TAWARIKH 1 16 - Alkitab Singog In Mongondow Masa In Tanaa

¹ Poti Dodandian tatua inukat kon bonu in ḷoḷaigan inta ain sinadia i Daud kon potagúan kon poti tatua. Bo noposumba in mosia kon i Allah in kuruban payongon bo kuruban dodamean.

² Naonda in ki Daud nopaḷut noposumba in kuruban mita tatua, nomarakat in sia kon rayat pinodoyon kon tangoi i Tuhan,

³ bo nosilai kon kaanon kon i monia komintan. Kon batúan in intau inta kon tua pinomayá ḷoḷaki andeka bobay nokouḻí kon ponoyá tobonsig inta ain inangag, roti bo kukis kismis.

⁴ Ki Daud in noduí kon tongonumai in intau in Lewi sin mopobayá in upacara ibada kon i Tuhan, Allah in Israel, kon tayowon i Poti Dodandian tatua, takin dondong bo dodayow.

⁵ Ki Asap in piniḻí nobaḻí itoi inta tongguḷu totok bo ki Zakharia in oḻitnea. Ki Yeiel, ki Semiramot, ki Yehiel, ki Matica, ki Eliab, ki Benaya, ki Obed Edom bo ki Yeiel in pinoki gogitogan in kecapi. Ki Asap in pinoki bongkugan in Simbal,

⁶ bo imang doyowa, inta ki Benaya bo ki Yahaziel in sinantúdon tongá mogirup kon torompet kon tayowon in Poti Dodandian tatua.

⁷ Tuata inta dungkuḷ totok ki Daud nopotabá kon i Asap bo yobayatnea mita sin mopodondong in dodayow kon i Tuhan.

Dondong dodayow i Asap bo topotakinnea mita

⁸ Posukurdon kon i Tuhan, potaaudon in kamuliaan-Nea, oumandon in oaidan-Nea kon sigad in bangusa mita.

⁹ Podondongdon in dodayow kon i Tuhan, oumandon in bayongan inta inaidan-Nea inta mokoherang.

¹⁰ Siabí in ki Tuhan inta tuḷong; koḷungangadon, sin kita naa Siabí in kitogi; bayongan inta mosumba kon i-Nia in koḷungangadon.

¹¹ Poigumdon kon ropot nongkon i-Nia, umurandon sumba in Sia.

^12-13 Ei buí i Yakub, mogogundoi i Allah! Ei buí i Israel, umat inta piniḻí-Nea! Toropdon in bayongan inta mokoherang inta inaidan-Nea, dika mokoḻiong kon kaputusan-Nea mita.

¹⁴ Ki Tuhan in Allah naton, kaputusan-Nea in popoaid kon sinangkub in dunia.

¹⁵ Sia in umuranbí monorop kon dodandian-Nea, dandi-Nea tua in mononoibí.

¹⁶ Dodandian tatua in pinomia-nea takin i Abraham, bo noiduduimai takin i Ishak,

¹⁷ bo inirigonan takin i Yakub nobaḻí dodandian inta mononoi kon umat in Israel.

¹⁸ Guman-Nea, “Butá in Kanaan in ogoi-Kubí kon inimu mobaḻí budel kapunyaanmu.”

¹⁹ Dungkuḷmai umat i Tuhan nobiag nobaḻí ango-angoi kon tua mosia in tongábí topiḻik.

²⁰ Mosia in nodondaḷoi nongkon bangusa tobatú minayá in bangusa ibanea, nomamping nongkon butá tobatú mayá in butá ibanea.

²¹ Táe diábí pinomayá i Tuhan in ki ineka in mopororiga kon i monia; popisí in mosia, datu mita inogoian-Nea in tompoingat,

²² “Dika monuyayow kon intau mita inta piniḻí-Ku, dika mogaid kon inta moraat kon nabi-Ku mita.”

²³ Podondongdon kon i Tuhan, ei bayongan butá, muḷoi in singgai potaaudon in habar mokosanang kon gina sin Sia in noposaḷamatdon kon i naton.

