SAMUEL 2 9 - Alkitab Singog In Mongondow Masa In Tanaa

Ki Daud bo ki Mepiboset

¹ Kon singgai tobatú noḻibó in ki Daud, “Oyúonpa degá in nobiag in intau nongkon motoḷuadí i Saul? Aka oyúonpa, yo akuoi in moibog mopoaid in mopia kon inia sin motuḻí kon aid mopia i Yonatan.”

² Motoḷuadí i Saul ko ata tangoinea in ki Ziba, bo pinotabá in sia namangoi kon tayowon i Datu Daud. Ki Datu in noḻibó, “Iko nion degá in ki Ziba?” “Oo, Tuang datu,” tubagnea.

³ Onda intua noḻibó in ki datu, “Oyúonpa degá in nobiag in intau nongkon motoḷuadí i Saul? Moibog in akuoi mopoaid kon inta mopia kon inia, ná inta ain pinodandiku kon i Allah.” Ki Ziba in notubag, “Oyúonpa in ki adí ḷoḷaki tobatú Yonatan. Nosedó i bobayánea.”

⁴ “Kon onda in sia?” iḻibó i datu. “Kon Lodebar, kon baḷoi i Makhir adí i Amiel,” tubag i Ziba.

⁵ Bo ki Datu Daud nokioiní kon adí ḷoḷaki i Yonatan tatua.

⁶ Ki Mepiboset in tangoi adí ḷoḷaki i Yonatan tatua. Naonda in namangoi in sia, sinumungkud in sia nohoromat kon i Daud. Ki Daud nokuuk kon inia, kainia, “Mepiboset,” bo sia notubag, “Ya, Tuang datu.”

⁷ Ki Daud in noguman, “Dika moondok. Akuoi in motuḷung bo motabibí kon inimu sin motabi in akuoi kon i Yonatan ki amámu. Bayongan in butá i ḷakimu ki Saul, in ogoikudon bui kon inimu bo kinoouputbí in kinobiaganmu motaaubí in iko mongaan kon komaḻig.”

⁸ Ki Mepiboset in sinumungkud bui bo noguman, “Onubí in mangaḻe in kobiagan in bobantung naa! Nongonu sin ki Tuang datu in ná domai tua in kopopia kon inakó bobantung naa?”

⁹ Bo inoiní i datu in ki Ziba inta ata i Saul tatua, bo noguman, “Bayongan inta sinaḷáan i Saul bo motoḷuadínea in ogoikudon kon i ompu i tuangmu naa.

¹⁰ Iko bo ki adímu mita takin bobantungmu in mustibí monompinomuḷa kon butá tatua sin kopontingan in motoḷuadí i tuangmu ki Saul, bo ogoidon in bungai in pinomuḷa tatua kon i monia sinbá oyúon in pakéon monia kon kobiagan. Táe ki Mepiboset in motaaubí in mongaan kon komaḻig in kinoouput in kinobiagannea.” (Ki Ziba in kogadí kon ḷoḷaki 15 bo atanea in 20.)

¹¹ Ki Ziba in notubag kon i datu, “Bayongan in parenta i Tuang Datu in aidanbí in bobantung.” Dá ki Mepiboset in nongaanbí noyotakin i datu, ná ki adí ḷoḷaki i Datu Daud tontaní.

¹² Ki Mepiboset in kogadí kon ḷoḷaki inta ki Mikha in tangoinea. Bayongan in motoḷuadí i Ziba in nobaḻíbí bobantung mita i Mepiboset.

¹³ Natuata in nobaḻí kon i Mepiboset inta nopelong in sioḷnea doyowa tua in nogutun kon Yerusalem bo umuran nongaan kon komaḻig.