SAMUEL 2 23 - Alkitab Singog In Mongondow Masa In Tanaa

Tosingogon i Daud imbuitnea

¹ Ki Daud adí i Isai in piniḻí nobaḻí datu bo binaḻí intau moḷoben i Allah Yakub. Sia doman in nongarang kon dondong mita kon Israel. Naa in tosingogon i Daud imbuitnea:

² Roho i Tuhan ain nosingog pinongin inakó; koyow bo parenta-Nea in naa kon bibigku.

³ Ki Allah i Yakub ain nosingog; kon inakó moḷoḷukad in Israel in noguman: “Datu inta nomarenta kon rayat takin moadil inta nonongganut takin toindudui kon i Tuhan,

⁴ Sia in naonda bo sindar in mata in singgai doḷo-doḷom kon doḷo-doḷom inta diá in goḷom. Sia in naonda bo sindar in mata in singgai nopaḷut mako in nonguyan nomaḻí kon bonok noḷunow mopouḻi-uḻinag.”

⁵ Natua doman in buíku binarakatan i Allah, dodandian-Nea kon inakó, diá mobaḷui, dandi-Nea tatua in mononoi bo motompod, notoinut kon bayongan in yagi-yagi. Ki Allah in moḷukad kon kountunganku bo mobogoi kon bayongan inta kinoibogku.

⁶ Táe intau inta diá motoindudui kon i Tuhan naonda bo dugi inta pinogambat. Diá motaau kadaian in intau;

⁷ diábí tobatúmai in intau in moibog moḻiai aka diá kokada-kadai in kayu andeka uatoi. Intau mita tatua in moyompat kaanon in tuḷú.

Tontara mita i Daud inta ponango-nangoian

⁸ Naa in tangoi in tontara mita i Daud inta ponango-nangoian: Inta muna in ki Ishbaal, intau in Hakhmoni, itoi in “Paanan Toḷu”. (Triwira). Nokoimontandon kon pinoparangan sia nonaḷow kon 800 in intau bo noḻimod kon i monia komintan takin nomaké in pandongnea.

⁹ Intau nogindua kon bonu in Triwira in ki Eleazar adí i Dodo nongkon inanakan i Ahohi. Sia in sinumakin kon i Daud kon tungkuḷ in nonayow kon intau in Pilistin inta noyosipun sin moparang. Bo kon dodai in tontara mita in Israel inumundok,

¹⁰ ki Eleazar umuran noḷongasi nomutú kon intau mita in Pilistin nodapot in noḷopídon totok in sia. Ḻimanea in notorondódon nodapot in diádon motaau in sia mogukat kon kedangnea. Kon singgai tua ki Tuhan nobogoi in kauntungan moḷoben kon Israel. Tontara in Israel inta inumundok koina bui namangoi kon tampat pinoparangan i Eleazar, bo noḷongkut kon ḷambung mita in parang nongkon mayat mita kon tua.

¹¹ Intau nogintoḷu kon bonu in Triwira in ki Sama adí i Age nongkon Harari. Nokoimontan kon tungkuḷ in intau in Pilistin noyosipun kon Lehi, kon gobá tobatú inta nopuḻing in berenebon, tontara mita in Israel noḷagui kon intau mita in Pilistin.

¹² Táe ki Sama in umuranbí noparang, noḻimod bo nonaḷow kon intau in Pilistin, dá nokoḷukadon kon gobá tatua. Natua in nobaḻí ki Tuhan nobogoi in kauntungan inta moḷoben.

^13-14 Kon singgai ibanea kon dodai in motoyongdon in ponoḻisían kon bungai in boyó, intau toḷu nongkon 30 in porwira i Daud inta noiḷontú tua nosiḻig kon Angob in Adulam. Kon tungkuḷ intua ki Daud kon bonu in tampat poḷoḷukadan kon angob tatua. Intau in Pilistin nononḷoḷaigan kon Ḷopá in Repaim, bo topaanan nongkon i monia in nokoḻitúdon kon Betlehem.

