TAWARIKH 1 17 - Alkitab Singog In Mongondow Masa In Tanaa

Ki Natan nopoyaput in koyow i Tuhan kon i Daud

¹ Naonda in ki Datu nogutundon notantú kon komaḻignea, kon singgai tobatú sia nogoiní kon i Nabi Natan bo noguman, “Indoiai, akuoi naa in nogutun kon komaḻig inta pinomia nongkon kayu ḷokuyú in Libanon, bo Poti Dodandian i Tuhan in tongábí kon bonu in ḷoḷaigan!”

² Ki Natan in notubag, “Pomiadon in bayongan inta nobaḻí niat i Tuang Datu sin ki Allah in notuḷungdon kon i Tuang Datu.”

³ Táe kon doḷom tua ki Allah in noguman kon i Natan,

⁴ “Bayádon bo pogumandon kon i Daud mogogundoi-Ku in koyow-Ku tanaa, ‘Deemanbí iko in moposindog in baḷoi kon i-Nakó.

⁵ Pinangkoipa kon bangusa in israel pinoḷuat-Ku nongkon Mesir dapot in tanaa, diápa kon dodai in onda in Akuoi in nogutun kon bonu in baḷoi tobatú. Umuranbí in Akuoi modondaḷoi bo mogutun kon ḷoḷaigan tobatú.

⁶ Kon bonu in podondaḷoian-Ku takin in bangusa in Israel diápa kon dodai in onda in Akuoi noḻibó kon itoi mita inta ain piniḻí-Ku, nongonu sin mosia in diábí noposindog in baḷoi tobatú nongkon kayu ḷokuyú in Libanon kon i-Nakó.’

⁷ Tuamai, Natan, potaaudon kon i Daud mogogundoi-Ku kon Akuoi, Tuhan Inta Mokawasa Totok in moguman kon inia, ‘Iko in ginamá-Kudon nongkon oaidanmu moḷukad kon domba kon rawang, bo binaḻí-Ku datu kon umat-Ku Israel.

⁸ Akuoi in notuḷungdon kon inimu kon ondakabí in bayáanmu, bo bayongan in musungmu iyompat-Ku kon dodai in iko noparang. Iko in baḻíon-Ku ponango-nangoian ná itoi mita inta totok in mongokawasa mita kon dunia.

^9-10 Umat-Ku Israel in pinosadiaan-Kudon kon tampat inta mobaḻí butá monia sinbá mosia in mobiagdon mopia bo diádon tuyayowon bui. Pinangkoi kon kinoangoian monia kon butá tanaa, koḻipod, bo kon dodai in mosia diápa in datu, mosia in sinubu in intau mita inta moibog in aid motogat. Táe tua in diá bidon mobaḻí bui. Akuoi in modandi kon monaḷowbí kon bayongan in musungmu, bo Akuoi in mobogoibí in buí kon inimu.

^11-12 Kon singgai moiduduimai, aka modapotdon in wakutumu matoi bo ḷobongon in iko kon poḷoḷobongan in mogoguyangmu, adímu ḷoḷaki tobatú in baḻíon-Kudon datu. Siadon in moposindog in baḷoi kon i-Nakó. Dodatuan nea in irigonan, bo kon kinoouput in dunia naa tobatú nongkon buínea in momarenta mobaḻí datu.

¹³ Akuoi in mobaḻí ki Amánea bo sia in mobaḻí ki adí-Ku ḷoḷaki. Akuoi in umuranbí mopoaid in inta mopia podudui in dandi-Ku. Dandi-Ku kon inia in umuran-Kubí kadaian, diábí ná inta pinomia-Ku kon i Saul inta ain inundud-Ku nongkon ḷoḻitúannea sinbá motaau in iko baḻíon datu.

¹⁴ Ki adímu ḷoḷaki inta piniḻí-Ku tua in baḻíon-Ku datu kon umat-Ku bo dodatuan-Ku modapot in mononoi, bo ki adí bo ki ompunea namonag in momarentabí mobaḻí datu.’ ”

¹⁵ Ki Natan in nopoyaput kon i Daud in bayongan inta ain pinoniata i Allah kon inia.

Sambayang sukur i Daud

¹⁶ Bo sinumuotdon in ki Datu Daud kon bonu in Ḷoḷaigan i Tuhan. Iḻimitú in sia bo nosambayang, “Oo Tuhan Allah, akuoi bo motoḷuadíku in diábí patus in motarima kon bayongan in kopopia inta pinoontong-Mu kon inakó naa in koonggot.

¹⁷ Noidapotbí in Iko nogaid noiḻiu kon tua, Iko in nomiadon kon dandi soaḷ buíku kon singgai moiduduimai. Nodapot in pinomia-Mudon in akuoi nobaḻí intau moḷoben.

¹⁸ Onupa in motaauku singogon kon ini-Mu, o Tuhan Allah? Iko in nonotaaudon in bayongan yagi-yagi kon mogogundoi-Mu naa, táe inogoian-Mu in kahoromatan in akuoi.

¹⁹ Podudui kon ibog-Mu tontaní, bo kopontinganku Iko in nogaidon kon bayongan oaidan moḷoben tanaa takin diá binuni-buni.

²⁰ Tongábí Iko in Allah, diábí in notongkai-Mu. Kinotaauanbí nami intua sin pinotaaudon muna nongkon koḻipodpa.

²¹ Kon sinangkub in dunia naa diábí in bangusa in ná Israel. Israel in bangusa tobatú inta pinoḷuat-Mu nongkon pinononggataan sin baḻíondon umat-Mu tontaní. Bayongan oaidan moḷoben bo inta mokoherang inta Inaidan-Mu kon i monia nokobaḻídon kon tangoi-Mu ponango-nangoian kon sinangkub in dunia. Pinoḷuat-Mu in umat-Mu nongkon Mesir, bo nopoguntun in bangusa mita ibanea kon tungkuḷ in umat-Mu minayá noparang.

²² Bangusa Israel in binaḻí-Mudon umat-Mu tontaní moidapot in mononoi. Bo Iko o Tuhan, in nobaḻí Allah monia.

²³ Tanaa, o Tuhan Allah, irigonaipa kaasí modapot in mononoi in dandi inta ain siningog-Mu kon inakó bo kon buíku. Aidaidon kaasí in onu inta ain pinodandi-Mu tatua.

²⁴ Kon ondaka in intau umuranbí mopoḷantud in tangoi-Mu bo moguman, ‘Tuhan Inta Totok Mokawasa, Sia tua in ki Allah in Israel.’ Umuranbí mononoi in intau tobatú nongkon buíku in momarentabí mobaḻí datu.

²⁵ Akuoi in nokopobarani nopoyaput in sambayang tanaa kon ini-Mu o Allah, sin Iko tontaní in nopotaaudon kon inakó kon ki adí bo ki ompuku namonag in baḻíon-Mu datu kon bangusa tanaa.

²⁶ Iko, Tuhan, in Allah, bo onu inta mopia tatua ain pinodandi-Mu kon inakó.

²⁷ Tuamai, in poigumonku, barakataidon kaasí in buíku sinbá moidapot in mononoi mosia umuran mokorasa kon tabi-Mu. Sin, Iko in nomarakatdon kon umat-Mu, o Tuhan, dá mosia in umuranbí barakatan moidapot in mononoi.”