itoi in Israel moyosipun kon Yerusalem. Dá bayongan tongguḷu in suku, pojabat mita inta nokadai kon pomarentaan, tongguḷu mita in inanakan, moḷoḷukad mita kon bayongan kapunyaan bo bobiagon i datu bo ki adínea mita ḷoḷaki – impoḷok mako in tosingogon intau mita moḷoben kon komaḻig, porwira mita bo intau moponting, komintan noyosipun kon Yerusalem.

² Ki Daud in sinimindog kon tayowon monia bo noguman, “Utatku mita inta tongobangusaku, indongogaipa! Noonggotdon in niatku moposindog in baḷoi tobatú sin potagúan kon Poti Dodandian, pomomuntukan i Tuhan Allah naton. Akuoi in nosadiadon kon moposindog in baḷoi tobatú tampat pososumbaan kon i-Nia.

³ Táe inimaḷowan i Tuhan in akuoi in mogaid kon tua sin akuoi in tontara inta ain nobayong in iḻimodku.

⁴ Ki Tuhan Allah inta sinumba in Israel, ain nomiḻí kon inakó bo buíku sin momarenta kon Israel moidapot in mononoi. Bo kon bonu in moposadia kon itoi tobatú dá piniḻí-Nea in suku Yohuda, bo nongkon suku tatua piniḻí-Nea in motoḷuadí i amáku. Bo nongkon bayongan in tombonu in motoḷuadí i amáku tatua dá noibog in Sia nomiḻí kon inakó bo binaḻí-Nea in akuoi datu kon bayongan in Israel.

⁵ Sia in nobogoi in adí nobayong kon inakó bo nongkon bayongan i adíku tatua piniḻí-Nea in ki Salomo sin momarenta kon Israel, dodatuan i Tuhan.

⁶ Ki Tuhan in noguman kon inakó nanaa, ‘Ki Salomo adímu in moposindogbí in baḷoi kon i-Nakó. Sia in piniḻí-Kudon nobaḻí ki adí-Ku, bo Akuoi in mobaḻídon ki amánea.

⁷ Aka sia totu-totuudon umuran dumudui kon bayongan in hukum bo parenta-Ku mita ná inta ain inaidannea tanaa mako, poropoton-Kudon in dodatuan nea moidapot in mononoi.’ ”

⁸ Bo ki Daud in nogumandon, “Dá tanaa, ei rayatku, kon tayowon i Allah naton bo kon tayowon in bayongan intau in Israel, umat i Tuhan tanaa, poigumonku in moiko kon totu-totuudon dumudui kon bayongan in parenta i Tuhan Allah naton. Pongin natua dá butá inta mopia tanaa in tantúdon mobaḻí kapunyaanmu bo dapot in poabat kon buímu modapot in mononoi.”

⁹ Bo ki Daud in noguman kon i Salomo nanaa, “Adíku, igumonku sinbá ki Allah inta sinumba i amámu, in akuonmu nobaḻí ki Allahmu. Iko in mustibí mogundoi kon i-Nia takin ḻimbatúon in gina bo gina mobayag. Sin kinotaauan-Neabí in bayongan raian bo ibog naton. Aka iko motayak kon i-Nia, yo mouḻímubí in Sia, táe aka iko monaḷámai kon i-Nia, yo indoíon-Nea bidon in iko modapot in mononoi.

¹⁰ Toropdon kopira kon ki Tuhan in nomiḻídon kon inimu sin moposindog in baḷoi inta ain sinantú kon i-Nia. Dá tanaa in aidaidon intua takin ibog moḷoben.”

¹¹ Nopaḷut mako kon tua ki Daud in noposarakadon kon i Salomo in tomayá mogaid kon Baḷoi Tuhan, gudangnea mita, bayongan in gopotnea, bo yuang Inta Totok in Motusi, tampat pongongampungan kon dosa.

¹² Ki Daud in nobogoi doman in bayongan tomayá inta ain irainea sin pogaidan kon bosínea takin gopot mita inta kon ḻibunea, bo pogaidan kon gudang mita inta posipunan kon touḷut in Baḷoi Tuhan bo gudang mita pototagúan kon oogoi kon i Tuhan.

¹³ Bo inogoinea domandon in tomayá kon mopoyosilai kon imang mita bo intau mita in Lewi, soaḷ oaidan mita inta musti aidan monia, tuata in oaidan monia kon Baḷoi Tuhan bo poḷoḷukad kon bayongan in pakakat in ibada.

¹⁴ Bo inogoiannea domandon in topotundú mita soaḷ pogogaid kon buḷawan bo saḷaka sin pomiaan pakakat mita,

¹⁵ kon batúan in togá bo sioḷnea,

¹⁶ bo meja mita nongkon saḷaka bo kon batúan in meja buḷawan pogukatan kon roti inta oḷudon kon i Allah.

¹⁷ Bo topotundú doman kon soaḷ kobayong in buḷawan totokan inta musti pakéon pomiaan porok, palo bo sompoi, bo soaḷ kobayong in saḷaka bo buḷawan pomiaan pindan mita,

¹⁸ soaḷ kobayong in buḷawan totokan inta pomiaan mezbah pototubáan kon dupa bo aidan kereta inta potuduan kon patong mita in kerub takin koḻikip nobuká kon tudu in Poti Dodandian i Tuhan.

¹⁹ Bo ki Datu Daud in noguman, “Bayongan intua in kon bonu bidon in tomayá inta ain pinais podudui in topotundú inta inogoi i Tuhan tontaní sin aidan.”

²⁰ Onda intua ki Datu Daud noguman bui kon i Salomo adínea ḷoḷaki. “Iko in musti mokopoyakin bo mokopobarani. Pangkoidon in oaidan tatua bo dika moondok kon onuka. Ki Tuhan Allah inta sinumbaku in motuḷungbí kon inimu. Diábí in Sia monaḷámai kon inimu. Umuran-Neabí takinan in iko modapot in moḷapatdon komintan in oaidan tatua.

²¹ Pinosilaian kon oaidan mopobayá in ibada kon Baḷoi Tuhan ain sinantú kon sigad in imang mita bo intau in Lewi. Mogogaid mita inta mongotaau kon oaidannea kon batúan monia in motuḷungbí kon inimu takin sanang in gina, bo itoi mita takin bayongan in rayat in dumuduibí kon parentamu.”