TAWARIKH 1 14 - Alkitab Singog In Mongondow Masa In Tanaa

Bayongan inta inaidan i Daud kon Yerusalem

¹ Ki Datu Hiram nongkon butá in Tirus nopotabá in intaunea mita namangoi kon i Daud, poḷat doman nokidia in kayu ḷokuyú in Libanon bo mogogimok mita kon kayu takin bas mita in batu sin moposindog in komaḻig.

² Tuamai in noyakindon totok in ki Daud kon ki Tuhan ain nopobaḻí kon inia datu in Israel bo moginropot kon dodatuan nea sin kopontingan in umat i Tuhan.

³ Kon Yerusalem ki Daud bui nononibuḷoi kon tongonumai in bobay, bo nokouḻí bui kon adí mita.

⁴ Naa in ki adínea mita ḷoḷaki inta pinononggadí kon Yerusalem: ki Syamua, ki Sobab, ki Natan, ki Salomo,

⁵ ki Yibhar, ki Elisua, ki Elpelet,

⁶ ki Nogah, ki Nepeg, ki Yapia,

⁷ ki Elisama, ki Beelyada bo ki Elipelet.

Ki Daud nonaḷow kon bangusa in Pilistin

⁸ Naonda in kinodongogan in intau in Pilistin kon ki Daud ain dinuí nobaḻí datu kon bayongan in Israel, namangoi in mosia sin modomok kon inia. Tuamai in ki Daud iḻumuai sin moparang takin i monia.

⁹ Kon dodai intua intau in Pilistin noiyaputdon kon Ḷopá in Repaim bo nogagowdon kon ḷopá tatua.

¹⁰ Nokodongogmai kon natua ki Daud noḻibó kon i Allah, “Tuhan, degá musti tubuonku in intau mita in Pilistin tatua? Degá popountung i Tuhan in akuoi?” “Oo, tubudon!” tubag i Tuhan. “Popountung-Kubí in iko!”

¹¹ Dá ki Daud takin tontaranea mita in minayá nonubu kon intau mita in Pilistin tatua kon Baal-Perasim bo nonaḷow kon i monia. Ki Daud in noguman, “Ki Allah in nomakédon kon inakó mondangat kon poḷoḷukadan in musung ná ḷunud inta noyompat kon bayongan in yagi-yagi kon bonu in tokokiap.” Tuamai in tampat tatua sinangoian Baal-Perasim.

¹² Naonda in tontara mita in Pilistin noḷagui, mosia in diádon nokodia kon patong mita berhala monia. Pinoki tubá i Daud in patong mita tatua.

¹³ Diá noonggot kon tua intau in Pilistin namangoi bo nogagow bui kon Ḷopá in Repaim.

¹⁴ Komintanpa doman bui in ki Daud nopoigum in topotundú i Allah, bo sinubagan i Allah, “Dika monubu kon i monia nongkon naa, táe bayádon poḻibu bo tubudon in mosia nongkon ḷoḷan kon diug in pangkoi mita in murbei.

¹⁵ Aka kodongoganmu in singog inta naonda bo singog in sapatu in intau inta kon ḷuntung mita in kayu, dá bayádon poparang sin Akuoi in mayábí kon munamu sin monaḷow kon tontara in Pilistin.”

¹⁶ Ki Daud in nogaid kon onu inta pinarenta i Allah kon inia. Sia takin tontaranea mita in nomout noidapot in inumundok in tontara in Pilistin pinangkoi kon Gibeon nodapot in Gezer.

¹⁷ Dá pinonango-nangoiandon in tangoi Daud kon bayongan tampat, bo binaḻídon i Tuhan in bayongan bangusa moondok kon i Daud.