TAWARIKH 1 24 - Alkitab Singog In Mongondow Masa In Tanaa

Oaidan inta pinoki aid kon imang mita

^1-3 Ki Harun in kogadí kon adí ḷoḷaki opat: ki Nadab, ki Abihu, ki Eleazar bo ki Itamar. Ki Nadab bo ki Abihu in minatoi noiuna kon i amá monia bo diápa kogadí. Tuamai in ki Eleazar bo ki Itamar inta ki utat monia in nobaḻí imang. Ki Daud in nosilai kon buí i Harun kon bonu in tongonu notonsilai podudui in oaidan monia. Kon bonu in oaidan podudui in kolompó tatua ki Daud in binantungan i Zadok buí i Eleazar bo i Ahimelek buí i Itamar.

⁴ Buí i Itamar in sinilai nobaḻí waḷu notonsilai, bo buí i Eleazar in nobaḻí mopuḷú bo onom notonsilai, sin kon bonu in buí i Eleazar nobarong in ḷoḷaki tongguḷu in motoḷuadí.

⁵ Sin pinomayá kon bonu in buí i Eleazar andeka kon bonu in buí i Itamar oyúon in pojabat mita in Baḷoi Tuhan bo itoi mita in agama, dá kon mosilai kon oaidan in nomaké in undian.

⁶ Buí i Eleazar bo buí i Itamar in moyo-moyoḷuan in morabut kon undi bo tangoi mita monia in paison in momomais tobatú inta tangoinea in ki Semaya adí i Netaneel intau in Lewi. Bayongan intua inaidan kon tayowon in datu takin bayongan in pogawainea mita. Ki Imang Zadok, ki Ahimelek ki adí i Abyatar bo tongguḷu mita in motoḷuadí i imang bo tongguḷu mita in motoḷuadí i Lewi.

^7-18 Naa in nomor noyodudui podudui in wakutu monia mopobayá in aidan inta sinundú in undian kon doyowa nopuḷú bo opat in kolompó tatua: 1. Ki Yoyarib 13. Ki Hupa 2. Ki Yedaya 14. Ki Yesebeab 3. Ki Harim 15. Ki Bilga 4. Ki Seoirim 16. Ki Imer 5. Ki Malkia 17. Ki Hezir 6. Ki Miyamin 18. Ki Hapizes 7. Ki Hakos 19. Ki Petahya 8. Ki Abia 20. Ki Yehezkiel 9. Ki Yesua 21. Ki Yakhin 10. Ki Sekhanya 22. Ki Gamul 11. Ki Elyasib 23. Ki Delaya 12. Ki Yakim 24. Ki Maazya

¹⁹ Tangoi in intau mita tatua in pinais pinodudui in wakutu monia tumuot kon Baḷoi Tuhan bo mopobayá in oaidan monia kon ibada inta ain sinantú i Harun, mogoguyang monia, podudui in parenta i Tuhan, Allah in Israel.

Daptar in intau in Lewi

^20-26 Koḻikud intua kon bonu in buí i Lewi noituotpa kon tongguḷu mita in motoḷuadí mita noiduduimai naa: Ki Yehdea, buí i Amram nongkon pipidan in buí i Subael; Ki Yisia, buí i Rehabya; Ki Yahat, buí i Yizhar nongkon pipidan in buí i Selomot; Ki Yeria, ki Amarya, ki Yehaziel bo ki Yekameam ki adí mita i Hebron podudui in umur monia; Ki Samir, buí i Uziel nongkon pipidan in buí i Mikha; Ki Zakharia, buí i Uziel nongkon pipidan in buí i Yisia utat i Mikha; Ki Mahli, ki Musi, bo ki Yaazia, buí i Merari.

²⁷ Ki Yaazia in kogadí kon adí ḷoḷaki toḷu: ki Syoham, ki Zakur bo ki Hibri.

^28-29 Ki Mahli in kogadí kon adí ḷoḷaki doyowa tangoinea in ki Eleazar bo ki Kish. Ki Eleazar in diá kogadí kon ḷoḷaki, táe ki Kish in kogadí kon adí ḷoḷaki tobatú tangoinea in ki Yerahmeel.

³⁰ Ki adí ḷoḷaki i Musi in taya toḷu: ki Mahli, ki Eder bo ki Yerimot. Tuata in motoḷuadí mita in suku Lewi.

³¹ Kon dodai in mosia mopobayá in oaidan monia, kon batúan in tongguḷu in motoḷuadí takin ki ai-ainea tobatú inta ḷoḷaki morabut kon undi ná inta inaidan in ginaḷum monia, inta imang mita buí i Harun. Porabutan kon undi tatua inindoian mako i Datu Daud takin i Zadok, i Ahimelek bo tongguḷu mita in motoḷuadí nongkon golongan in imang mita bo nongkon golongan in intau in Lewi.