TAWARIKH 1 1 - Alkitab Singog In Mongondow Masa In Tanaa

Nongkon i Adam nodapot kon i Abraham Nongkon i Adam noidapot kon i Nuh

^1-4 Tangoi mita in mogoguyang in bangusa in Israel nongkon i Adam noidapot kon i Nuh, ná noiduduimai tanaa: Adam Set Enos Kenan Mahalaleel Yared Henokh Metusalah Lamekh Nuh. Ki adí ḷoḷaki i Nuh in taya toḷu: Ki Sem, ki Ham bo ki Yapet.

Bangusa mita buí i Nuh

⁵ Ki adí mita ḷoḷaki i Yapet in ki Gomer, ki Magog, ki Madai, ki Yawan, ki Tubal, ki Mesekh bo ki Tiras. Mosia tua in mogoguyang in bangusa mita inta sinangoian pinodudui in tangoi monia.

⁶ Buí i Gomer in intau in Askenas, Ripat bo Togarma.

⁷ Buí i Yawan in intau in Elisa, Spanyol, Siprus bo Rodes.

⁸ Ki adí mita ḷoḷaki i Ham in Kus, Mesir, Libia bo Kanaan. Mosia in nobaḻí mogoguyang in bangusa mita inta sinangoian pinodudui in tangoi monia.

⁹ Buí i Kus in intau in Seba, Hawila, Sabta, Raema bo Sabtekha. Buí i Raema in intau mita in Syeba bo Dedan. (

¹⁰ Ki Kus in kogadí kon adí ḷoḷaki tobatú ki Nimrod in tangoinea, sia inta nobaḻí datu motorindog inta totok in muna kon dunia.)

¹¹ Buí i Mesir in intau mita in Lidia, Anamim, Lehabim, Naptuhim,

¹² Patrusim, Kasluhim, bo Kreta. Mosia tuata inta nobaḻí mogoguyang in intau in Pilistin.

¹³ Ki adí mita ḷoḷaki i Kanaan in ki Sidon, inta guya-guyang, bo ki Het. Mosia tua in mogoguyang in bangusa mita inta sinangoian pinodudui in tangoi monia.

¹⁴ Ki Kanaan in mogoguyang doman in intau in Yebusi, Amori, Girgasi,

¹⁵ Hewi, Arki, Sini,

¹⁶ Arwadi, Semari bo Hamati.

¹⁷ Ki adí mita ḷoḷaki i Sem in ki Elam, ki Asyur, ki Arpakhsad, ki Lud, ki Aram, ki Us, ki Hul, ki Geter bo ki Mesekh. Mosia tua in mogoguyang in bangusa mita inta sinangoian pinodudui in tangoi monia.

¹⁸ Ki Arpakhsad in ki amá i Selah, bo ki Selah in ki amá i Eber.

¹⁹ Ki Eber in kogadí kon adí ḷoḷaki doyowa; inta guya-guyang tangoinea in ki Peleg sin kon wakutunea bangusa mita kon dunia naa in nosila-silai; inta nogindua tangoinea in ki Yoktan.

²⁰ Buí i Yoktan in intau in Almodad, Selep, Hazar-Mawet, Yerah,

²¹ Hadoram, Uzal, Dikla,

²² Ebal, Abimael, Syeba,

²³ Opir, Hawila bo Yobab.

Nongkon i Sem noidapot kon i Abraham

^24-27 Tangoi mita in mogoguyang in bangusa in Israel nongkon i Sem noidapot kon i Abraham in ná noiduduimai tanaa: Sem Arpakhsad Selah Eber Peleg Rehu Serug Nahor Terah Abram (inta sinangoian doman ki Abraham).

Buí i Ismael

²⁸ Ki Abraham in kogadí kon adí ḷoḷaki doyowa, ki Ishak bo ki Ismael.

²⁹ Naa in ki adí mita i Ismael: ki Nebayot, inta guya-guyang, bodongka ki Kedar, ki Adbeel, ki Mibsam,

³⁰ ki Misma, ki Duma, ki Masa, ki Hadad, ki Tema,

³¹ ki Yetur, ki Napis bo ki Kedma.

Buí i Abraham bo i Ketura

³² Ki Abraham in nokotonggadí doman kon i Ketura in adí mita ḷoḷaki inta: ki Zimran, ki Yoksan, ki Medan, ki Midian, ki Isybak bo ki Suah. Ki Yoksan in kogadí kon ḷoḷaki inta: ki Syeba bo ki Dedan.

³³ Ki Midian in kogadí kon adí mita ḷoḷaki inta: ki Epa, ki Eper, ki Hanokh, ki Abida bo ki Eldaa.

Buí i Esau adí i Ishak

³⁴ Ki Ishak ki adí i Abraham in kogadí kon adí ḷoḷaki doyowa, ki Esau bo ki Yakub (inta sinangoi doman Israel).

³⁵ Ki adí mita ḷoḷaki i Esau in ki Elipas, ki Rehuel, ki Yeus, ki Yaelam bo ki Korah.

³⁶ Ki Elipas in mogoguyang in suku Téman, ki Omar, ki Zepi, ki Gaetam, ki Kenas, ki Timna bo ki Amalek.

³⁷ Ki Rehuel in mogoguyang in suku Nahat, Zerah, Syama bo Miza.

Intau taakan kon butá in Edom

^38-42 Intau taakan inta nogutun kon butá in Edom in buí mita i adí i Seir, inta ki Lotan, ki Syobal, ki Zibeon, ki Ana, ki Disyon, ki Ezer bo ki Disyan. Adí mita ḷoḷaki i Lotan in ki Hori bo ki Homam. Ki Lotan naa in oyúon ki bobaynea tangoinea in ki Timna. Adí mita ḷoḷaki i Syobal in ki Alyan, ki Manahat, ki Ebal, ki Syepi bo ki Onam. Adí mita ḷoḷaki i Zibeon in ki Aya bo ki Ana. Adí i Ana in ki Disyon, bo ki adí i Disyon in ki Hamran, ki Esyban, ki Yitran bo ki Keran. Adí mita ḷoḷaki i Ezer in ki Bilhan, ki Zaawan bo ki Yaakan. Adí mita ḷoḷaki i Disyan in ki Us bo ki Aran.

Datu mita in Edom

^43-50 Kon dodai in diápa in datu inta nomarenta kon Israel, yo butá in Edom in pinarentaandon in datu inta noyodudu-duduimai tanaa: Ki Bela ki adí i Beror nongkon Dinhaba Ki Yobab ki adí i Zerah nongkon Bozra Ki Husyam nongkon butá in intau in Téman Ki Hadad ki adí i Bedad nongkon Awit (sia tua inta nonaḷow kon intau in Midian kon pinoparangan kon butá Moab), Ki Samla nongkon Masyreka Ki Saul nongkon Rehobot kon bingkí in ongkag Ki Baal-Hanan ki adí i Akhbor Ki Hadad nongkon Pahi (ki buḷoinea tangoinea in ki Mehetabeel, ki adí i Matred ki ompu i Mezahab).

⁵¹ Bangusa in Edom tua in suku in Timna, Alya, Yetet,

⁵² Oholibama, Ela, Pinon,

⁵³ Kenas, Téman, Mibzar,

⁵⁴ Magdiel bo Iram, kon batúannea pinodudui kon tangoi in tongguḷu in sukunea.