TAWARIKH 1 18 - Alkitab Singog In Mongondow Masa In Tanaa

Kinountungan mita i Daud kon parang

¹ Diá noonggot kon tua ki Datu Daud nonubu bo nonaḷow kon intau in Pilistin poḷat nogagow kon kotá in Gad takin ḻipú mita kon diugneamai.

² Ki Daud in nonaḷow doman kon intau in Moab dá notoguondokdon in mosia bo noguboḻi kon iba kon inia.

³ Onda intua ki Daud nonaḷow kon i Hadadezer, datu kon Zoba kon diug in butá in Hamat kon butá in Siria. Kon tungkuḷ intua ki Hadadezer kon bonu in binayáan sin mayá mongawasa kon butá inta kon diug in uḷuan Ongkag in Eprat.

⁴ Ki Daud in nokoagow kon 1.000 in kereta in parang, bo nodomok kon 7.000 in tontara inta tumotakoi kon kabaḷo bo 20.000 in tontara inta maya-mayá in sioḷ. Pinengkoḷannea in bayongan kabaḷo, bo sinonggagatan inta tugat pakéon kon 100 in kereta in parang.

⁵ Intau in Siria nongkon Damsyik nopotabá in tontara sin mobantung kon i Datu Hadadezer, táe sinaḷow i Daud in mosia bo noyompat kon 22.000 in intau.

⁶ Onda intua noposindog in sia in ḷoḷaigan mita in tontara kon bonu in butá monia bo notoguondokdon in mosia poḷat noguboḻi kon iba kon inia. Ki Tuhan in nopountung kon i Daud kon ondaka in poparangannea.

⁷ Kaḻeaw mita buḷawan inta pinaké in tontara i Hadadezer in inagow i Daud bo dinia pinobayá in Yerusalem.

⁸ Koḻikud intua ki Daud in nogamá doman kon nobayong totok in bitú nongkon Tibhat bo Kun, kotá mita inta dungkuḷmai kinawasa i Hadadezer. (Kon singgai noiduduimai bitú mita tatua in inaidan i Salomo bejana, bo oigi mita takin pakakat mita in ibada kon Baḷoi Tuhan.)

⁹ Ki Datu Tou nongkon Hamat in nokodongogdon kon ki Daud in ain nonaḷow kon bayongan in tontara i Hadadezer.

¹⁰ Dá nopotabá in sia kon i Yoram ki adínea ḷoḷaki sin mopoyaput in salam kon i Datu Daud bo mopotaau in singog saḷamat kon kinountungannea tatua, sin ki Hadadezer in mokakitdon in moparang i Tou. Ki Yoram in namangoi kon i Daud takin kodia-dia in tombuinag buḷawan, saḷaka bo bitú.

¹¹ Ki Datu Daud in noposumba in bayongan tombuinag tatua kon i Tuhan sin pakéon kon bonu in upacara ibada. Natua doman in inaidannea kon pakakat mita buḷawan bo saḷaka inta ain inagownea nongkon i Hadadezer bo bangusa mita inta sinaḷownea, tuata in bangusa Edom, Moab, Amon, Pilistin bo Amalek.

¹² Ki Abisai (ki inánea in ki Zeruya) in nonaḷow bo noḻimod kon 18.000 in intau in Edom kon Ḷopá in Asin

¹³ bo noposindog in ḷoḷaigan mita in tontara kon bayongan in Edom. Dá notoguondokdon in intau mita in Edom kon i Datu Daud. Ki Tuhan nobogoi in kauntungan kon i Daud kon ondaka in bayáannea poparangan.

¹⁴ Natuata in ki Daud nomarenta kon bayongan in Israel bo noḷukad sinbá rayatnea tantú popoaidan in inta moadil bo mopia.

^15-17 Naa in pojabat mita moḷantud inta dinuí i Daud: Tongguḷu totokan in tontara: ki Yoab ki guya-guyang i Abisai. Momomais in komaḻig: ki Yosapat ki adí i Ahilud. Imang mita: ki Zadok ki adí i Ahitub bo ki Ahimelek ki adí i Abyatar. Momomais in negara: ki Sausa. Tongguḷu in moḷoḷukad i datu: ki Banaya ki adí i Yoyada. Ki adí mita ḷoḷaki i Daud in nokadai kon jabatan inta moponting kon bonu in pinomarentaan.