TAWARIKH 1 11 - Alkitab Singog In Mongondow Masa In Tanaa

Ki Daud nobaḻí datu kon Israel bo kon Yohuda

¹ Bayongan itoi in bangusa in Israel namangoi kon i Daud kon Hebron bo noguman, “Kami in ginaḷumbí i Tuang Datu.

² Nongkon koḻipodpabímai, sedang bo kon dodaipabí in ki Saul nomarentapa kon inami, ki Tuang Datubí in nobaḻí itoi in tontara in Israel pomuḷoi in mayá moparang. Apa doman ki Tuhan Allah i Tuang Datu in nodandidon kon ki Tuang Datubí in mobaḻí itoi in umat-Nea bo mobaḻí datu monia.”

³ Dá ki Daud in nomia kon dodandian takin itoi mita in Israel tatua. Bo dinuídon monia in sia nobaḻí datu in Israel ná inta ain pinodandi i Tuhan pinongin i Samuel.

⁴ Kon singgai tobatú ki Datu Daud takin bayongan in tontara in Israel minayá nonubu kon kotá in Yerusalem. Kon dodai intua kotá tatua tangoinea in Yebus, bo pinogutunan in intau in Yebus, intau mita taakan in kotá tatua.

^5-7 Intau mita in Yebus in nogumandon kon i Daud, kon diábí in sia mokotuot kon kotá monia tatua. Táe ki Daud in nokoḷongasibí nogagow kon poḷoḷukadan monia inta sinangoian Sion. Kon dodai intua ki Daud ain nopotaau kon intaunea mita kon intau inta muna totok moḻimod kon intau in Yebus in mobaḻíbí tongguḷu totok in tontara. Dá popisí in ki Yoabdon inta muna-munamai minayá nonubu kon intau in Yebus, dá dinuí in sia nobaḻí tongguḷu totok in tontara. (Ki iná i Yoab tangoinea in ki Zeruya). Naonda in nokoagow kon poḷoḷukadan Sion, ki Daud nogutun kon tua. Tuamai nongkon dodaidon intua poḷoḷukadan tatua in sinangoidon “Kotá i Daud”.

⁸ Ki Daud in bui noposindog in kotá tatua pinangkoi kon tampat inta binumbunan in butá kinoḷantud inta kon dotá in pomukaan kon buḷud; onda intua oaidan tatua iningguputandon i Yoab noidapot in noḷapat.

⁹ Koonggot-koonggot koropot-koropotdon in ki Daud, sin ki Tuhan Inta Totok in mokawasa notuḷung kon inia.

Tontara mita i Daud inta ponango-nangoian

¹⁰ Naa in tangoi in porwira mita i Daud inta ponango-nangoian. Takin bayongan in rayat in Israel, mosia in noḷongasidon totok sinbá ki Daud in mobaḻí datu ná inta ain pinodandi i Tuhan. Bo mosia in umuranbí moibog kon pomarentaannea.

¹¹ Porwira inta muna totok in ki Yasobam intau in Hakhmoni, sia in itoi in “Triwira”. Nokoimontandon kon bonu in pinoparangan sia in nonayow kon 300 in intau bo nodaitnea iḻimod in pandongnea.

¹² Intau nogindua kon bonu in triwira tatua in ki Eleazar adí i Dodo nongkon inanakan i Ahohi.

^13-14 Kon bonu in pinoparangan kon Pas-Damim sia in irumopot kon dotá i Daud nonayow kon intau in Pilistin. Kon dodai in tontara in Israel nomangkoidon noḷagui, sia takin in intaunea mita in umuran nonayow kon yua-yuak in tobatú gobá in gandum bo noparang nonayow kon intau mita in Pilistin tatua. Bo pinopountung totok i Tuhan in sia.

^15-16 Kon singgai tobatú intau toḷu inta kon sigad in porwira i Daud 30 inta noiḷontú totok, minayá nokipodungkuḷ kon i Daud kon tampat tobatú inta oyúon in poḷoḷukadan kon buḷud batu tobatú kon diug in Angob in Adulam. Kon dodai intua intau in Pilistin nononḷoḷaigan kon Ḷopá in Repaim, bo tongopaanan in tontara monia in nokoagowdon kon Betlehem.

¹⁷ Nokotanob in ki Daud kon ḻipúnea tatua bo noguman, “Ah, aka kuma bo akuoi inogoian in tubig inumon nongkon parigí inta kon diug in bonawang in Betlehem.”

