TAWARIKH 1 20 - Alkitab Singog In Mongondow Masa In Tanaa

Ki Daud nogagow kon Raba

¹ Kon sempo in pononubú noiduduimai, kon tungkuḷ in datu mita biasamai mayá moparang, ki Yoab in nonongganutdon kon tontaranea bo nogagow kon butá in Amon. Kon tungkuḷ intua ki Datu Daud in umuranpa kon Yerusalem bo diá dinumudui. Ki Yoab bo tontaranea in nongopung kon kotá in Raba, bo nonubu poḷat nomayong kon kotá tatua.

² Nopaḷut mako kon tua ki Daud in namangoi bo nogamá kon nobayong totok in pakakat inagow nongkon kotá tatua. Kon sigad in pakakat mita tatua oyúon doman in mahkota i datu Amon. Mahkota tatua kobogatnea in degá 34 nokilo bo iḷambáan in permata tobatú. Ki Daud in nogamá kon permata tatua bo pinokompitnea kon mahkotanea tontaní.

³ Onda intua ki Daud nodia kon intau mita inta nogutun kon kotá in Raba tatua bo nomakisa kon i monia nogaid nopomaké in garagaji, pasoḷ bo boḻiung. Tua in inaidannea doman kon kotá mita in Amon ibanea. Nopaḷut mako kon tua ki Daud bo bayongan in tontaranea nobui kon Yerusalem.

Pinoparangan nonayow kon intau mita tuyá in Pilistin

⁴ Degá tongonumai nosinggai nongkon tua nobaḻídon bui in parang nonayow kon intau in Pilistin kon Gezer. Kon pinoparangan tobatú tatua ki Sibkhai intau in Husa noḻimod kon intau tuyá tobatú tangoinea in ki Sipai. Dá intau in Pilistin in sinaḷowdon.

⁵ Kon pinoparangan ibanea nonayow kon intau in Pilistin, ki Elhanan ki adí i Yair in noḻimod kon i Lahmi ki utat i Goliat intau in Gat. Puḷu in pandong i Lahmi tua in ná koḷoben in kayu gogaboḷan.

⁶ Kon pinoparangan ibanea doman kon Gat oyúon in intau tuyá tobatú inta gongguyamú kon batúan in ḻima bo sioḷnea in komintan tumogogonom. Sia in buí in intau tuyá dungkuḷmai.

⁷ Sia in noningkuḻemai kon intau in Israel, bo tuamai in sia iḻimod i Yonatan, ki adí i Simea guya-guyang i Daud.

⁸ Intau toḷu inta iḻimod i Daud bo tontaranea tatua in buí in tuyá kon Gat.