¹⁵ Mokotanobdon in ki Daud kon ḻipú kinobiagannea tatua bo noguman, “Aka kuma bo akuoi ogoian in tubig nongkon parigí kon diug in ngara moḷoben kon Betlehem!”

¹⁶ Nokodongogmai kon natua porwira taya toḷu tatua nongin pinononḷoḷaigan in intau in Pilistin, bodongka nonangkob kon tubig nongkon parigí tatua, onda intua dinia monia kon i Daud. Táe doíbí in ki Daud nonginum kon tubig tatua, sedang bo binutakneabí nobaḻí sosumba kon i Tuhan.

¹⁷ Sia in noguman, “Oo Tuhan, diábí in akuoi motaau monginum kon tubig tanaa! Aka inumonku, yo tua in naonda bo akuoi in nonginum kon dugú in intau mita inta ain nopotaru in kobiagan monia!” Dá ki Daud in beresibí doí monginum kon tubig tatua. Tuata in aid mita moḷoben in intau toḷu inta mongobarani bo moropot tatua.

^18-19 Toḷu nopuḷú in porwira inta ponango-nangoian tatua sinangoian doman “Tridasawira”. Mosia tua in kon bonu in tongganut i Abisai ai-ai i Yoab, adí i Zeruya. Nokoimontandon in sia noḻimod kon 300 in intau tongá nopomaké in pandongnea. Tuamai in nobaḻí in sia ponango-nangoian. Táe sia in diábí ná kotoyang in “Triwira”.

²⁰ Porwira tobatú inta ponango-nangoian ibanea in ki Benaya adí i Yoyada intau in Kabzeel. Totok in sia mobarani. Intau doyowa inta totok in mobarani nongkon Moab iḻimodnea. Nokoimontandon in kon dodai in singgai oyúon in oḷú inta mokompo-kompoḷ, sinumuot in sia kon bubú tobatú, bo noḻimod kon singa tobatú kon tua.

²¹ Sia in nokoimontan domandon in noḻimod kon intau in Mesir tobatú, inta motorindog bo kokada-kadai doman in pandong. Ki Benaya in nonayow kon inia tongá nomaké in tungkud. Pandong kokada-kadai intau in Mesir tatua inagownea bo tua in pinakénea pinoḻimod kon intau tatua.

²² Tuata in inaidan mita i Benaya, intau tobatú nongkon “Tridasawira”.

²³ Kon Paanan tatua ki Benayadon in noiḷontú, táe sia in diábí ná kotoyang in “Triwira”. Ki Daud in noduí kon inia nobaḻí tongguḷu in intau mita moḷoḷukadnea.

^24-39 Naa in tangoi monia inta noituot kon “Tridasawira”. Ki Asael ai-ai i Yoab Ki Elhanan adí i Dodo intau in Betlehem Ki Sama bo ki Elika intau in Harod Ki Heles intau in Palti Ki Ira adí i Ikes intau in Tekoa Ki Abiezer intau in Anatot Ki Mebunai intau in Husa Ki Zalmon intau in Ahohi Ki Maharai intau in Netopa Ki Itai adí i Ribai intau in Gibea kon butá in suku Benyamin Ki Benaya intau in Piraton Ki Hidai intau in ḷopá mita in Gaas Ki Abial bo intau in Araba Ki Azmawet intau in Bahurim Ki Elyahba intau in Saalbon Adí mita i Yasyen Ki Yonatan Ki Sama intau in Harari Ki Ahiam adí i Sarar intau in Harari Ki Elipelet adí i Ahasbai intau in Maakha Ki Eliam adí i Ahitopel intau in Gilo Ki Hezrai intau in Karmel Ki Paerai intau in Arbi Ki Yigal adí i Natan intau in Zoba Ki Bani intau in Gad Ki Zelek intau in Amon Ki Naharai intau in Beerot, mododia kon pakakat in parang i Yoab Ki Ira bo ki Gareb intau in Yetri Ki Uria intau in Het. Mosia komintan kobayongnea in toḷu nopuḷú bo pitu in tontara inta ponango-nangoian.