TAWARIKH 1 12 - Alkitab Singog In Mongondow Masa In Tanaa

Dumodudui mita i Daud nongkon suku Benyamin

¹ Naonda in ki Daud noḷagui kon i Datu Saul, sia minayá in Ziklag. Nobayong in pojuang inta mosatia bo kopongalaman in namangoi dinumugang kon i Daud.

² Mosia tua in nongkon suku Benyamin ná ki Saul. Mosia tua in mopandoi momiot in piot bo momakot – pinomayá ḻima koḷanan andeka ḻima koḷoigi.

^3-7 Itoi monia tua in ki Ahiezer bo ki Yoas adí mita i Semaa nongkon Gibea. Naa in pojuang mita tatua: Ki Yeziel bo ki Pelet ki adí mita i Azmawet Ki Berakha bo ki Yehu intau in Anatot Ki Yismaya intau in Gibeon, pojuang inta ponango-nangoian inta nobaḻí tobatú itoi in paanan “Tridasawira”. Ki Yeremia, ki Yahaziel, ki Yohanan bo ki Yozabad intau in Gedera Ki Eluzai, ki Yerimot, ki Bealya, ki Semarya bo ki Sepaca intau in Harupi Ki Elkana, ki Yisia, ki Azareel, ki Yoëzer bo ki Yasobam nongkon inanakan i Korah Ki Yoëla bo ki Zebaja adí mita i Yeroham intau in Gedor.

Dumodudui mita i Daud nongkon suku in Gad

⁸ Kon tungkuḷ in ki Daud kon tampat poḷoḷukadan inta kon padang gurun, nobayong in pojuang inta ponango-nangoian bo inta kopongalaman nongkon suku in Gad namangoi dinumugang kon inia. Mosia tua in pojuang mita inta mongopandoi mopomaké in kaḻeaw bo pandong; mosia tua in koontongan mongobarani komintan naonda bo singa bo ḷoḷampang monia in mokaḻet naonda bo rusa.

^9-13 Naa in tangoi mita monia inta pinipid pinodudui in pangkat: ki Ezer, ki Obaja, ki Eliab, ki Mismana, ki Yeremia, ki Atai, ki Eliel, ki Yohanan, ki Elzabad, ki Yeremia, ki Makhbanai.

¹⁴ Tongosilai nongkon intau mita in Gad tatua in porwira mita moḷantud inta nobaḻí tongguḷu kon tontara 1.000; tongosilai doman in porwira mita inta nobaḻí tongguḷu in tontara 100.

¹⁵ Nokoimontandon in nobaḻí kon buḷan imitánea, kon dodai in Ongkag in Yordan nodunuk porwira mita tatua in iḷumoḷan kon ongkag tatua bo nopoguntun in intau mita inta nogutun kon ḷopá mita pinomayá inta kon dotá pomukaan andeka inta kon dotá in toyopan kon ongkag tatua.

Dumodudui mita i Daud inta nongkon suku Benyamin bo Yohuda

¹⁶ Kon singgai tobatú topaanan in intau nongkon suku in Benyamin bo Yohuda minayá kon tampat poḷoḷukadan inta pinogutunan i Daud.

¹⁷ Ki Daud in nokipodungkuḷ kon i monia bo noguman, “Aka moiko bo namangoi saḷaku yobayat sin motuḷung kon inakó, yo koḻigai dumugangdon kon i nami. Tarimaanbí nami takin pia in gina. Táe aka makusud i monimu moposarakan kon inakó kon musung pongin akaḷ monimu, umpaka akuoi naa in diá nogaid kon inta moraat kon i monimu, yo ki Allah inta sinumba in mogoguyang naton in monotaaubí kon tua bo hukumon-Neabí in moiko.”

¹⁸ Tobatú nongkon sigad monia, inta ki Amasai, inta kon singgai noiduduimai nobaḻí itoi kon kolompó inta sinangoian “Tridasawira”. kinawasa in Roho i Allah bo noguman, “Daud, adí i Isai! Kami in mobantungbí kon inimu! Poigumon mako iko bo mosia inta motuḷung kon inimu in mokotongod. Ki Allah in nion kon dotámu.!” Dá sinarima i Daud in mosia bo binaḻíneadon in mosia porwira kon bonu in tontaranea mita.