²⁴ Oumandon in kamuliaan-Nea kon bangusa mita, bo bayongan inta inaidan-Nea inta motoyang kon umat intau naa.

²⁵ Sin moḷobenbí in ki Tuhan bo dinayow totok; Sia in mustibí koondok moiḻiu kon bayongan in dewa.

²⁶ Dewa mita in bangusa ibanea in tongábí patong berhala táe ki Tuhan in inta nomaḻí kon toḷungayá naa.

²⁷ Sia in iḻibu in koagungan bo kamuliaan, baḷoi-Nea in nopuḻing in kawasa bo ḷunganga in gina.

²⁸ Dayowdon in ki Tuhan, ei umat intau! Dayowdon in koagungan bo ropot-Nea.

²⁹ Dayowdon in tangoi-Nea inta momulia, bo diádon in kuruban kon bonu in baḷoi-Nea. Sumbadon in ki Tuhan takin mogiḷambung in ḷambung ibada!

³⁰ Kourotdon kon tayowon-Nea, ei bayongan in intau kon dunia! Butá in noroton diá kodandúan.

³¹ Ei ḷangit bo butá, pokosanangdon! Potaaudon kon bangusa mita kon ki Tuhan tua in datu!

³² Pobokoḷdon ei dagat bo bayongan in tombonunea! Pokoḷungangadon ei bayongan in rawang bo bayongan in pinomuḷanea!

³³ Pangkoi mita in kayu kon kayuon in morogiowdon mita sin ki Tuhan in namangoidon sin momarenta kon dunia.

³⁴ Posukurdon kon i Tuhan sin mopia in Sia; tabi-Nea in mononoi.

³⁵ Singogdon, “Oo Allah, Mopoposaḷamat nami, posaḷamatdon in kami nongkon kawasa in bangusa mita bo sipundon bui in kami sinbá motaaudon in kami mopoyaput in sukur bo modayow kon tangoi-Mu inta motusi!”

³⁶ Dayowdon in ki Tuhan Allah Israel, tanaa mako modapot in mononoi! Onda intua bayongan in umat in Israel moguman, “Amin”. bo nodayow in mosia kon i Tuhan.

Pinosumbaan kon Yerusalem bo kon Gibeon

³⁷ Onda intua ki Datu Daud nonantúdon kon i Asap bo intau mita in Lewi ibanea kon umuran monompia kon soaḷ mita inta noyotogot in ibada kon tampat inta pinotagúan kon Poti Dodandian i Tuhan. Muḷoi in singgai mosia in mustibí mopobayá in oaidan monia kon tua,

³⁸ bo binantungan i Obed-Edom inta ki adí i Yedutum, bo in intau 68 ibanea inta toinanakannea. Ki Obed-Edom bo ki Hosa in moḷoḷukad kon bonawang mita.

³⁹ Táe ki Zadok bo imang mita ibanea in pinotabá umuran monompia kon ibada kon tampat pooibadaan kon Gibeon.

⁴⁰ Muḷoi in doḷo-doḷom bo moḷoḷabung mustibí in mosia moposumba in kuruban payongon kon tudu in mezbah podudui in hukum mita inta inogoi i Tuhan kon intau in Israel.

⁴¹ Ki Imang Zadok bo imang mita tatua in binantungan i Heman bo i Yedutun bo intau mita ibanea inta ain sinantú piniḻí sin mopodondong in dodayow kon i Tuhan sin tabi-Nea inta mononoi.

⁴² Ki Heman bo ki Yedutum in mogirup doman kon torompet, simbal bo pakakat in musik ibanea inta pinogogitog sin monakin kon dondong mita dodayow. Intau mita in inanakan i Yedutun in pinoki ḷukadan in bonawang mita.

⁴³ Onda intua nobuidon in bayongan intau kon baḷoinea-baḷoinea. Natua domandon ki Daud nobui sin moindoi kon motoḷuadínea.