TAWARIKH 1 23 - Alkitab Singog In Mongondow Masa In Tanaa

¹ Kon dodai in ki Daud nogoguyangdon totok dinuíneadon in ki Salomo nobaḻí datu in Israel.

Oaidan in intau in Lewi

² Ki Datu Daud in nosipun kon bayongan itoi in Israel, imang mita bo intau mita in Lewi,

³ bo iniapnea komintan in bayongan ḷoḷaki in suku Lewi inta umur toḷu nopuḷú notaong bo namonik. Kobayong monia komintan in 38.000

⁴ Bo 24.000 in intau kon sigad monia tua in pinoki aidan in oaidan kon Baḷoi Tuhan, 6.000 in moindoi kon administrasi bo pelekara mita in pongadilan,

⁵ 4.000 in moḷoḷukad, bo 4.000 doman in modayow kon i Tuhan mopomaké in pakakat mita in musik inta ain sinadia.

⁶ Sinilai i Daud in intau in Lewi tatua nobaḻí toḷu notonsilai podudui in inanakan monia, tuata in inanakan i Gerson, i Kehat bo i Merari.

⁷ Ki Gerson in kogadí kon adí ḷoḷaki doyowa: ki Ladan bo ki Simei.

⁸ Adí mita ḷoḷaki i Ladan in taya toḷu: ki Yehiel, ki Zetam bo ki Yoël.

⁹ Mosia in tongguḷu in inanakan in buí i Ladan. (Ki Selomit, ki Haziel bo ki Haran in adí ḷoḷaki i Simei.)

^10-11 Ki adí ḷoḷaki i Simei taya opat podudui in umur monia in: ki Yahat, ki Ziza, ki Yeus bo ki Beria. Buí i Yeus bo i Beria in diá nobayong, dá mosia in inanggap toinanakan.

¹² Ki Kehat in kogadí kon adí ḷoḷaki opat: ki Amram, ki Yizhar, ki Hebron bo ki Uziel.

¹³ Ki Amram in ki amá i Harun bo i Musa. (Ki Harun bo buínea mononoi in sinantúdon monompia kon pakakat mita in ibada, motubá kon dupa kon i Tuhan, mogundoi kon i Tuhan bo momarakat kon rayat podoyon kon tangoi Tuhan.

¹⁴ Adí mita ḷoḷaki i Musa mogogundoi i Allah tua in pinonuot kon suku i Lewi.)

¹⁵ Ki Musa in kogadí kon adí ḷoḷaki doyowa, inta ki Gersom bo ki Eleazer.

¹⁶ Inta nobaḻí itoi in adí mita i Gersom in ki Sebuel.

¹⁷ Ki Eleazer in tongá kogadí kon ḷoḷaki tobatú, tangoinea in ki Rehabya. Táe ki Rehabya in kogadí kon nobayong totok in adí.

¹⁸ Ki Yizhar, ki adí i Kehat nogindua, in kogadí kon adí ḷoḷaki tangoinea in ki Selomit; sia in tongguḷu in inanakan.

¹⁹ Ki Hebron, adí i Kehat nogintoḷu, in kogadí kon adí ḷoḷaki opat: ki Yeria in guya-guyang, noiduduimai in ki Amarya, ki Yehaziel bo ki Yekameam.

²⁰ Ki Uziel, adí i Kehat noginggopat in kogadí kon adí ḷoḷaki doyowa: ki Mikha in guya-guyang bo ki Yisia.

²¹ Ki Merari in kogadí kon ḷoḷaki doyowa tangoinea in ki Mahli bo ki Musi. Ki Mahli in kogadí kon adí ḷoḷaki doyowa inta ki Eleazar bo ki Kish,

²² Táe ki Eleazar in minatoi kon dodai in diá kogadí kon ḷoḷaki tongá adí mita bobay inta pinobuḷoi i adí mita i Kish inta ginaḷum monia.

²³ Ki Musi, adí i Merari inta nogindua in kogadí kon adí ḷoḷaki toḷu: ki Mahli, ki Eder bo ki Yeremot.

²⁴ Tuata in tangoi mita in buí i Lewi inta kinopaisan podudui in tangoi in tongguḷu in inanakan bo motoḷuadínea-motoḷuadínea. Mosia in umur doyowa nopuḷú notaong bo namonik bo nokouḻí kon oaidan kon Baḷoi Tuhan.

²⁵ Ki Daud in noguman, “Ki Tuhan Allah in Israel ain nobogoi in kobiagan notompia kon umat-Nea, bo Sia tontaní in nogutun kon Yerusalem modapot in mononoi.

²⁶ Tuamai, Ḷoḷaigan i Tuhan bo bayongan in pakakat inta pinaké kon ibada in diá bidon paraḷu potaanon in intau in Lewi.”

²⁷ Podudui in parenta mita i Daud pangabisan, bayongan in intau in Lewi, aka umurdon doyowa nopuḷú notaong, musti paisondon in tangoi sin mopobayá in oaidan.

²⁸ Mosia in mustibí mobantung kon imang mita buí i Harun mopobayá in upacara ibada kon Baḷoi Tuhan, moḷukad kon palas mita bo gopot mita kon Baḷoi Tuhan tua, bo moḷukad sinbá bayongan in yagi-yagi inta ain sinantú kon i Tuhan in diá mobaḻí monajis.

²⁹ Mosia doman in kitogi totaau kon inta moiduduimai naa: Roti inta pinosumba kon i Allah, topong inta pakéon posumba kon i Tuhan, kukis nonipit inta pinomia diá binaukan in ragi, kuruban inangag, bo topong inta binaukan in ḷana zaitun. Musti doman in mosia mosimbang bo mogiap kon sosumba mita inta dinia kon Baḷoi Tuhan.

³⁰ Koḻikud intua mosia in musti modondong modayow kon i Tuhan muḷoi in doḷo-doḷom bo muḷoi in doḷom;

³¹ bo muḷoi doman mako aka oyúon in kuruban angagon kon i Tuhan kon singgai in Sabat, kon Poramean Buḷan Mobagu, bo kon poramean mita ibanea. Soaḷ kobayong in intau in Lewi inta musti mogaid kon oaidan muḷoi mako, ain doman inaidan in atorangnea. Modapot in mononoi intau in Lewi musti mopobayá in oaidan tatua.

³² Mosia in pinoki ḷukadan doman in ḷoḷaigan i Tuhan bo Baḷoi Tuhan bo motuḷung kon utat mita monia, inta imang mita buí i Harun, kon bonu in mopobayá in ibada kon tampat tatua.