SAMUEL 2 17 - Alkitab Singog In Mongondow Masa In Tanaa

Ki Husai nonongkuḷabot kon tomayá i Ahitopel

¹ Diá noonggot kon tua, ki Ahitopel noguman bui kon i Absalom, “Ogoipa in akuoi momiḻí kon 12.000 in intau. Bain doḷom bo mobuat in akuoi mogaḷow kon i Daud.

² Tubuonku in sia kon dodai in sia moḷopí bo kobuḻiandon in ropotnea. Taḻikokoganku in sia, dá bayongan in intaunea in moḷaguidon. Tongábí ki Datu Daud in ḻimodonku.

³ Táe bayongan in intaunea in daitonkubí diaan mangoi kon i Tuangku naonda bo nonikaan bobay mobui mangoi kon i buḷoinea ḷoḷaki. Sin koibog i Tuangku in tongábí nyawa in intau tobatú? Ibanea in diábí onu-onuon.”

⁴ Tonggina tatua inanggapbí mopia i Absalom bo in bayongan itoi in Israel.

⁵ Umpaka natua ki Absalom in noguman, “Oinípa in ki Husai; igai indongoganpa naton in tosingogonnea.”

⁶ Naonda in ki Husai namangoi, pinotaaudon i Absalom in tomayá i Ahitopel, bodongka noḻibó, “Duduian naton degá in tonggina tatua? Aka diá dá naonda degá in kon inimu?”

⁷ Ki Husai in notubag, “Tonggina i Ahitopel in kon tanaa in diábí mopia.

⁸ Kinotaauan bidon i Tuang kon ki Daud bo intaunea mita tatua in intaubí mita inta mongotorindog bo mongobarani. Mosia tua in naonda bo kobarani in beruang kobaayan inta kinobuḻian i adínea. Apa doman ki Daud tua in tontara inta kopongalaman inta diábí dodai in onda in mosiug moyotakin in intaunea mita.

⁹ Dika-dika kon tanaa mako nogadopabí doman in sia kon bonu in angob andeka tampat ibanea. Dá, aka kuma intau i Tuang tubuon i Daud, bo oyúon in matoi, dá ki inekabí in mokodongog kon tua in mogumanbí kon intau i Absalom in sinaḷowdon.

¹⁰ Dá intau mita inta totok in mongotorindog bo mobarani naonda bo singa in notantúbí kon angoianbí in ondok. Sin bayongan intau in Israel in nonotaau bidon kon ki amá i Tuang tua in pahlawan, bo intaunea mita in intau doman mita inta motorindog bo mongobarani.

¹¹ Tuamai nanaa in tongginaku: Sipundon in bayongan intau in israel nongkon bayongan in butá, modapot in kobayongnea in nádon bungaion kon pintad. Bo ki Tuangdon tontaní in modia kon i monia mayá moparang.

¹² Mouḻíbí naton in ki Daud kon ondakabí in pinogadopannea, bo tubuon naton in sia kon dodai in diápa kotaauannea onu in mobaḻí. Diábí in mokoḷagui, pinomayá sia andeka intaunea.

¹³ Aka moḷagui in sia kon bonu in kotá tobatú, bayongan rayat naton in mogamábí kon tontogot bo mopogambat kon kotá tatua bodongka mopoḷabú kon bonu in oyuknea inta nodiug kon tua. Tobatúmai in batu yo diábí in kotaḷáan kon buḷud tatua.”

¹⁴ Nokodongogmai kon tua in ki Absalom bo bayongan intau in Israel yo noguman in mosia, “Tonggina i Husai in mopia-pia in tonggina i Ahitopel.” Totuu, ki Tuhan ain nonantú kon mogindiá kon tonggina i Ahitopel inta mopia tatua, sinbá ki Absalom in kotugatandon in bodito.

Ki Daud minayá in Mahanaim

¹⁵ Nopaḷut mako kon tua pinotaau i Husai kon i Imang Zadok bo kon i Imang Abyatar in tonggina i Ahitopel bo tongginanea tontaní kon i Absalom bo kon itoi mita in Israel.