Dumodudui mita i Daud nongkon suku Manasye

¹⁹ Kon tungkuḷ in ki Daud noyotakin in intau in Pilistin monayow kon i Datu Saul, tongosilai nongkon tontara in suku Manasye iḷumoḷan namangoi kon i Daud. Sabanarnea ki Daud in diábí notuḷung kon intau mita in Pilistin tatua. Itoi mita in Pilistin nopotabádon kon inia mobui kon Ziklag sin moondok in mosia dika-dikabo ḷumoḷan in sia mayá kon i Datu Saul bo dumugang bo mopororiga kon i monia.

²⁰ Naa in tangoi mita in pojuang mita inta nongkon suku Manasye inta iḷumoḷan namangoi dinumugang kon i Daud kon tungkuḷ in kon binayáan kon Ziklag: ki Adnah, ki Yozabad, ki Yadiael, ki Mikhael, ki Yozabad, ki Elihu, bo ki Ziletai. Kon batúannea itoi in tontara 1.000.

²¹ Mosia tua in pojuang inta motorindog bo noduḷu kon i Daud nonayow kon banselang. Kon singgai noiduduimai mosia in nobaḻí porwira mita kon bonu in tontara mita in Israel.

²² Gogió bo muḷoi in singgai oyúon in intau mobagu inta dumugang kon i Daud, dá diádon noonggot kon tua bo tontara i Daud in nobaḻídon nobayong totok.

Kororopot in tontara i Daud

^23-37 Kon dodai in ki Daud kon Hebron nobayong in pojuang inta ain nobiasa noparang in dinumugang kon inia. Mosia in noduḷu kon inia sinbá mobaḻí datu in sia momaḷui kon i Saul, podudui in dandi i Tuhan. Naa in kobayong monia: Nongkon suku in Yohuda: 6.800 in intau, notouḷut takin kaḻeaw bo pandong. Nongkon suku Simeon: 7.100 in intau mita inta notalati. Nongkon suku Lewi: 4.600 in intau. Intau mita i Yoyada inta itoi in buí i Harun: 3.700 in intau. Ginaḷum motoḷuadí i Zadok, pojuang mobagupa inta mobarani: 22 in intau – komintan tongguḷu in motoḷuadí. Nongkon suku Benyamin (suku i Datu Saul): 3.000 in intau; mobayo-bayong in nongkon suku Benyamin in tantúbí mosatia kon i Saul. Nongkon suku Epraim: 20.800 in intau inta ponango-nangoian kon bonu in batúan inanakannea. Nongkon suku Manasye inta kon dotá in toyopan kon Ongkag in Yordan: 18.000 in intau inta sinundú moduí kon i Daud mobaḻí datu. Nongkon suku Isakhar: 200 in itoi takin intau mita monia: itoi mita tanaa in mongopandoi monantú kon onu in musti aidan in rayat in Israel kon wakutunea. Nongkon suku Zebulon: 50.000 in intau inta mongopandoi mopomaké in noyagi-yagimai in pakakat in parang, bo mosadiadon moparang; mosia tua in intau mita inta mosatia bo inta motaau pirisayaan totok. Nongkon suku Naptali: 1.000 in itoi takin 37.000 in tontara inta notouḷut takin kaḻeaw bo pandong. Nongkon suku Dan: 28.600 in intau inta notalati. Nongkon suku Asyer: 40.000 in intau inta nosadiadon moparang. Nongkon suku mita kon dotá in pomukaan kon Yordan, inta suku Ruben, Gad bo tongosilai in suku Manasye: 120.000 in intau inta mopandoi mopomaké in bayongan pakakat in parang.

³⁸ Bayongan in pojuang tatua minayá in Hebron kon bonu in kaadaan mosadiadon moparang bo moniatdon moduí kon i Daud mobaḻí datu in bayongan in Israel. Bo bayongan in intau in Israel inta ibanea in notongkai doman in raian kon mogaid kon tua.

³⁹ Toḷu nosinggai in koonggotnea pojuang mita tatua nogutun kon tua takin i Daud sindaḷan nomia kon rame bo nongaan nonginum kon bayongan inta sinadia kon i monia in intau mita in Israel ibanea.

⁴⁰ Nongkon suku mita inta kon dotá in utuan inta moyayú tuata inta nongkon suku in Isakhar, Zebulon bo Naptali, in moroangoi takin sinumakoi kon keledai, unta, bagal, bo sapi inta nopuḻing in bahan kokaanon: topong, bungai in ara, kismis, anggur bo ḷana in zaitun. Mosia in nodia doman kon sapi bo domba sin ratáan bo kaanon. Bayongan in intua noponiata kon totuu mosanang in rayat kon bayongan in Israel.