TAWARIKH 1 2 - Alkitab Singog In Mongondow Masa In Tanaa

Buí i Yohuda, adí i Yakub

¹ Adí ḷoḷaki i Yakub in mopuḷú bo doyowa: ki Ruben, ki Simeon, ki Lewi, ki Yohuda, ki Isakhar, ki Zebulon,

² ki Dan, ki Yusup, ki Benyamin, ki Naptali, ki Gad, ki Asyer.

^3-4 Adí ḷoḷaki i Yohuda in taya ḻima. Nongkon i buḷoinea inta ki Batsyua, bobay in Kanaan, pinononggadí in ki Er, ki Onan bo ki Sela; nongkon i buḷoinea inta ki Tamar, inta ki mototakanea tontaní, pinononggadídon in ki Peres bo ki Zerah. Ki Er ki adí guya-guyang i Yohuda tatua in totok in moraat, dá iḻimod i Tuhan in sia.

⁵ Ki Peres in kogadí kon adí ḷoḷaki doyowa, ki Hezron bo ki Hamul.

⁶ Ki Zerah in kogadí kon adí ḷoḷaki taya ḻima: ki Zimri, ki Etan, ki Heman, ki Kalkol, bo ki Dara.

⁷ Ki Akhan adí i Karmi buí i Zerah, nokopoangoi kon bodito kon umat in Israel popisí in nogamá kon pakakat inta inagow kon parang inta ain sinantú ogoi kon i Allah.

⁸ Adí ḷoḷaki i Etan in ki Azarya.

Bui inanakan i Isai, ki amá i Datu Daud

⁹ Ki Hezron in kogadí kon adí ḷoḷaki taya toḷu: ki Yerahmeel, ki Ram bo ki Kaleb.

¹⁰ Tangoi mita in pinomuían nongkon i Ram noidapot kon i Isai in noiduduimai tanaa: Ram Aminadab Nahason (intau inta doduduianmai kon suku in Yohuda)

¹¹ Salmon Boas

¹² Obed Isai.

¹³ Ki adí ḷoḷaki i Isai in taya pitu. Naa in tangoi monia podudui in umur monia: ki Eliab, ki Abinadab, ki Simea,

¹⁴ ki Natanael, ki Radai,

¹⁵ ki Ozem, ki Daud.

¹⁶ Ki Isai in kogadí doman kon adí bobay taya dua: ki Zeruya bo ki Abigail. Ki Zeruya in kogadí kon adí ḷoḷaki taya toḷu: ki Abisai, ki Yoab bo ki Asael.

¹⁷ Ki Abigail in pinobuḷoi i Yeter buí i Ismael. Mosia in kogadí kon adí ḷoḷaki tobatú tangoinea in ki Amasa.

Buí i Hezron

¹⁸ Ki Kaleb adí i Hezron notonibuḷoi i Azuba bo nokotonggadí kon adí bobay tangoinea in ki Yeriot. Ki Yeriot naa in nokouḻí kon adí ḷoḷaki taya toḷu: ki Yezer, ki Sobab, ki Ardon.

¹⁹ Naonda in ki Azuba minatoi, ki Kaleb in notonibuḷoi i Eprat bo nokouḻí kon adí ḷoḷaki tobatú tangoinea in ki Hur.

²⁰ Adí ḷoḷaki i Hur in ki Uri bo ki ompunea in ki Bezaleel.

²¹ Naonda in ki Hezron umurdon 60 notaong notonibuḷoi in sia i bobay i Gilead, adí i Makhir. Mosia in nokotonggadí kon adí ḷoḷaki tangoinea in ki Segub,

²² bo ki Segub in kogadí kon adí ḷoḷaki tangoinea in ki Yair, inta 23 in ḻipúnea kon butá in Gilead.

²³ Táe dodatuan in Gesur bo Aram in nonaḷow kon 60 in ḻipú kon butá tatua noitakin doman in ḻipú mita in intau in Yair, ḻipú in Kenat, takin doman ḻipú mita inta mongointok kon diugneamai. Bayongan in intau inta nogutun kon tua in buí i Makhir ki amá i Gilead.

²⁴ Naonda in minatoi mako in ki Hezron, ki Kaleb ki adínea in notonibuḷoi i Eprat inta ki baḷú i amánea. Adí monia ḷoḷaki tangoinea in ki Asyur; sia tua inta noposindog in kotá Tekoa.

Buí i Yerahmeel

²⁵ Ki Yerahmeel ki adí guya-guyang i Hezron in kogadí kon adí ḷoḷaki taya ḻima: ki Ram in guya-guyang totok, bodongka ki Buna, ki Oren, ki Ozem bo ki Ahia.

^26-27 Ki Ram in kogadí kon adí ḷoḷaki: ki Maas, ki Yamin bo ki Eker. Ki Yerahmeel in kobuḷoi doman kon ibanea mako tangoinea in ki Atara; mosia in kogadí kon adí ḷoḷaki tangoinea in ki Onam.

²⁸ Ki adí ḷoḷaki i Onam in doyowa: Ki Samai bo ki Yada. Ki Samai in kogadí kon adí ḷoḷaki doyowa, inta ki Nadab bo ki Abisur.

