TAWARIKH 1 22 - Alkitab Singog In Mongondow Masa In Tanaa

¹ Dá ki Daud in noguman, “Kon tampat tanaa in mustibí posindogon in Baḷoi Tuhan Allah. Bo kon mezbah tanaadon intau in Israel musti moposumba in kuruban payongon kon i Tuhan.”

Noposadia moposindog in Baḷoi Tuhan

² Ki Datu Daud nokisipun in bayongan intau ango-angoi inta nogutun kon butá in Israel, bo pinoki pogaidannea in mosia. Tongosilai kon i monia in nongurig kon batu sin pakéon pobaḷoi kon Baḷoi Tuhan.

³ Bo inta pakéon aidan pakú bo engsel in ngara mita in Baḷoi Tuhan tatua, ki Daud in nosipundon kon uatoi mobarong totok. Sia in nosipun domandon kon bitú nobayong, noidapot in diádon kosimbangan.

⁴ Bo sia in nopongoyowdon in kayu ḷokuyú in Libanon nobarong domandon totok kon intau in Tirus bo Sidon.

⁵ Bayongan intua inaidan i Daud sin sia in norai nanaa: “Musti in akuoi moposadia in bayongan onu inta pakéon pogaid kon Baḷoi Tuhan. Sin ki Salomo ki adíku ḷoḷaki in nobagupa bo diápa kopongalaman, bo Baḷoi Tuhan inta posindogonnea in mustibí mogaga totok bo ponango-nangoian kon sinangkub in dunia naa.” Dá kon dodai in ki Daud diápa minatoi, nobarongdon totok in sinadianea in pakakat mita pogaid kon baḷoi tatua.

⁶ Ki Daud in nogoiní kon i adínea ḷoḷaki, ki Salomo, bo nomarenta kon inia moposindog in Baḷoi kon i Tuhan Allah inta sinumba in umat in Israel.

⁷ Guman i Daud kon i Salomo, “Adíku, noonggotdon in akuoi nokoiniat moposindog in baḷoi tobatú sin mohoromat kon i Tuhan Allahku.

⁸ Táe ki Tuhan in noguman kon akuoi in noiḻiudon kakit in noparang bo nobarongdon in iḻimodku in intau. Tuamai in diá inogoi-Nea in akuoi moposindog in baḷoi kon i-Nia.

⁹ Umpaka natua, nodandi in Sia kon inakó nanaa: ‘Iko in mokouḻíbí kon adí ḷoḷaki tobatú inta momarenta takin mobiag motompia sin Akuoi in motuḷung kon inia dá diá in musung in monubu kon inia. Sia in tangoian ki Salomo sin kon bonu in sia in momarenta, Akuoi in mobogoibí in kobiagan motompia bo moaman kon bayongan in Israel.

¹⁰ Ki adímu ḷoḷaki tatua in moposindog in baḷoi kon i-Nakó. Sia in mobaḻí ki adí-Ku bo Akuoi in mobaḻí ki Amánea. Ḷoḻitúan pomomarentaan in Israel in umuranbí ogoi kon buínea moidapot in mononoi.’ ”

¹¹ Bo ki Daud in noguman bui, “Tanaa, adíku, igumon mako ki Tuhan Allahmu tantú motuḷung kon inimu. Bo igumon mako mokotongod in iko moposindog in baḷoi kon i Tuhan ná inta ain pinodandi-Nea.

¹² Bo igumon mako ki Tuhan Allahmu in mobogoi kon inimu in kabijaksanaan bo pandoi sin momarenta kon Israel podudui in hukum-Nea mita.

¹³ Aka iko dumudui kon bayongan in hukum inta inogoi Tuhan kon i Musa kon bangusa in Israel, yo iko in mokodapotbí kon onu inta nobaḻí niat. Iko in mustibí moyakin bo mobarani. Dika moondok in moyogintayow in onukabí.

¹⁴ Aka Baḷoi Tuhan tua, yo akuoi in noḷongasidon totok nosipun kon 3.400 noton in buḷawan bo noiḻiu kon 34.000 noton in saḷaka. Koḻikud intua oyúon in bitú bo uatoi inta diádon koiapan in kobayongnea. Kayu bo batu in sinadiaku domandon táe mustipa duganganmu.

¹⁵ Nobayongbí in mogogaidmu mita. Oyúon in motaau mogaid kon pongongaḻian kon batu, oyúon doman in mogogimok kon kayu, bas in batu bo nobayongpa doman totok in intau inta mongopandoi mogaid kon oaidan

¹⁶ buḷawan, saḷaka, bitú, bo uatoi. Yo, ḷagidon pangkoiai! Igumon mako ki Tuhan motuḷung kon inimu”.

¹⁷ Bo ki Daud nopotabá kon bayongan itoi in Israel notuḷung kon i Salomo.

¹⁸ Gumannea, “Ki Tuhan Allahmu ain notuḷung kon i monimu, bo nobogoi in dodamean bo bayongan in kobiagan motompia kon bayongan butá. Sia in nopountungdon kon inakó nongkon bayongan in bangusa inta dungkuḷmai nogutun kon butá tanaa. Tanaa mosia in notoguondokdon kon inimu bo kon i Tuhan.

¹⁹ Dá pogundoidon in moiko kon i Tuhan Allahmu takin ḻimbatú in ropotmu. Pomangkoidon pogaid kon baḷoi kon i Tuhan, sinbá Poti Dodandian-Nea bo bayongan in pakakat ibanea inta tongá pakéon kon ibada in motaaudon tagúon kon tua.”