TAWARIKH 1 25 - Alkitab Singog In Mongondow Masa In Tanaa

Mogogogitog mita in musik kon Baḷoi Tuhan

¹ Noiduduimai kon tua, ki Datu Daud bo itoi mita in intau in Lewi in nomiḻí kon inanakan i Lewi sin mopobayá in oaidan upacara mita in ibada, noiduduimai naa in tangoi monia: ki Asap, ki Heman bo ki Yedutun. Mosia in inogoian in oaidan mopotaau in koyow nongkon i Allah takin kokuti-kuti in musik kecapi, gambus bo simbal. Bo mobaḻí itoi kon ibada bo upacaranea in kon batúannea, piniḻí in paanan mita noiduduimai naa:

² Ki adí ḷoḷaki i Asap taya opat: ki Zakur, ki Yusup, ki Netanya bo ki Asarela. Itoi monia in ki Asap, inta mopotaau in koyow nongkon i Allah, aka pokiaidan i datu.

³ Ki adí ḷoḷaki i Yedutun inta taya onom: ki Gedalya, ki Zeri, ki Yesaya, ki Simei, ki Hasabya bo ki Matica. Kon bonu in tongganut i amá monia, mosia in mopotaau in koyow nongkon i Allah takin kokuti-kuti in musik kecapi, bo mosia in mopodondong in dondong dodayow bo sukur kon i Tuhan.

⁴ Ki adí ḷoḷaki i Heman inta taya mopuḷú bo opat: ki Bukia, ki Matanya, ki Uziel, ki Sebuel, ki Yerimot, ki Hananya, ki Hanani, ki Eliata, ki Gidalti, ki Romamti-Ezer, ki Yosbekasa, ki Maloti, ki Hotir bo ki Mahaziot.

⁵ Ki Heman in nobaḻí nabi i datu tontaní. Ki Tuhan in nobogoi in adí ḷoḷaki inta mopuḷú bo opat tatua takin adí bobay toḷu kon i Heman, sin ki Tuhan ain nodandi kon mobogoi in ḷoḻitúan mopia kon inia.

⁶ Bayongan in adí i Heman tua in mopogogitog in musik simbal, kecapi bo gambus kon bonu in tongganut i amá monia sin moguyun kon upacara ibada kon Baḷoi Tuhan. Ki Asap, ki Yedutun bo ki Heman in nokouḻí kon oaidan podudui in topotundú i datu.

⁷ Ki adí ḷoḷaki monia inta doyowa nopuḷú bo opat takin ginaḷum motoḷuadí monia tua in intau mita inta mongopia mita mopogogitog in musik. Kobayong monia komintan tua in 288 in intau.

⁸ Bo aka monantú kon wakutu monia mogaid, dá morabutbí in mosia komintan kon undi, pinomayá inta nobagupa andeka inta ain nogurang, pinomayá inta ain kopongalaman andeka inta bagupa mobalajar.

^9-31 Intau inta 288 tatua in sinilai kon bonu in 24 notonsilai podudui kon batúan in motoḷuadí monia. Batúan in tonsilai kobayongnea in 12 in intau kon bonu in tongganut in intau tobatú. Naa in tundugan tangoi monia podudui in undian: 1. Ki Yusup motoḷuadí i Asap 13. Ki Subael 2. Ki Gedalya 14. Ki Matica 3. Ki Zakur 15. Ki Yeremot 4. Ki Yizri 16. Ki Hananya 5. Ki Netanya 17. Ki Yosbekasa 6. Ki Bukia 18. Ki Hanani 7. Ki Yesarela 19. Ki Maloti 8. Ki Yesaya 20. Ki Eliata 9. Ki Matanya 21. Ki Hotir 10. Ki Simei 22. Ki Gidalti 11. Ki Azareel 23. Ki Mahaziot 12. Ki Hasabya 24. Ki Romamti-Ezer