²⁹ Ki Abisur in notonibuḷoi i Abihail bo nokouḻí in mosia kon adí ḷoḷaki doyowa; ki Ahban bo ki Molid.

³⁰ Ki Nadab guya-guyang i Abisur in kogadí kon adí ḷoḷaki doyowa inta tangoinea in ki Seled bo ki Apaim, táe ki Seled in minatoi diápa kogadí kon ḷoḷaki.

³¹ Ki Apain in ki amá i Yisei, ki Yisei in ki amá i Sesan, bo ki Sesan in ki amá i Ahlai.

³² Ki Yada ki utat i Samai in kogadí kon adí mita ḷoḷaki tangoinea in ki Yeter bo ki Yonatan. Táe ki Yeter in minatoi bo diá kogadí kon adí ḷoḷaki.

³³ Ki Yonatan in kogadí kon adí ḷoḷaki taya dua, ki Pelet bo ki Zaza. Mosia in komintan buí i Yerahmeel.

³⁴ Ki Sesan in diá kogadí kon adí ḷoḷaki, tongá adí bobay. Bobantungnea, intau in Mesir tangoinea in ki Yarha,

³⁵ pinotonibuḷoinea takin i adínea tobatú. Mosia in kogadí kon adí ḷoḷaki inta tangoinea in ki Atai.

^36-41 Pipidan in buí nongkon i Atai dapot kon i Elisama noyo-noyodudui in noiduduimai naa: Ki Atai Ki Natan Ki Zabad Ki Eplal Ki Obed Ki Yehu Ki Azarya Ki Heles Ki Elasa Ki Sismai Ki Salum Ki Yekamya Ki Elisama.

Buí i Kaleb

⁴² Ki Kaleb ki utat i Yerahmeel in kogadí kon adí ḷoḷaki tangoinea in ki Mesa. Sia in adí guya-guyang. Ki Mesa in ki amá i Zip, ki Zip in ki amá i Maresa, ki Maresa in ki amá i Hebron.

⁴³ Ki Hebron in kogadí kon adí ḷoḷaki taya opat: Ki Korah, ki Tapuah, ki Rekem bo ki Sema.

⁴⁴ Ki Sema in ki amá i Raham. Ki ompu i Sema tangoinea in ki Yorkeam. Ki Rekem ki guya-guyang i Sema in ki amá i Samai;

⁴⁵ Ki Samai ki amá i Maon, bo ki Maon in ki amá i Bet-Zur.

⁴⁶ Ki Kaleb in ko pahang inta tangoinea in ki Epa. Mosia in kogadí kon adí ḷoḷaki taya toḷu tangoi monia in ki Haran, ki Moza bo ki Gazes. Ki Haran in kogadí doman kon adí inta tangoinea in ki Gazes. (

⁴⁷ Intau tobatú inta ki Yohdai in tangoinea kogadí kon adí ḷoḷaki taya onom: ki Regem, ki Yotam, ki Gesan, ki Pelet, ki Epa bo ki Saap.)

⁴⁸ Ki Kaleb in ko pahang doman inta tangoinea in ki Maakha. Kon inia naa kinouḻían i Kaleb kon adí ḷoḷaki doyowa inta tangoinea in ki Seber bo ki Tirhana;

⁴⁹ Onda intua mosia in nokouḻí bui kon adí ḷoḷaki tangoinea in ki Saap bo ki Sewa. Ki Saap in inta noposindog in kotá in Madmana, bo ki Sewa in inta noposindog in kotá in Makhbena bo Gibea. Ki Kaleb in kogadí doman kon adí bobay tangoinea in ki Akhsa.

⁵⁰ Moiduduimai naa in buí doman i Kaleb: Ki Hur adí guya-guyang i Kaleb bo i buḷoinea inta ki Eprat. Ki Syobal adí i Hur in inta noposindog in kotá in Kiryat-yearim.

⁵¹ Ki Salma ki adínea nogindua in inta noposindog in kotá in Betlehem; bo ki Harep ki adínea inta nogintoḷu in inta noposindog in kotá in Bet-Gader.

⁵² Ki Syobal in inta noposindog in kotá in Kiryat-Yearim in nobaḻí mogoguyang in intau in Haroë, tongobotak in mogoguyang in intau inta nogutun kon Menuhot,

⁵³ bo mogoguyang in inanakan mita in inta nogutun kon Kiryat-Yearim, tuata in inanakan i Yetri, i Puti, i Sumati bo i Misrai. (Intau mita in kotá in Zora bo Eshtaol in intau mita inta nongkon inanakan mita tatua.)

⁵⁴ Ki Salma inta noposindog in kotá in Betlehem in mogoguyang in intau in Netopa, intau in Atarot Bet-Yoab, bo intau in Zori, inta tobatú nongkon doyowa noinanakan inta nogutun kon Manahti.

⁵⁵ Nongkon inanakan i Tirati, i Simati bo i Sukati in inta nogutun kon kotá in Yabes oyúon in intau inta mongotaau totok momais bo nomais bui kon surat mita inta moponting. Mosia tua in intau mita in Keni inta notonibuḷoi takin intau in Rekhab.