SAMUEL 2 3 - Alkitab Singog In Mongondow Masa In Tanaa

¹ Parang kon sigad in intau mita inta moibog kon motoḷuadí i Saul bo intau mita inta moibog kon i Daud tantúpa doman mobaḻí. Ki Daud in kodugang-kodugangdon in ropotnea, bo musungnea in koyangkó-koyangkódon.

Ki adí mita ḷoḷaki i Daud

² Moiduduimai naa in adí mita ḷoḷaki i Daud inta pinononggadí kon Hebron, Ki Amnon. Ki inánea in ki Ahinoam nongkon Yizreel.

³ Ki Kileab. Ki inánea in ki Abigail, ki baḷú i Nabal nongkon Karmel. Ki Absalom. Ki inánea in ki Maakha, adí bobay i Datu Talmai nongkon Gesur.

⁴ Ki Adonia. Ki inánea in ki Hagit. Ki Sepaca. Ki inánea in ki Abital.

⁵ Ki Yitram. Ki inánea in ki Egla. Adí ḷoḷaki i Daud taya onom tatua in pinononggadí kon Hebron.

Ki Abner dinumugangdon kon i Daud

⁶ Kon dodai in parang kon sigad in intau mita inta moibog kon i Daud bo inta moibog kon motoḷuadí i Saul koyogotpa in mobaḻí, ki Abner in moḷongasidon totok sinbá sia in totokdon kopirisayaan bo koibog in intau mita inta moibog kon i Saul.

⁷ Kon singgai tobatú ki Isyboset, adí ḷoḷaki i Saul, noponapud kon ki Abner in nosiugdon noyotakin i buḷoi amánea inta ki Rizpa adí i Aya.

⁸ Bo sinumorúdon totok in ki Abner poḷat noguman, “Degá kai Tuangkumai akuoi naa in mondoí bidon kon i Saul bo momihakdon kon Yohuda? Nongkon dungkuḷpabímai in akuoi ain notoindudui kon i Saul ki amá i Tuang, bo kon bayongan in ginaḷumnea takin yobayatnea mita. Akuoi in notuḷungdon kon i Tuangku nodapot in diá kinotaḷowan i Daud. Umpaka natua yo ki Tuangku in mopoompábímai kon inakó tongá popisí in bobay!

^9-10 Maníka motuḷungdon in akuoi kon i Daud, apa doman ki Tuhan ain nodandi kon inia kon mogamábí kon dodatuan tanaa nongkon i Saul bo kon buínea mita, bo moduí kon i Daud mobaḻí datu kon bayongan in Israel bo Yohuda. Igumon mako ki Allah in moḻimod kon inakó, aka diá aidanku in dandi i Allah kon i Daud tua!”

¹¹ Diádon in ki Isyboset nokobaḻí nosingog kon totontagápamai, sin moondok in sia kon i Abner.

¹² Bo ki Abner in nopotabádon in totabá minayá kon i Daud inta kon dodai intua kon Hebron, takin nodia kon koyow, “Ki inebí in mongawasa kon butá tanaa? Pogaidon kon dodandian takinku, dá akuoi in mobantungdon kon i Tuangku sinbá bayongan bangusa in Israel moibogdon kon i Tuangku!”

¹³ Ki Daud in notubag, “Mopia! Poyaputdon in habar tanaa kon i Abner: Moibogbí in akuoi momia kon dodandian takinmu, tongá takin sarat tobatú: ki Mikhal, adí bobay i Saul, musti diaanmu mangoi kon inakó aka mamangoi in iko kon inakó.”

¹⁴ Nopaḷut mako kon tua ki Daud nopotabá doman in totabá minayá kon i Isyboset, takin nodia kon koyow, “Maníka pobuiondon i Tuang in ki Mikhal, ki buḷoiku tua kon inakó. Sia tua in inuboḻiankudon in mogatut in kuḻit in pinonoitan in intau in Pilistin.”

¹⁵ Bo ki Isyboset nopotabá in totabánea minayá nogamá kon i Mikhal nongkon i buḷoinea, inta ki Paltiel adí i Lais.

¹⁶ Táe ki Paltiel umuran dinumudui kon i Mikhal sindaḷan moguang. Naonda in mosia nodapot kon kotá in Bahurim, ki Abner in noguman kon inia, “Natuadon, pobuidon!” Bo nobuidon in ki Paltiel.

¹⁷ Kon dodai intua ki Abner noyosingogdon takin itoi mita in Israel bo noguman, “Noonggot bidon in moiko moibog sinbá ki Daud in mobaḻí datumu.

¹⁸ Yo, tanaadon in kasampatan monimu. Toropdon, ki Tuhan ain nodandi kon i Daud, kon pongin i inia umat-Nea Israel posaḷamaton nongkon intau in Pilistin bo nongkon bayongan in musung ibanea mako.”

¹⁹ Ki Abner in noyosingog doman in intau mita in Benyamin, bo onda intua minayá in sia in Hebron sin mopotaau kon i Daud kon onu inta ain yopakat noyotakin in intau in Benyamin bo intau in Israel.

²⁰ Naonda in ki Abner noyotakin in intaunea inta doyowa nopuḷú namangoi kon tayowon i Daud kon Hebron, pinomiaan i Daud kon rame kon i monia.

