SAMUEL 2 20 - Alkitab Singog In Mongondow Masa In Tanaa

Pinomarontakan i Seba

¹ Kon Gilgal oyúon in intau mononuyayow tangoinea in ki Seba. Ki adí i Bikri in sia, nongkon suku in Benyamin. Kon dodai in ki Daud bo intaunea mita namangoi, nogirup in ki Seba kon torompet bo nomaḷú, “Diábí in tondoḷ naton bo i Daud. Onubí in mangaḻenea dumudui in kita kon inia? Ei intau mita in Israel, koḻigai mobui in kita!”

² Bo intau mita in Israel minayá bo nonaḷámai kon i Daud bo dinumudui kon i Seba. Táe intau mita in Yohuda umuranbí nosatia bo sinumakin kon i Daud nongkon Ongkag in Yordan nodapot kon Yerusalem.

³ Naonda in ki Daud noyaput kon komaḻignea kon Yerusalem, bobay mopuḷú inta diá inika i datu inta sinaḷáan sin moḷukad kon komaḻig, pinoutunnea kon bonu in baḷoi inta iḷukadan in moḷoḷukad. Onu in pakéon monia sia in nopooyúon, táe diádon in ki Daud kon dodai in onda in nosiug takin i monia. Mosia tua in pinopoyayúdon bo kobiagan monia in naonda bo dongkadon boba-bobay nodapot in minatoi.

⁴ Ki datu in nomarenta kon i Amasa, “Sipundon in intau in Yohuda bo angoi in naa moyotakin monia kon bonu in toḷu nosinggai.”

⁵ Bo minayádon in ki Amasa nosipun kon i monia, táe sia diá nobui kon wakutu inta ain sinantú i datu.

⁶ Onda intua ki datu in nogumandon kon i Abisai, “Ki Seba tua in mokosusa-susabímai kon inaton moiḻiu kon i Absalom. Tuamai in diádon in intauku mita bo batukdon in sia, sinbá diá modapot in sia in mokoḻitú kon kotá mita inta dininding, bo mokoḷagui kon inaton.”

⁷ Dá kon bonu in tongganut i Abisai, tontara i Yoab bo tontara inta moḷoḷukad kon i datu bo bayongan in tontara ibanea nobuat nongkon Yerusalem sin mogaḷow kon i Seba.

⁸ Naonda in mosia nodapot in batu moḷoben kon Gibeon, ki Amasa namangoi nokipodungkuḷ kon i monia. Kon dodai intua ki Yoab nogiḷambung in ḷambung parang bo nopogabit in kedangnea. Naonda in sia minayá, gumá in kedangnea tatua noḷuat nodapot in kedangnea nopamping kon ḻimanea koḷoigi.

⁹ Ki Yoab in noguman kon i Amasa, “Onu in habar, yobayat?” ḻimanea koḷanan in nokadai kon kumi i Amasa naonda bo mongayok kon inia.

¹⁰ Diábí inontong i Amasa in kedang kon ḻima koḷoigi i Yoab. Bo daḻídon in ki Yoab noponurak in kedangnea tatua kon sian i Amasa, dá bonu in siannea noibutak kon butá. Minatoi in sia kon dodai doman tatua, dá diá bidon paraḷu monumbuk bui in ki Yoab kon inia. Bo ki Yoab takin ki Abisai ai-ainea, in nongingguputdon nogaḷow kon i Seba.

¹¹ Tontara i Yoab tobatú in sinimindog kon diug in mayat i Amasa bo nomaḷú, “Ki ine in momihak kon i Yoab bo kon i Daud, duduidon kon i Yoab!”

¹² Mayat i Amasa inta nopuḻing in dugú tatua noiukat mako kon yuak in daḷan. Tontara i Yoab inta koina nokoontong kon bayongan intau inta moitaḻib in tumogonbí kon tua. Tuamai pinosínea in mayat tatua kon gobá bo kinoḷoban in daing.

¹³ Naonda in mayat tatua pinosídon kon daḷan, bayongan in intau nongingguputdon kon bobayáan monia dinumudui kon i Yoab sin mogaḷow kon i Seba.

¹⁴ Ki Seba ain noitaḻib kon bayongan butá in suku Israel, bo noyaputdon kon kotá in Abel-bet-Maakha dinuduian in bayongan in ginaḷum i Bikri.

¹⁵ Kinodongogan in intau i Yoab kon ki Seba in kon tua, bo iḻipungdon monia in kotá tatua. Mosia nopomumbun in butá kon ḻibu in dinding ḷuai bo nomangkoidon nongaḻi kon butá inta kon ḻimonag in dinding tatua sin mogumpag kon dinding.

¹⁶ Kon kotá tatua oyúon in bobay tobatú inta mobijaksana, bo sinimindog in sia kon dinding bo nomaḷú, “Indongogai! Indongogai! Poigumdon bá ki Yoab mamangoi in naa; akuoi in moibog mongonguman takinnea.”

¹⁷ Bo namangoidon in ki Yoab bo bobay tatua noḻibó, “Ki Tuang degá in ki Yoab?” “Oo,” tubagnea. Guman in bobay tatua, “Indongogaipa in singogku naa, Tuang.” “Mopia, indongogankubí,” tubag i Yoab.

¹⁸ Guman in bobay tatua, “Tungkuḷ intua intau mita biasamai in moguman nanaa, ‘Aka iko moparaḷu kon topotundú, yo bayádon kon kotá in Abel’ – bo duduian doman monia intua.

¹⁹ Kotá nami Abel naa in moḷoben, tongobatú kotá inta nobiag notompia bo mosatia kon butá in Israel. Nongonu sin ḷongasionbí poguyaaton i Tuang? Moibog degá in ki Tuang momoguyaat kon butá kapunyaan i Tuhan?”

²⁰ “Deemanbí natua!” tubag i Yoab, “diábí in makusudku momoguyaat andeka morimumud kon kotámu!

²¹ Tua in deemanbí tomayá nami. Táe intau tobatú inta tangoinea in ki Seba adí i Bikri, inta nongkon buḷud in Epraim, ain nomarontak kon i Datu Daud. Ogoidon in sia, bá mayádon in kami nongkon kotá tanaa.” Guman in bobay tatua, “Uḷu in intau tatua in pogambatdon nami kon i Tuang nongkon dinding tanaa.”

²² Bo minayádon in sia takin mokaḻet nopotaau in makusudnea kon intau inta nogutun kon kotá tatua. Nopaḷut mako kon tua uḷu i Seba pinongkó bo pinogambat kon i Yoab. Onda intua nogirup in ki Yoab kon torompet bo intaunea mita in nonaḷámaidon kon kotá tatua bo nobuidon kon baḷoinea-baḷoinea. Ki Yoab in nobuidon kon Yerusalem bo minayá kon tayowon i datu.

Pogawai mita i Daud

²³ Naadon in intau mita moḷoben inta dinuí i Daud: Tongguḷu totokan in bayongan tontara in Israel: ki Yoab. Tongguḷu in tontara moḷoḷukad kon i Daud: ki Benaya adí i Yoyada.

²⁴ Tongguḷu in intau mita inta pakisaan mogaid: ki Adoram. Bendahara in negara: Ki Yosapat adí i Ahilud.

²⁵ Momomais in negara: ki Seya. Imang: ki Zadok bo ki Abyatar.

²⁶ Imang kon komaḻig: ki Ira nongkon kotá in Yair.