SAMUEL 2 8 - Alkitab Singog In Mongondow Masa In Tanaa

Kinountungan mita i Daud kon bonu in parang

¹ Noiduduimai kon tua ki Datu Daud nonubu bui kon intau in Pilistin. Sinaḷownea in mosia bo poḷat nogagow kon butá monia.

² Ki Daud in nonaḷow doman kon intau in Moab. Pinoki siugannea in mosia kon butá, bodongka iḻimodnea in intau doyowa kon sigad in pomuḷoi in intau toḷu. Dá intau in Moab notogu ondokdon kon i Daud bo noguboḻi kon pajak kon inia.

³ Noiduduimai kon tua nonaḷow in ki Daud kon i Datu Hadadezer adí i Rehob inta nomarenta kon Zoba, dodatuan tobatú inta kon diug in Damsyik. Kon tungkuḷ intua ki Hadadezer kon bonu in binayáan sin mopoguḻit bui in kawasa nea kon butá inta kon diug in uḷuan in Ongkag in Eprat.

⁴ Ki Daud in nodomok kon 1.700 in tontara inta sinumakoi kon kabaḷo bo 20.000 in tontara inta minaya-mayá in sioḷ. Pinengkoḷannea in bayongan kabaḷo, koḻikudon in tongosilai, inta tugat pakéon kon kereta in parang mogatut.

⁵ Intau in Siria nongkon Damsyik nopotabá mangoi in tontara sin motuḷung kon i Datu Hadadezer. Táe sinaḷow i Daud in mosia poḷat noḻimod kon 22.000 in intau nongkon i monia.

⁶ Onda intua ki Daud noposindog in ḷoḷaigan mita in tontara kon bonu in butá monia, bo motoguondok in mosia bo moguboḻi kon pajak kon inia. Ki Tuhan in nopountung kon i Daud kon ondakabí in bayáannea poparangan.

⁷ Kaḻeaw mita inta pinomia nongkon buḷawan inta pinaké in tontara i Hadadezer inagow in Daud bo dinia kon Yerusalem.

⁸ Koḻikud intua nogamá doman in ki Daud kon bitú inta mobayong totok nongkon Betah bo Berotai, kotá mita inta koḻipod kinawasa i Hadadezer.

⁹ Kinondongogandon i Datu Tou inta nongkon Hamat kon ki Daud in nonaḷow kon bayongan tontara i Hadadezer.

¹⁰ Dá nopotabá in sia kon i Yoram ki adínea ḷoḷaki sin mopoyaput in salam kon i Datu Daud bo mopoyaput in tosingogon saḷamat kon kinountungannea tatua, sin ki Hadadezer in mokakitdon in moparang takin i Tou. Ki Yoram in namangoi kon i Daud kodia-dia in tombuinag nobayong nongkon buḷawan, saḷaka bo bitú.

^11-12 Ki Datu Daud in noposumba in bayongan tombuinag tatua kon i Tuhan sin pakéon kon bonu in upacara poibadaan. Natua doman in pinogogaidnea kon bayongan pakakat buḷawan bo saḷaka inta ain inagownea nongkon i Hadadezer bo bangusa mita inta sinaḷownea, inta bangusa in Edom, Moab, Amon, Pilistin bo Amalek.

¹³ Tangoi i Daud nodungangdon ponango-nangoian kon dodai in sia nobui naonda in noḻimod kon 18.000 in intau in Edom kon Ḷopá in Asin.

¹⁴ Noposindog in sia in ḷoḷaigan mita in tontara kon bayongan in Edom, bo intau mita in Edom tatua notoguondokdon kon inia. Ki Tuhan in nopountung kon i Daud kon ondaka in bayáannea poparangan.

¹⁵ Natuata in nobaḻí ki Daud nomarenta kon bayongan in Israel bo noḷukad sinbá rayatnea in umuran koadilon bo kopiaan in pomomarenta.

^16-17 Naa in pomarenta mita moḷantud inta dinuí i Daud: Tongguḷu totokan in tontara: Ki Yoab adí i Zeruya; Momomais in komaḻig: ki Yosapat adí i Ahilud; Imang mita: ki Zadok adí i Ahitub, bo ki Ahimelek adí i Abyatar; Momomais in negara: ki Seraya

¹⁸ Tongguḷu in moḷoḷukad tontaní i datu: ki Benaya adí i Yoyada; Imang mita kon komaḻig: ki adí mita ḷoḷaki i Daud.