²¹ Nopaḷut mako kon tua ki Abner nopoigumdon kon mayá bo noguman, “Ogoiaipa in wakutu in akuoi mayá sin moguman kon bayongan intau in Israel sinbá dumugangdon kon i Tuangku. Tarimaanbí monia in ki Tuangku mobaḻí datu, dá ki Tuangku in momarentadon kon bayongan in butá, podudui ná inta kinoibog i Tuangku.” Onda intua ki Abner inogoidon i Daud minayá takin iḷukadan sinbá mosaḷamat in sia.

Ki Abner iḻimod

²² Naonda in ki Abner minayá, ki Yoab takin intau mita i Daud ibanea nobuidon nongkon pinonubuan bo nodia mangoi kon nobayong in barang mita inta inagow.

²³ Bo pinotaaudon kon i Yoab kon ki Abner in namangoidon kon tayowon i Datu Daud bo ain inogoi nobui takin iḷukadan in kasaḷamatannea.

²⁴ Bo namangoidon in ki Yoab kon tayowon i datu bo noguman, “Naondabí in aid i Tuang Datu tua? Ki Abner ain namangoi kon tayowon i Tuang datu. Nongonu sin inogoibí i Tuang minayá mako natua in sia?

²⁵ Eta degá diábí kinotaauan i Tuang Datu in ki Abner tua? Sia tua in tongábí mamangoi sin monguboḷ kon i Tuang Datu, bo monotaau kon naonda in kaadaan takin onu mita in tomayá i Tuang Datu.”

²⁶ Naonda in nonaḷá mako kon i Daud, nopotabá in ki Yoab kon totabánea mita sin mogoiní kon i Abner. Kinobatukan monia in ki Abner kon diug in parigí in Sira, bo dinia bui monia. Bayongan inta nobaḻí tatua in diábí kinotaauan i Daud.

²⁷ Naonda in ki Abner nodapotdon kon Hebron, inanutan i Yoab in sia minayá sinimí nopobayá in diug in ngara moḷoben, naonda bo oyúon in oumanon inta diá motaau kodongogan in intau ibanea. Bo daḻídon sinumbuk i Yoab kon sian in ki Abner nodapot in minatoi in sia. Ki Abner minatoi iḻimod i Yoab sin nonuḻí kon kinopatoian i ai-ainea ki Asael.

²⁸ Naonda in kinodongogan i Daud in soaḷ tatua, noguman in sia, “Kinotaauanbí i Tuhan kon akuoi bo rayatku in diábí in taḷá kon pinoḻimodan kon i Abner tatua.

²⁹ Pomayádon mako bá ki Yoabdon bo bayongan in motoḷuadínea in hukumon popisí in aidnea tatua. Poigumon mako sinbá kon bonu in motoḷuadí i Yoab takin buínea monag umuran oyúon in kotugatan in panyaki inta mokoondok, andeka ḷoḷaki inta moyempé, andeka inta matoi kon bonu in parang andeka inta kodaitan in kaanon!”

³⁰ Natuata in pinototuḻí i Yoab bo i Abisai ai-ainea, sin motuḻí kon yaat in gina kon i Abner sin ki Abner in noḻimodon kon i Asael ki ai-ai monia kon pinoparangan kon Gibeon.

Ki Abner iḷobong

³¹ Onda intua ki Daud nomarenta kon i Yoab takin intaunea mita sinbá momisí kon ḷambung monia, bo moḷutud kon ḷambung in pinonogumatoian bo mogamui sin kinopatoian i Abner. Bo kon dodai in nogatod kon mayat, ki Datu Daud in minayá doman kon tumimai in poti in mayat.

³² Ki Abner iḷobong kon Hebron, bo datu takin rayat noguang totok kon tayowon in pinoḷobongan tatua.

³³ Nopaḷut mako kon tua ki Daud in nopoamui kon i Abner, kainia, “Eta patus degá in ki Abner in matoi naonda bo intau dondunguḷ?

³⁴ Ḻimanea in diá sinogot, bo sioḷnea in diábí ginupit. Sia in minatoi kinotumbukan in intau mita inta moraat bo moromú.” Bo nodugangdon totok in uwang in bayongan rayat kon i Abner.

³⁵ Kinoouputbí in singgai intau mita moḷongasi modondouḷug kon i Daud sinbá mongaanpa umpaka tongá topiḻikmai, táe sia in nongibot, “Igumon mako ki Allah in moḻimod kon inakó, aka akuoi mongaan kon dodai in mata in singgai diápa tumoyop!”

³⁶ Nokodongogmai kon natua nosanangdon in gina in bayongan in rayat. Totuu, onukabí in pomiaan i Datu Daud, mokosanangbí kon gina monia.

³⁷ Kon singgai tatua bayongan in rayat i Daud bo bayongan bangusa in Israel nonotaaudon, kon diábí in ki datu noibog kon pinoḻimodan kon i Abner tatua.

³⁸ Guman i datu kon intau mita inta dinumudui tatua, “Diábí degá kinotaauan monimu kon singgai in naa tobatú itoi moḷoben kon Israel ain minatoi?

³⁹ Umpakabí akuoi naa in datu moḷoben inta piniḻí i Allah, táe korasaanku in tanaa kon moyangkóbí. Ki adí mita i Zeruya tua in moiḻiudon in romú. Diá in akuoi mokotongod in mongawasa kon i monia. Igumon mako ki Tuhan in mohukum kon intau mita moraat tatua, podudui kon oaid monia!”