SAMUEL 2 6 - Alkitab Singog In Mongondow Masa In Tanaa

Poti Dodandian dinia kon Yerusalem

¹ Noiduduimai kon tua buidon in ki Daud nogoiní kon tontara mita inta totok in mongopia sinbá moyosipun, kobayongnea in 30.000 in intau.

² Mosia in dinianea nopobayá ná Baale-Yohuda, sin mayá intua mogamá kon Poti Dodandian inta dinonoi takin tangoi i Tuhan Inta Totok in Mokawasa inta nongawasa kon ḻimonik in kerub mita.

³ Poti Dodandian tatua in ginamá nongkon baḷoi i Abinadab kon tudu in buḷud bo pinopodatog kon roda inta mobagu. Bo ki Uza taya dua i Ahio, adí mita i Abinadab dinumudui kon roda tatua; ki Uza in minayá kon sínea,

⁴ bo ki Ahio in minayá kon munanea.

⁵ Ki Daud bo bayongan in bangusa Israel minayá kon muna in Poti tatua sindaḷan motayok inimibo-ibogbí bo nodondong sin mohoromat kon i Tuhan. Nopogogitog in mosia in kecapi, gambus, rebana, kelentingan bo simbal.

⁶ Naonda in mosia nodapot kon tampat poḷoḻintogan kon gandum i Nakhon, sapi mita inta nogugut kon roda tatua in noidumpak, bo ki Uza in notonggó kon ḻimanea sin potonoi kon Poti in Dodandian tatua sinbá diá moḷabú.

⁷ Bo kon dodaipa doman tatua ki Tuhan sinumorú kon i Uza, sin aidnea tatua in mopoompábímai kon i Tuhan. Iḻimod-Nea in ki Uza kon tampat tatua, kon diug in Poti Dodandian.

⁸ Dá pinangkoi kon dodai intua tampat tatua sinangoian Peres-Uza. Ki Daud sinumorú sin ki Tuhan in noḻimod kon i Uza.

⁹ Táe moondok doman in ki Daud kon i Tuhan bo noguman, “Yo naonda in pododiaku kon Poti in Dodandian tatua?”

¹⁰ Tuamai in doídon in sia modia kon Poti in Dodandian tatua mayá in Yerusalem, táe sinagúneadon kon baḷoi i Obed-Edom intau in Gat.

¹¹ Poti Dodandian tatua in toḷu nobuḷan in kon tua, bo ki Tuhan in nomarakat kon i Obed-Edom takin motoḷuadínea.

¹² Dinongogdon i Datu Daud kon ki Tuhan in nomarakatdon kon motoḷuadí i Obed-Edom takin bayongan in kapunyaannea popisí in Poti Dodandian tatua. Dá minayádon in sia kon baḷoi i Obed-Edom, nogamá kon Poti Dodandian tatua sin pampingon kon Yerusalem takin pia in gina.

¹³ Naonda in intau mita inta nobuat kon Poti Dodandian tatua aindon onom noḷangkad in binayáan, pinoki gogaianpa i Daud in mosia. Bo noposumba in sia in kuruban kon i Tuhan, sosumbanea tua in sapi koḷakian bo ki adí in sapi inta iḷongóan.

¹⁴ Onda intua notayokdon totok in ki Daud takin ḷunganga in gina sin mohoromat kon i Tuhan. Kon dodai intua tongá in sia nomaké in sosapi linen inta nopoḷok inta sinogot kon ogotannea.

¹⁵ Natuata in nobaḻí ki Daud bo bayongan in rayat in Israel nomamping kon Poti in Dodandian tatua kon Yerusalem, sinakinan in giow bo singog in torompet.

¹⁶ Naonda in Poti tatua diniadon potuoton kon bonu in kotá, ki Mikhal adí bobay i Saul iḷumongow nongkon jandela bo inontongnea in ki Datu Daud ḷumansi-ḷansik in motayok sin mohoromat kon i Tuhan, bo nooyá in ki Mikhal in nokoontong kon i Daud.

¹⁷ Poti in Dodandian tatua in inukat kon tampatnea kon bonu in ḷoḷaigan inta pinosindog i Daud sin pogukatan kon Poti tatua. Onda intua ki Daud noposumba in kuruban dodamean kon i Tuhan.

¹⁸ Bo sia in nomarakat kon rayat in Israel pinodoyon kon tangoi i Tuhan Inta Totok in Mokawasa.

¹⁹ Bodongka nosilai kon kaanon kon i monia komintan. Bayongan in intau inta kon tua, ḷoḷaki andeka bobay inogoiannea in ponoyá tumongo bonsig inta inangag, roti bo kukis kismis. Nopaḷut mako kon tua nobuidon in mosia kon baḷoinea-baḷoinea.

²⁰ Kon tungkuḷ in mobuidon in ki Daud kon komaḻig sin mopoyaput in salam kon motoḷuadínea, iḻumuai in ki Mikhal nokipodungkuḷ kon i Daud bo noguman, “Singgai in naa datu in Israel totu-totuudon nopohoromat kon awaknea tontaní! Nomilangdon in sia naonda bo intau dondunguḷ inta diádon kooyá kon tayowon in ata mita bobay buḷoi in pogawai mita in komaḻig!”

²¹ Ki Daud in notubag, “Akuoi naa in notayok sin mohoromatbí kon i Tuhan, inta ain nondoí kon i amámu bo kon motoḷuadínea, bo nomiḻí kon inakó nobaḻí itoi in Israel, umat-Nea. Tuamai umuranbí in akuoi motayok sin mohoromat kon i Tuhan.

²² Nodapotbí in akuoi in motarimabí kon singkuḻe inta moiḻiu kon ná koina. Motaaubí in iko in mokopoompámai kon i akuoi, táe ata mita inta sinangoimu mita koina, in mohoromatbí kon inakó!”

²³ Ki Mikhal, adí bobay i Saul tatua in diábí nokouḻí kon adí kinoouputbí in kinobiagannea.