SAMUEL 2 22 - Alkitab Singog In Mongondow Masa In Tanaa

Dondong sukur i Daud

¹ Naonda in ki Tuhan noposaḷamat kon i Daud nongkon i Saul bo nongkon musungnea ibanea, nopodondong in ki Daud in dondong tanaa kon i Tuhan: [

² Akuoi in motabi kon ini-Mu, o Tuhan, Ikobí in kinodoyonan in ropotku.]

³ Ki Tuhan in naonda bo poḷoḷukadan inta moropot tampat pogogadopanku. Ki Allahku in naonda bo buḷud batu, tampat pononiunganku. Naonda bo kaḻeaw in Sia mogoḻingoi kon inakó, bo moḷukad kon inakó sinbá umuran mosaḷamat.

⁴ Akuoi in nokuani kon i Tuhan inta patus dayowon, Sia in nopoḷuat kon inakó nongkon musungku mita.

⁵ Akuoi in iḻipung in bodito popatoi bo inagom in ḷunud mokoyopú.

⁶ Akuoi in iḻipung in bodito popatoi, poyogaḷap in popatoi kon tayowonkudon.

⁷ Kon bonu in rorigaku akuoi nokuani kon i Tuhan, akuoi nomaḷú kon i Allahku nokituḷung. Nongkon Baḷoi-Nea inindongogan-Nea in singogku bo nongindongog kon kuaniku.

⁸ Bo butá nodandú bo nogugur, sipangkoion mita in buḷud nodandú bo nouyot popisí in torú i Allah!

⁹ Poyok in ginumabut nongkon bubú in ngiung-Nea, tuḷú bo baga iḻumuai nongkon bibig-Nea.

¹⁰ Ḷangit binotak-Nea, bo noponagdon in Sia, sindip in goḷom kon ḻimonag in sioḷ-Nea.

¹¹ Sia in iḷumayug sinumakoi kon kerub; Sia in nogikoḻikip in tompot.

¹² Sia in nopongoḷubung in sindip; goḷom mobunod iḻimibu kon i-Nia.

¹³ Nongkon kilat kon tayowon-Nea, iḷumuaidon in goḷom, uyan eis bo tuḷú.

¹⁴ Bo ki Tuhan in nonggotup nongkon toḷungayá, Inta Totok in Moḷantud nopodongogdon in singog-Nea.

¹⁵ Sia in nopopiotdon in piot-Nea mita, bo nopoyayit in musung. Sia in nopodagit in kilat nopobui-buimai nodapot in noḷagui in mosia.

¹⁶ Omonaganmai totok in dagat inontong bo aip in butá nobukat kon tungkuḷ in ki Tuhan nongguak kon musung-Nea takin torú.

¹⁷ Nongkon tampat moḷantud Sia in nopotonggó in ḻima-Nea; kinadaian-Nea in akuoi bo binatun-Nea nongkon tubig inta modaḷom.

¹⁸ Sia in noposaḷamat kon inakó nongkon musung inta moropot bo nongkon intau inta doí kon inakó sin mosia in moropo-ropot in akuoi.

¹⁹ Mosia in nonubu kon inakó kon dodai in akuoi kino antugan in roriga táe ki Tuhan in nobaḻí mototuḷungku.

²⁰ Sia in nopoḷuat kon inakó nongkon roriga bo pinosaḷamat-Nea in akuoi sin kinoibog-Nea in akuoi.

²¹ Ki Tuhan in notuḻí kon aidku inta moitutui; Sia in nomarakat kon inakó sin akuoi in diá kotaḷá.

²² Akuoi in dinumudui kon parenta i Tuhan, bo diá nomaḷong nongkon i Allahku.

²³ Bayongan in hukum-Nea inindoianku, parenta-Nea mita in diá in sinaḻibanku.

²⁴ Kinotaauan-Nea kon akuoi naa in diá kotaḷá bo iyumayú nongkon inta noitaḷá.

²⁵ Dá ki Tuhan in notuḻí kon aidku inta moitutui sin kinotaauan-Nea kon diá kotaḷá in akuoi.