¹⁸ Nokodongogmai kon tua, porwira toḷu tatua minayá nondangat kon pinononḷoḷaigan in intau in Pilistin bo nonangkob kon tubig in parigí tatua, onda intua dinia monia kon i Daud. Táe doí in ki Daud nonginum, binutakneabí nobaḻí sosumba kon i Tuhan.

¹⁹ Noguman in sia, “Podoyon kon i Allah, akuoi in diábí motaau in monginum kon tubig tanaa! Aka inumonku, yo naonda bo akuoi in nonginum kon dugú in intau mita inta ain noponoḻiu in nyawa monia!” Dá totokbí in doí in ki Daud nonginum kon tubig tatua. Tuata in inaidan mita in porwira taya toḷu tatua.

^20-21 Toḷu nopuḷú in porwira inta ponango-nangoian tatua sinangoian doman “Tridasawira.” Mosia in sinongganutan i Abisai ai-ai i Yoab. Nokoimontandon in sia nokoḻimod kon 300 in intau tongá nomaké in pandongnea, tuamai in nobaḻídon ponango-nangoian in sia. Táe sia in diábí ná kotoyang in Triwira tatua.

²² Porwira tobatú ponango-nangoian ibanea in ki Benaya adí i Yoyada, intau in Kabzeel. Mobarani totok in sia. Pahlawan moḷoben doyowa nongkon Moab iḻimodneadon. Nokoimontandon kon singgai tobatú inta oyúon in salju sinumuot in sia kon angob tobatú bo noḻimod kon singa tobatú kon tua.

²³ Nokoimontan domandon in sia noḻimod kon intau in Mesir inta moḷoben in awaknea, koḷantudnea in noiḻiu kon doyowa nometer. Intau tatua in nomaké in pandong inta moḷoben totok, táe tongá sinayowan i Benaya in bobobak. Pandong inta kokada-kadai in intau in Mesir tatua inagownea bo pinoḻimodnea kon intau tatua.

²⁴ Tuata in inaidan mita i Benaya, intau tobatú nongkon sigad in intau inta kon Tridasawira.

²⁵ Kon bonu in paanan tatua ki Benayabí naa inta noiḷontú, táe sia in diábí ná kotoyang in Triwira. Dinuí i Daud in sia nobaḻí tongguḷu in moḷoḷukadnea.

^26-47 Noiduduimai naa in porwira mita ibanea inta ponango-nangoian: Ki Asael ai-ai i Yoab Ki Elhanan ki adí i Dodo intau in Betlehem Ki Samot intau in Harod Ki Heles intau in Peloni Ki Ira ki adí i Ikes intau in Tekoa Ki Abiezer intau in Anatot Sibkhai intau in Husa Ki Ilah intau in Ahohi Ki Maharai intau in Netopa Ki Heled ki adí i Baana intau in Netopa Ki Itai ki adí i Ribai intau in Gibea kon butá in suku Benyamin Ki Benaya intau in Piraton Ki Hurai intau in ḷopá mita in Gaas Ki Abiel intau in Araba Ki Azmawet intau in Bahurim Ki Elyahba intau in Saalbon Ki Hasyem intau in Gizon Ki Yonatan ki adí i Sage intau in Harari Ki Ahiam ki adí i Sakhar intau in Harari Ki Elipal ki adí i Ur Ki Heper intau in Mekherati Ki Ahia intau in Peloni Ki Hezrai intau in Karmel Ki Naarai ki adí i Ezbai Ki Yoël ki utat i Natan Ki Mibhar ki adí i Hagri Ki Zelek intau in Amon Ki Naharai intau in Beerot, mododia kon pakakat in parang i Yoab Ki Ira bo ki Gareb intau in Yetri Ki Uria intau in Het Ki Zabab ki adí i Ahlai Ki Adina ki adí i Siza (intau tobatú inta sinon itoi kon suku i Ruben inta tontaranea in 30) Ki Hanan ki adí i Maakha Ki Yosapat intau in Mitni Ki Uzia intau in Asytarot Ki Syama bo ki Yeiel, ki adí mita i Hotam, intau in Aroër Ki Yediael bo ki Yoha, ki adí mita i Zimri intau in Tizi Ki Eliel intau in Mahawim Ki Yeribai bo ki Yosawya, ki adí mita i Elnaam Ki Yitma intau in Moab Ki Eliel, ki Obed bo ki Yaasiel intau in Mezobaya.