¹⁶ Guman i Husai, “Koḷamemet! Potaaudon kon i Daud sinbá diádon in sia mogogai mosiug kon ḷoḷoḷanan in ongkag kon padang gurun. Mustibí in sia ḻimikat in mayá ḷumoḷan kon Ongkag in Yordan. Aka diá, yo sia takin tontaranea mita in rimumudon.”

¹⁷ Kon dodai intua ki Yonatan adí i Abyatar bo ki Ahimaas adí i Zadok nogoḷatdon mako kon diug in bokaká in tubig En-Rogel, kon bingkí in kotá in Yerusalem. Mosia in diá kobaḻí tumuot kon kotá sin moondok in ontongon in intau. Ná biasamai, ata bobay tobatú mopotaau kon i monia in habar inta musti potaau kon i Datu Daud.

¹⁸ Táe kon dodai intua adí ḷoḷaki tobatú inta noitongkaná in nokoontong kon i monia, bo nopotaau intua kon i Absalom. Dá mosia in iḻimikatdon minayá bo nogadop kon baḷoi in intau tobatú kon ḻipú in Bahurim. Kon diug in baḷoinea oyúon in parigí bo sinumuot in mosia kon bonunea.

¹⁹ Ki buḷoi in intau inta kitogi baḷoi tatua nopoompat in daing tobatú kon bubú in parigí tatua bo noporarit in gandum kon tudunea, dá parigí tatua in diádon kinoontongan

²⁰ Intau mita inta pinotabá i Absalom namangoi in baḷoi tatua bo noḻibó kon bobay tatua, “Kon onda in ki Ahimaas bo ki Yonatan?” “Bagupabí in mosia minayá iḷumoḷan kon ongkag,” tubagnea. Sinayakdon monia in tayowmobiag doyowa tatua, táe diábí nouḻí monia, bo nobuidon in mosia kon Yerusalem.

²¹ Ki Ahimaas bo ki Yonatan in iḷumuaidon kon parigí tatua, bo iḻimikat minayá nokipodungkuḷ kon i Datu Daud bo nopotaau in bayongan tua. Guman monia, “Ki Ahitopel nononggina sinbá monubu kon i Tuang datu. Dá pobuatdon in tanaa doman ḷumoḷan kon ongkag tanaa.”

²² Bo iḷumoḷandon in ki Daud takin intaunea mita kon Ongkag in Yordan, bo nodapotdon kon ḷoḷan kon dodai in nobayagdon.

²³ Naonda in kinotaauan i Ahitopel kon tongginanea in diá dinuduian, sia nopopakédon in ḷoḻitúan kon keledainea bo nobui kon kotánea tontaní. Naonda in noginḷapat mako kon bayongan in oaidannea ginumantongdon in sia, bo iḷobong kon bonu in poḷoḷobongan kon inanakannea.

²⁴ Ki Daud ain nodapot kon kotá in Mahanaim kon wakutu in ki Absalom iḷumoḷan kon Ongkag in Yordan, sinakinan in intau mita in Israel. (

²⁵ Ki Absalom ain noduí kon i Amasa nobaḻí tongguḷu in tontara nonoḻiu kon i Yoab. Ki Amasa adí i Yitra intau in Ismael; ki inánea tangoinea in ki Abigail adí i Nahas, inta ki utat bobay i Zeruya ki iná i Yoab.)

²⁶ Ki Absalom bo intaunea nononḷoḷaigan kon butá in Gilead.

²⁷ Naonda in ki Daud noidapot kon Mahanaim, sinontomu in sia i Sobi adí i Nahas nongkon kotá in Raba kon Amon, bo i Makhir adí i Amiel nongkon Lodebar, bo i Barzilai nongkon Rogelim kon Gilead.

^28-29 Nodia in mosia kon palo, rumping, bo boḷosak kon i Daud bo intaunea mita, bo gandum doman, makeang, topong, gandum inta inangag, kasang, berenebon, biluk, keju, susu inta bagupa pinugut bo tongonumai in domba. Kinotaauan monia kon ki Daud bo intaunea mita tatua in ginogoidon, moyogang bo moḷopí sin nongkon bobayáan kon padang gurun.