²⁶ Tuhan, Iko in mosatia kon intau inta mosatia bo mopia kon intau inta mopia.

²⁷ Bo kon intau inta motusi mokipogontong in Iko inta motusi, táe intau inta moraat in kinodoí-Mu.

²⁸ Intau inta moompá in dodia posaḷamaton-Mu; táe intau inta mokaḷakuang potungkudon-Mu.

²⁹ Iko nopoyongkit in togáku; Ki Tuhan Allahku nonimbayag kon sindipku.

³⁰ Inogoian-Mu in ropot in akuoi sin moyompat kon musung; takin totuḷung i Allahku dinangatanku in poḷoḷukadan monia.

³¹ Oaidan i Allahku in notompod totok, dandi i Tuhan motaau pirisayaan! Sia in naonda bo kaḻeaw kon bayongan inta namangoi kon i-Nia.

³² Sin tongábí ki Tuhan in Allah; Tongábí ki Allah in mototuḷung naton.

³³ Sia tua in ki Allah inta nobogoi in ropot kon inakó bo nopobaḻí daḷanku notompia.

³⁴ Iniropotan-Nea in sioḷku naonda bo sioḷ in rusa, bo noḷukad sinbá mosaḷamat in akuoi kon buḷud.

³⁵ Sinundú-Nea in akuoi moparang, dá akuoi mokobadangdon kon piot modapot in mata in piot moitampok moropot totok.

³⁶ Tuhan, Iko in noḷukad bo noposaḷamat kon inakó bo notonoi kon inakó takin kawasa-Nea akuoi in noiḷontú popisí in aid-Mu.

³⁷ Iḷukadan-Mu in akuoi sinbá diá kodomokan bo akuoi in diá dodai in onda in noḷabú.

³⁸ Inaḷowanku in musungku bo sinaḷowku in mosia, bo diábí umundok modapot in mosia moyopú.

³⁹ Pomobakku in mosia modapot in mosia diádon mokosindog bui, mosia in moibobak diádon kodaya kon tayowon in sioḷku.

⁴⁰ Inogoian-Mu in akuoi in ropot sin moparang, bo kauntungan kon musungku mita.

⁴¹ Binaḻímu in musungku mita noḷagui nongkon tayowonku; intau mita inta doí kon inakó iyopúku.

⁴² Mosia in kinumarak, táe diá in notuḷung, mosia in nokuani kon i Tuhan, táe diá sinubagan-Nea.

⁴³ Mosia in irimumudku naonda bo ḷobud inta noitabud, bo sinimpatanku naonda bo yoná kon daḷan.

⁴⁴ Pinoḷuat-Mu in akuoi nongkon inanakan inta moraat, bo binaḻí-Mu in akuoi pongawasa kon bangusa mita; bangusa inta diá kinotaauanku nobaḻí bobantungku.

⁴⁵ Intau mita ango-angoi in tumungkud kon tayowonku, bo dumudui aka mokodongog kon parentaku.

⁴⁶ Barani monia noinggamádon; mosia in mourot bo ḷumuai nongkon poḷoḷukadannea.

⁴⁷ Ki Tuhan in nobiag! Dinayo-dayowdon in mototuḷungku! Poḷantudon in ki Allah, mopoposaḷamatku!

⁴⁸ Pinopountung-Nea in akuoi nongkon musungku, bangusa mita pinotungkud-Nea kon tayowonku,

⁴⁹ Pinosaḷamat-Nea in akuoi nongkon musungku mita. Tuhan, pinopountung-Mu in akuoi nongkon musungku, Iḷukadan-Mu in akuoi nongkon intau mita inta moromú.

⁵⁰ Tuamai in poḷantudonku in Iko kon sigad in bangusa mita, bo podondongku in dodayow kon ini-Mu.

⁵¹ Ki Allah in nobogoi in kauntungan moḷoben kon datu inta dinuí-Nea, Sia in umuranbí motabi kon intau inta piniḻí-Nea, ki Daud bo buínea in umur mononoi.